#NSS學業
[GUEST ] 希望admin po ig 🙇🏻♀️
小妺今年中五，一直以黎都好想去外國留學，好想大學去到另一個地方，體驗當地文化，住大學宿舍，交到世界各地嘅朋友。
我屋企算係中層，之前佢哋有上網了解過留學費用並表示佢地接受到，但唔知點解佢哋對我出國呢件事又好似唔太支持。
首先講我媽，之前我有小小表示過我大學想去留學佢都話ok，但最近，隨住我離讀大學嘅年紀越嚟越近，只要我一提到出國佢就發脾氣，話我會唔識照顧自己，我嘅性格唔適合留學等等，覺得我年紀輕輕就想離開屋企人…
而我爸就相對較支持，話我對未來有計劃係好事，仲叫我上網留意下心水嘅大學，但呢排佢又改口話到時睇我入到香港邊間大學先算。
最近佢就話如果我入唔到三大就比我出國，而就我目前成績黎講，我班主任講話我入到三大機會好大。講真聽到呢句話時，我心中諗到嘅第一件事竟然係dse 特登考衰啲，我自己都被自己嘅諗法嚇親，之後立即打消呢個諗頭。
其實如果屋企人係有咩原因唔想比我留學，我都會完全接受，但而家衰就衰係佢哋一時時改變佢哋嘅態度，搞到我都唔知點算好，我又唔敢當面同佢地傾。
我真係好想去留學，最近身邊都有好多朋友陸續出咗國，我真係好羨慕佢地，羨慕佢哋可以喺外國讀中學，然後入返當地一間好嘅大學，而我就要留喺香港讀dse，連未來讀邊間都唔知。
自問我呢幾年都好努力讀書，目的就係想去外國讀一間好嘅大學，可惜而家成績卻要變成留喺香港讀😞