#NSS個人
[GUEST] 覺得自己好無用，好鐘意亂諗嘢，影響到睡眠質素。或者我係個唔識感恩嘅人，屋企人好錫我，屋企又唔算好窮，要乜有乜，大把人慘過我，佢地都好努力咁生存，點解我仲要為小事怨天尤人？
我份人好自卑，無乜自信心，驚驚青青。以前屋企人成日鬧我打我，細佬又聰明過我，牙尖嘴利，啲長輩好鐘意佢，我成日會同細佬、同學比較，覺得自己又蠢又鈍又唔靚，咩都做唔好。
雖然係咁，我都好想讀大學完成自己嘅夢想，我想讀嗰科好講天份，但係我依然認為熱誠兼努力可以解決所有問題，直至識多咗所謂嘅勁人，發現我依種諗法實在太天真。
我算係一個獨行俠，鐘意同人交流，尤其係大過我嘅人，每次嘅交流都會有得著，但唔習慣同外人交心，信得過嘅人永遠只有自己。以前我都好鐘意埋堆，但漸漸覺得應酬人好攰，寧願一個人靜靜地做自己嘢。
當一個人對住四埲牆，就會不斷諗好多無謂嘢。我曾經問過自己，幾時可以休息下，唔再亂諗嘢折磨自己？又幻想過十幾歲嘅煩惱咁濕碎都咁多嘢諗，出到嚟社會做嘢點算？成日有種難以形容嘅空虛感，生理加心理上嘅攰令我覺得做人好攰好辛苦。
最後想同今年考dse嘅同學講聲共勉之，直入A1!!
純發洩 sor for 1999