我有一個鍾意咗五年friend（我同佢都係女）。每次佢同我一齊，我都好幸福。但係佢人緣好好，所以我好努力咁想做佢比較close嘅friend。經過咁多年之後我同佢終於close 咗啲，成日會約出嚟玩。
上年f4復課之後，佢話好掛住我，然後日日放學都去我班房等我，同一齊我等巴士，搭成粒鐘車返港島。 但係經過一段時間之後，佢就冇再約我，而係同咗另一個friend一齊返學放學。有時見到佢同佢班friend經過，佢會同佢地有講有笑，然後扮見唔到我直接行過。佢唔再搵我傾計，又唔再約我出街。嗰一排，我好妒忌佢啲friend，仲會想佢哋快啲絕交。慢慢咁，我發現原來我喺佢心目中唔係特別嘅，而係可以好容易被取代。原來佢只不過想人陪佢，而嗰個人係邊個都冇所謂，一直都係我自作多情。
諗起之前f3揀科嗰陣，我雖然最憎理科，但係因為佢一句想讀phy，就日日補習，最後終於揀咗同佢一樣嘅理科electives。之前參加嗰啲樂團同club我都覺得好無聊，但係每次佢囈我，我就會心軟陪佢一齊join。原來我之前嘅生活都係圍住佢打轉，根本冇一樣嘢係我鍾意嘅。我發現咗原來我係咁容易被取代嘅時候，我決定唔再以佢為中心。於是我唔再搵佢傾計，但係佢又會dm返我，雖然我已經hea覆佢，不過冇用，同埋我成日都會諗起關於佢嘅嘢。我應該點樣先可以放低佢？