#NSS個人
[guest] 多謝admin出post，是咁的，小妹F2，2歲開始有濕疹，唔算嚴重，但係一病發就好辛苦，亦都搞到我份人好自卑，識唔到好多朋友，老實講我自己都唔知點樣捱到宜家。
最近就因為疫情要喺屋企上網課，頭嗰幾日都冇咩事，之後嗰幾日無啦啦嚟料，成塊面同頸又紅又乾，勁痕，唔知係咪因為冇出街，少咗郁同曬太陽，令到啲抵抗力差咗？我係咁R塊面同頸，搞到甩晒皮流晒血(如果你喺度食緊嘢，同你講聲sorry)，阿媽叫我忍手，但係真係好痕，忍唔到。到夜晚沖完涼，臨瞓之前搽咗啲cream，但係似乎冇咩作用，仲好似越嚟越痕，瞓唔到覺。
呢個情況持續咗幾日，終於好咗啲，我仲好開心，點知原來係玩9我，過冇耐又嚟料，仲要嚴重咗。就係咁樣，我宜家日日都比個病玩，恐怖到連簡單嘅食嘢、瞓覺都做唔到，一郁就痛，一瞓就痕，日日都過住好似比火燒、比蟻躝嘅生活，生不如死咁，已經用盡所有方法，戒口、飲去濕茶、浸鹽水…仲有好多唔講晒出嚟，但係通通都冇用，我真係就嚟精神崩潰。
有一次仲要聽到阿媽喺度自責，話「點解生到我咁樣」、「阿媽對你唔住」嗰啲…我嗰下勁心痛，匿埋喺間房到喊咗好耐，覺得自己好冇用。其實我究竟做錯咗啲咩，我淨係想做返個正常人，過正常人嘅生活姐，我真係好驚有一日會頂唔順，走去做傻事…
唔好以為濕疹痕兩嘢咁簡單，嚴重起上嚟真係可以將你嘅身心玩殘…
如果大家有方法可以舒緩或治療濕疹嘅話，可以comment話比我知，麻煩大家了🙏❤️最後祝大家身體健康、遠離病毒❤️