#NSS個人
[GUEST] [ Admin Po IG please 🙏🏻 ]
純發泄 長文慎入 第一次投稿 可能有錯字 大家吊得細力啲
簡單介紹下自己先，今年初中，暫時嚟講屋企人都滿意我嘅成績，但係我就覺得我嘅進步空間仲有好多好多，有好多嘢都做得唔夠好。
唔知點解幾年前開始，情緒一直都好低落，好想發泄出嚟但係有唔知可以同邊個講，每次都鬱喺心入面，好唔舒服。直到有一日，我真係好辛苦，於是就開始咗用啲傷害自己嘅方法，去令自己好受啲。可能我有小小憂鬱症，不過唔知啦，就算真係有我都唔會同屋企人講，唔想成為佢哋嘅負擔。
雖然我屋企唔算有錢，但係我屋企人對我好好，好錫我，我都覺得自己好幸福 。我只係覺得我好似少咗啲私人空間，有時候真係透唔到氣。屋企得三百幾呎，三個人住，兩房一廳，而我由細到大都係同我呀媽同床訓。間房好細，一眼見哂，淨係擺得落張雙人床，一個衣櫃同啲雜物櫃。所以我一直以嚟嘅活動範圍都係得客廳個張摺枱，食飯，做功課，上堂都係喺嗰度。有時上緊堂嗰陣屋企人都會喺我附近行嚟行去，不過我都無乜所謂嘅，始終屋企係得咁大地方，我無理由控制佢哋嘅一舉一動㗎嘛。佢哋唔比我自己出街，擔心我，咁我都明白嘅，所以我都無再提起關於嚟方面嘅事。係喺佢哋面前，我又唔會分享一啲好負面嘅情緒，變咗好多嘢都係收收埋埋，費事佢哋擔心。
好多時都係關於學業，又或者係屋企嘅問題而令到我唔開心。可能媽媽係比較情緒化，有時會將一啲原本好少嘅問題化大，所以間唔中都會同爸爸嘈交。而我由細到大都無同媽媽嗌過交，因為我每一次比佢話嗰陣都唔會應嘴，只會靜靜地坐喺度比佢鬧完就算，我亦都唔會嬲佢，因為佢始終係我媽媽，比佢話幾句又有咩所謂喎。雖然有時佢都會無意中傷害到我，咁我就會匿入廁所，細細聲喊完先出返嚟，再當無事發生過。咁樣我係會好辛苦，不過我都慣咗啦，咁多年嚟都係咁，無乜嘢嘅。
而讀書方面，自問我都唔算好勤力，考試期間最多都只係一日溫十幾個鐘，有時不在狀態可能記極都記唔入腦，開始攰但係又唔可以頹，嗰段時間真係好難捱。媽媽其實都好關心我，佢話如果我真係好大壓力，可以轉校，佢會支持我。前幾日我好認真咁問自己，我讀書有無壓力。我問咗自己三次，三次我心入面個答案都係無，我頂得順，但係事實我啲眼淚流哂出嚟，想停都停唔到。我知我喺度呃緊自己，但係我真係唔想轉校。我係蠢，不過我相信只要我肯努力啲，絕對有可能跟得上。去到邊間學校讀書都一定會有壓力，我唔想因為我少少嘅辛苦，而令到屋企人幫我搞咁多嘢，嘥錢買過哂啲書簿同校服嘅。
有時我喺度諗，如果無我嘅出現，爸爸媽媽會唔會好幸福咁生活緊呢？無哂啲金錢嘅煩惱，又唔洗為我而產生摩擦，咁唔係好啲咩？我嘅出現好似破壞咗佢哋嘅關係。不過依家諗呢啲嘢已經無用，始終唔應該出現嘅我已經存在咗喺呢個世界上面，呢個係事實，亦都改變唔到。前幾日我用錯力，唔小心介（出唔到正字）到手指，啲血流咗出嚟，無啦啦令我諗通咗啲嘢。可能我嘅抗壓能力真係有啲低，唔開心又搵唔到適當嘅方法解決，搞到成個人好似呀愁咁。所以我決定定咗，以後都唔會再做啲傷害自己嘅事，諗嘢盡量正面啲。
如果你今日過得唔開心，比人冤枉，比人鬧，咩都好。如果你想做啲傷害自己嘅事，停一停，諗一諗先 ，你一但試咗一次，你可能呢一世都改唔返呢個習慣。你傷害自己，唔係想令你嘅存在感高啲，而係你覺得無人明白你，所以想搵方法嚟令你好過啲。但係呢個唔係一個好嘅方法，亦都唔係唯一嘅方法。每個人都會做錯事，呢個唔係一個大問題，最緊要係你識得改返啱。與其你搵方法嚟懲罰你自己，不如諗下點樣令你自己進步。你唔需要為咗呢啲咁小嘅事嚟令自己過得咁唔開心，其實身邊有好多人好愛你，諗嘢正面啲，以後嘅日子仲有好長㗎。加油！
Sorry for 1999
願大家今日快樂