GUEST

#NSS愛情

[GUEST] 大家好，小弟第一次投稿，希望比過，文筆唔好請大家多多包涵。
今日想講我一個好重要既人，係四年前既夏天，我遇到佢，佢係第一個令我有所謂一見鍾情，想要為佢付出既人，之前遇到既女仔，從來冇過，所以以前從來冇拍過拖。兜兜轉轉，我同佢係埋左一起，中間唔係一般我花時間追佢，後來佢接受個種，系有好多意外因素，呢到就唔多講，所以能夠一起我都好慶幸。
佢係一個好好女仔，即使佢依家唔係我女朋友，我都一樣係咁讚佢。佢從來唔會洗我錢，那怕俾個suprise佢既唇膏都比佢話一餐，肯陪我食貼地野平價野，好有愛心，經常義工義教，仲要非常孝順。
我自己就係一個老派既人，自問唔太識浪漫，但我都真係會為左佢肯學，當然唔係佢開口講，係我自己想變得更好黎襯佢，從打扮，影相，計畫，細節等等一一學習同改善，到依家有時同小學同學聚會都會比佢地話好紳士feel，其實都係多得佢令我改變。我係一個好專情專一既男仔，所以我咁耐以黎只有同佢拍過拖，我亦都希望能夠同佢一齊落去到白頭。之後我地一齊熬過dse，小弟成績唔好去左大專，佢都冇離開我鼓勵我入番U，自己都有下定決心做到成績比佢睇。
以上就係大概經過，中間我省略一d。一直以來我地相處都好開心好甜蜜，佢從來都唔會話我點樣點樣唔好，雖然間唔中有口角，但我覺得係磨合既必要元素，我地每次都好快好番冷靜番，佢係真係一個好好既女仔絕對唔係大家印象中既港女，幾時我都係咁讚佢嘎啦。
直到疫情發生，我地相聚既時間可以話大大縮到幾近乎冇，加上佢屋企都好注重衛生所以就更加少機會見面，可能因為咁，突然有一日佢同我講，我好似冇以前咁愛你，呢個簡直就係當頭一棍，因為我自己即使係呢種情況，我對佢既愛都未曾減退，一直視佢為終生伴侶，可能大家會話我傻，仲咁後生，但我都話過啦，我係一個老派人，一係唔愛，一愛就到底，好大因素因為屋企環境影響，所以我對情睇得好重。當然呢樣對我打擊好大，但我都冇怪佢，心入面覺得都係因為d蝙蝠累事，心諗等疫情快過就一天都光曬，我都係同佢咁講，但佢就之後開始冷淡，雖然有覆但真係feel到變曬。我開始好驚。
直到有一日佢話，不如我地分開下，個刻我真係體會到咩叫心如刀割，當然我知唔怪得佢，自己唔識做，做得冇人咁好，自然女仔就失去興趣熱情，我都盡力挽留，但都係徒勞，佢似乎都係下定左好大決心。佢話緣份好難講可能之後會再相見。我都同自己講我會變得更好再去搵佢。
頭先我都話啦，我係一個老派人，所以聽既歌自然大部分都係老d八九十年代既，張國榮個d，依家個d唔係唔聽只係比較冇咁喜歡。唔知各位大佬識唔識周華健，佢有好多首歌真係推薦聽下，不過如果唔感興趣都唔緊要，我明呢d野係好主觀，只係好野同大家分享下。我想講就係以前聽佢既歌都冇咁有共鳴，依家聽簡直就覺得係寫緊我自己咁，令到我每次聽到都會諗起以往段日子，再諗到依家心頭會隱隱作痛，我係真係好唔捨得，我好希望當初我地一齊走過，好希望會重逢。我同佢一齊，佢令我開心，會令我擔心，走既一刻更加深刻—《讓我歡喜讓我憂》，以前我地會話只要聽到某一首歌就係諗起我地—《有沒有一首歌會讓你想起我》，到我地最後一次以男女朋友身份對話，我好唔想放手盡力挽留—《其實不想走》。仲有小弟最鍾意既王傑，以前聽會覺得好型啊浪子，依家聽終於體會到佢唱既歌講緊乜，真係每一隻字都有感覺有共鳴。仲有好多好多個個年代既好歌大家有機會真係聽下。
各位，呢篇文主要今日都係想同大家分享下，有d野抑壓係心真係唔舒服，依家打左出黎係有舒服ddd咁多，我想講就係作為一個老派人，一個重情既人，有時真係想問一聲點解，點解專情修唔成正果？花心就有人會跪係到求，唔通真係唔壞唔愛？點解痴心換唔到情深？不浪漫真係罪名？不過我唔會怪你，畢竟你係一個好好既女仔，自己都知自己不足。我會裝備好自己，等我變得更好再來搵你，希望個一日會到，希望你會願意等我。
最後講比睇到黎呢到既朋友，多謝你地睇我篇野到最後。

圖Link: