#NSS學校
[GUESS] 希望可以借呢個page,分享一下我嘅經歷,可能會比較沉重🙇🏿♀️🙇🏿♀️(文長
”
事情就係咁，系我小學五年級嘅時候，成績係好個批。同班有個女仔成績比較差，但人緣好好，到依家我都唔清楚係咩原因，係班上面講我嘅壞話，話我有自閉症，考試作弊，性格有問題所以先冇人同我玩等等…導致我小學嘅時候就冇乜朋友，得一個最熟嘅朋友。
因為呢件事，六年級既呈分試考得好差，最後同個個女仔入左同一間band2嘅中學
”
我以為去到中學，就可以無事發生。
however係我諗得太好，由f1直到f2，bully問題越黎越嚴重。
例如返到學校，會見到櫃桶會有紙條寫住：「你條仆街，最好同我小心啲，唔係既話就同佢地講你做雞。」
又會系網上開ig story或者係開直播講我嘅壞話：「xxx佢呀，小學為左個呈分試作弊喎，死賤利，俾人揭發左，依家抵死讀唔到xxxx中學啦」
或者係，會跟住我去廁所，趁我出黎個陣就扯我頭髮。
有一次係上完體育堂，上返課室，見到佢地準備偷我銀包，但係我入到班房見到，佢地就即刻走左。
”
我有試過同老師講，老師捉左佢地鬧幾句就放左佢地走。
但係咁樣，反而令佢更加憎我，做左更加出格嘅行為：冬天嘅時候偷走左我件校服嘅大褸。
冬天個陣，淨係著住校服+冷衫，屋企人話唔好咁快買新褸住，話唔定會搵得返。但係搵左好耐都搵唔返，我就問屋企人拎錢買左件新嘅。
直到冬天完左，佢先俾返件大褸我，講左句：「唔好意思喎，我以為件褸我嘅添。」
”
我承受唔住，最後轉左校。因為個陣係全級第3既關係，轉到一間band1嘅中學。
去到依家讀緊嘅中學好開心。呢度嘅同學好好，我冇再受到啲唔公平嘅對待。
雖然係呢度好開心，但係因為小學既事情，我患上左抑鬱症，要定期睇醫生同食藥。
”
今年1月個陣，小學搞左個聚會，小學同我最熟嘅朋友邀請我去，所以我就去左。
去到個度，之前欺凌我個個女仔同我道歉，寫左張道歉卡。
but 咁又如何？事情都發生左，你係想求原諒，消除內疚感定係點，我唔清楚。
我靜係想講，你必須要承受一輩子既內疚同後悔。
憑咩，一句道歉，就可以當無事發生過，重新黎過？
咁我承受既傷害，係咪又可以抹清，即刻痊癒？
”
希望睇到我呢篇文嘅人，特別係遭受同樣遭遇嘅人，甚至更嚴重。你地要好好振作，如果情緒成日好壓抑，搵專業人士傾。你地無做錯事，你地好堅強，承受左咁耐。一直以黎辛苦晒。
當你迷茫，傷心或者有任何情緒，我或許唔識你地，但會一直陪伴，共同成長，走出陰影。
會寫呢篇文係因為，身邊有朋友都遭受緊欺凌，但係同佢唔同學校，無能為力。希望你睇到呢篇文，會感覺到好多人都支持緊你，you are not alone.