#NSS個人
[賽官(已經畢左業)] 有啲想回應一下NSS210704C嘅同學仔。
其實我嘅遭遇同你都有啲差唔多，或者係話更加嚴重，但係去到而家（中學畢業）已經好咗好多。勸奉你一句，阿媽同家姐你都冇辦法改變嘅話，咁要改變嘅就係自己嘅諗法。
我除咗對上有一個家姐，對下仲有一個細佬。阿媽係一個好專制嘅人，永遠都會覺得自己啱。而且佢好睇重錢，因為佢好細個已經出去打工養公公婆婆。 佢係一個好傳統嘅家庭入面長大，因為佢係長女需要負責曬所有嘢，亦都係畀公公婆婆打大。所以佢亦都會喐手打我，佢係會講得出「仔女就係用嚟畀阿爸阿媽打」類似嘅說話，而我係打得最嚴重嗰個。 我當然唔會同意佢嘅教育方式，我亦都覺得佢嘅思維係比較扭曲，但係我可以理解，因為佢就係喺一個咁樣嘅環境下長大。
我家姐亦都係一個讀書好叻嘅人，而我細佬就因為係男仔同埋佢細個。所以我好多時候，我唔做家務佢會鬧我，但係未必會鬧佢哋。
好好彩地我冇情緒病或者精神病，但係正正因為佢嘅教育方式同埋我細個又係小學度被人欺凌，我都係要keep住見社工同埋心理成長嗰方面都唔係話好健康。 係初中嘅時候我都有好多好似你嘅諗法，我會好想可以試唔同嘅方法去令到我同佢嘅關係好啲或者避免佢鬧我嘅情況出現。 而去到高中我開始意識到上面嘅嘢，同埋明白到即使盡曬所有辦法都改變唔到佢哋嘅時候， 我就暫時放棄咗所有去改變我哋關係嘅方法。 因為我覺得更加重要嘅係令到自己變得更好。
當然你未試過好多方法去改善你哋關係都可以繼續試下。我覺得無傷大雅嘅事情你可以繼續順佢意，但係如果係認真嘅事你要堅持。如果唔係好重要嘅事情就盡量忍下，鬧交係要避免而唔係杜絕，因為你唔可以冇咗自己嘅原則。
如果你真係試曬所有嘅方法都唔得，你就要改變自己嘅諗法。試諗下呢個人生係你嘅，如果你不停咁浪費時間去執著於佢哋咁樣對你，你只會浪費緊你人生嘅時間，唔係浪費緊佢哋嘅時間。咁倒不如放啲時間令自己變得更加好，睇多幾本書、溫多陣書或者玩下手機放鬆下，都更加有用。當你開始覺得為自己嘅未來做多一樣嘢係更加重要嘅時候，可能係預備自己搬出去或者經濟獨立……你就唔會咁執著於關係唔好呢個問題。反而溝通上就會多咗份輕鬆 ，自己睇開咗就唔會覺得呢份關係係咁緊張，亦都唔會咁辛苦。呢個係我自己嘅諗法，希望明啦🤣
帶返個頭盔先，呢一個方法唔一定個個都啱用。但係無論如何令到自己更加好、改變未來呢一個諗法 對嗰個方面都有好處🤣🤣
好似有啲太認真但係真心想幫下你🤣