#NSS家庭
[OLC] ——長文慎慎入———
因為見到之前有個post同我嘅經歷都係非常非常相似 所以都想投稿講下，發洩下。（係關於好憎阿媽男朋友個個post）（sorly for 199999999）
我已經對著條友將近10年，由小學p3就已經開始同阿媽同居（利申佢自己本身有個仔但係一個月先見唔夠一兩次 同埋佢個仔係俾咗佢個阿媽湊🙃）。佢日日收工返到屋企就會開大把聲講野，好似喉嚨裝咗個喇叭咁款，食煙飲酒樣樣齊曬，賭馬賭波一件不漏，每個禮拜嘅星期三日就會係我嘅地獄。如果佢係愛我阿媽好自然都唔會咁討厭，但係佢所謂嘅「愛」只係金錢上嘅「愛」，日日食飯就會就會係到講自己有幾勁有幾巴閉有幾多「靚」😀就黎連老闆都要做佢條「靚」。次次同檯食飯，有時候都會想同阿媽分享下學校發生咩事，但係佢就一輪嘴講曬，好似會唔斷氣咁。有一次係阿媽問我今日返學點樣，我已經係講緊嘅時候，佢就係到「欸 欸 欸」完全係打斷我講野，我都想再三同阿媽講嘢，但係完全冇機會，我就直接索性唔講嘆左口氣（畢竟細個都冇嘢可以可以反抗）阿媽都察覺到我唔對路，即刻對著佢「嘖」咗聲，但係佢都繼續講，講完之後就收咗聲。我個下已經火燒心真係想一巴車落去。阿媽都冇理佢，就係到問返我點樣，我已經完全唔想回應就答咗句「唔講啊」阿媽就係咁話「講啦講啦」我已經冇理到佢，我知我咁樣嘅態度真係唔好，但係我都已經冇心情再講嘢。其實呢個都只係其中一件小事，但係只要同佢同檯食飯我就會唔講野，淨係會睇電話。雖然真係會好尷尬，但係我覺得呢個做法已經係我唯一可以做嘅嘢。導致我有時可能親戚上我屋企食飯，佢地有講有笑我都只會係側邊唔會講嘢，默默扒飯。有啲親戚就會問我「點解唔出聲啊」講真我都真係唔知要點答，所以我都只會係笑笑口答返「冇嘢啊 我今日有啲攰咋嘛」有時候食完飯都會一齊傾下計，但係我通常會返入房，因為我都真係唔知有乜好參與。但其實我有時都會聽到啲親戚問我阿公（利申我同阿公同住的）「做咩啊點解好似咁唔開心咁」阿公就會話「平時食飯都係咁㗎啦 自從個個人黎咗就變成咁 平時個個人唔係到就會好多野講。」雖然大個咗之後我都已經改變好多，但係只要同檯食飯就唔會講嘢。
我仲好記得自從2021年嘅初二因為新年打麻雀開齋，啲親戚都係當面鬧交（本身啲親戚已經好唔鍾意佢）。然後佢就話要分開住，我不知幾開心，隨即因為搬屋加上阿媽個邊嘅親戚完全冇一個鍾意佢 見面就係鬧交 所以有一排就冇再見到佢而家已經18歲就終於唔使成日係屋企見到佢。但係因為我阿公係3月頭入左醫院，佢上黎嘅次數又開始多咗，同埋會直接係屋企過夜，所以一切都等於係打回原形…我今年都係dser，我唔知點解佢好似好「關心」我嘅「前途」。係2022除三個陣，佢帶咗個班「靚」上我屋企拜年兼（我覺得）黎拆天。佢係夜晚冇啦啦敲我房門（我會覺得係我工人姐姐或者阿媽敲 因為佢唔會突然入黎）我開門個下我已經知道我已經煞唔切車，佢入到黎閂埋門同我講關於「前途」嘅嘢。我個下好崩潰，我一直係whatsapp同阿媽講「想點？點解入黎？喂？」我可以講呢啲詞語係我第一次對著阿媽講。我個陣真係好想喊，淨係好想佢出返去唔好再打擾我。然後我阿媽就係whatsapp同我講返「我代佢道歉」我果下真係好心噏，其實做錯嘅根本唔係我阿媽，我唔明點解阿媽要代佢道歉。
本身已經好需要一個好安靜嘅環境，但係佢晚晚放工返黎，首先開大佢喉嚨個喇叭，再開埋電視個個喇叭，同埋仲要開埋佢手機個個喇叭。因為佢係大陸人所以會睇抖音，真係想講佢係非常嘅噪音滋擾，好似聾咁款，一定要將嘅speaker開到100%先聽（有時仲要聽唔到…😀）已經係經常提醒但係都好似當聽唔到咁，我同工人姐姐都已經覺得好厭倦……
因為我本身都係出身於單身家庭，自細已經冇左老豆，阿媽要一手湊大我，都真係唔易。同埋有邊個女人會係想受寡一世，所以佢搵第二個我絕對明白。但係我真係唔明點解阿媽會搵埋呢啲咁冇素質嘅人（再利申本身阿媽唔係一啲會搵埋素質 但係經過我以上所述就知道佢係一個幾冇素質嘅人）其實我到而家都唔知點解會搵佢，我都心平氣和當係同朋友傾計咁同阿媽講。好老實講我唔係唔想用呢一個態度去對著佢，只係我覺得我用唔到平時對待friend嘅態度對待佢。
唔知有幾多人可能會有相同經歷，雖然真係冇乜嘢好做或者反抗，但係我覺得最緊要係心平氣和同自己親嘅嗰邊溝通下，但係又唔好每次一傾總係不歡而散。希望大家早日居住開心。🥺🫶🏻❤️
順便想係到reply返個個樓主（#NSS220423J）：建議有能力嘅就多啲出街食飯（尤其是而家堂食已開放）避免見到佢 返到屋企就直接入房 大家經歷都係差唔多🥹（俾你一個big hug）大家都係因為阿媽嘅感受先講對佢感覺一般🥲完全明你感受…