#NSS愛情
[GUEST] 諗咗好耐，最後都係決定投稿，當比個機會自己，真真正正放低你…
12年啦，咁就識咗你12年，亦都鍾意咗你12年。由小一開始，我哋永遠係班入面成績最好嗰兩個，但你就永遠考第一，亦都因為咁，你引起到我嘅注意，我自尊心太強，接受唔到有人叻過我（依家諗返都覺得自己好好笑），嗰陣時唔太鍾意你。但可能大家諗嘅嘢差唔多，我哋好快就frd咗。到小二嘅時候，我記得有日你跌咗嘢落地下，我屎窟痕捐埋落枱底陪你執，你無啦啦錫咗我一啖，我呆咗係度，你就再錫多次埋嚟。我哋嗰時係度笑，我嗰刻覺得係frd kiss（我諗你一直都係咁諗）。但唔知由幾時開始，我會不期然咁諗起你錫埋嚟嗰下，我先發覺原來我鍾意咗你。。。
我一直唔敢做任何野，我驚我哋連朋友都冇得做。直到小五嗰年，我阿媽係我唔知情嘅情況下幫我同學校申請調去精英班度讀，想我考好個程分試。我已經唔太記得你知道我調班嗰時嘅反應，因為我嗰陣都好down。但由嗰日開始，唔知點解我同你好似疏遠咗咁，小息同自己班嘅人玩，lunch係自己班房食，好似突然間冇晒交集咁。唯獨同你係咁…
冇幾耐，我最好嘅朋友走嚟同我講話佢鍾意咗你，問我可以點追你。我真係唔識比反應，我哋幾個嗰陣一齊玩，我都無發現佢鍾意你。再之後，可能因為你哋仲係同班，好快就一齊咗。我嗰時真係好唔開心，個心哽住哽住咁，我上佢屋企度玩，佢show比我睇你送比佢嘅野，嗰刻我真係想同佢講我同你都錫過。最後我都忍住咗，淨係講咗句咁咪幾好…
後來大家升咗去唔同嘅中學，我知你同佢散咗，但我都唔敢同你講任何野。我哋嘅關係好似係我調班嗰日起就疏遠咗，我唔再識點同你傾計。因為我同佢升咗上同一間中學，你有日無啦啦wts我，我真係好開心，但當我見到你係問我關於佢嘅嘢嗰陣，我個心真係揦住痛。但我知道我冇資格講任何嘢，因為我連最基本嘅表白都冇做到。
其實中學呢6年我都有遇過其他鍾意嘅人，亦有人同我表白過，但全部都冇開始過。我啲frd都有問我點解唔試吓，唔好再做A0，我淨係講咗句寧缺勿濫，但我知道因為喺我心入面你一直都有個位置喺度。
12年啦，我真係冇諗過自己會鍾意咗你咁耐，中學生都叫puppy love啦，更何況小學？我聽佢講你去咗外國讀大學，佢留咗係香港，而我亦都已經移咗民（冇諗過我哋三個會各散東西）。無論之後你留低係嗰邊做嘢，抑或返嚟香港，我諗我哋呢一世都唔會再見。其實我應該一早醒覺我哋根本冇可能，因為我媽好反對同性戀（故事入面所有人都係女仔），亦因為咁，我一直唔敢同你表白，我唔想比人知我鍾意女仔。
我依家year 1啦，去咗新嘅地方，亦都希望有新嘅開始。點都好，我真心多謝你教識我乜嘢叫愛情，但呢個世界冇咁多童話故事。希望你遇到自己鍾意嘅人，生活得開開心心。