#NSS家庭
[Guest] 長文，求admin po 🥺5.1.2021 05:40 我啱啱發夢喊醒。我夢見我嫲嫲突然喺屋企走出去，無啦啦同我講「有你呢個孫女，係我呢世最大嘅救贖」我呆咗，然後佢係我呆緊嗰時，跑咗去樓梯嗰到，我擔心佢跌到，就跟住佢，唔知點解佢行得超快，我點跑都追唔上。行多幾層後，佢喺樓梯執到個BB仔，好開心咁話「係我孫女呀！」，然後佢就走咗出樓梯口嗰門，我又跟住佢，一打開個門，轉眼間，見到嫲嫲仲係黑頭髮嗰陣（即係年輕時），佢笑住抱住我阿爸Or姑媽Or阿叔BB仔嗰陣（我唔係好清楚），我呆咗一陣。
咁我唔理三七二十一，繼續向前追，諗住帶佢返屋企，一走出樓梯，我見返白頭髮嘅啊嫲，佢左手攞住咗係樓梯執到嗰個BB，我一上前，捉住佢隻手，佢即刻暈低咗，跌咗落地，我拉佢起身，拉極都唔夠力，然後就喊醒咗。
我知成篇文係好莫名奇妙，呢個夢中其實我成個人都超緊急，但我文字上表達唔到，但我真係好想好想記錄低佢。事實上，我啊嫲而家係護老院，我已經幾個月冇見佢，記得細個時，我日日上啊嫲屋企食飯，事因自己屋企冇人，但後來我大陸嘅公公落咗嚟照顧我同阿哥，所以都好少上去搵阿嫲。以前阿媽成日都叫我多D上去搵嫲嫲，但我太懶，每次都「下次先啦，今日唔得閒」，但⋯依家想見都冇得見，我好驚有一日佢離開我。
我家庭唔美好，可以話嗰個都cls ，但我阿嫲真係唯一一個善良既人，係我不幸中嘅家庭裏，得佢畀我知道咩係溫暖，所以我愛你，多謝你，對唔住你，世界上最好嘅人，阿嫲。