香城中學

#NSS愛情

[香城中學] #nss愛情
近排，小妹見到nss出現咗指責交通迷嘅言論。當然，有唔少嘅講法都係以偏概全，並唔係反映事實嘅全部。有見及此，小妹想講下關於我同一個巴迷男友嘅相處經歷。🙇‍♀️(以下主要用愛情嘅角度去講呢件事)

首先，我必須承認，呢篇文章會有失實嘅情況，畢竟「情人眼中出西施」。請容許我交代一下呢段戀情背景。小妹本身係一個鍾意攝影嘅人，所以搭交通工具嘅時候都會影相，但係小妹並沒有特別迷上一種交通工具。機緣巧合之下認識咗宜家嘅男朋友。佢係一名巴膠，細細個就鍾意巴士，有時會遊愛線，有時會追愛車。

入正題，我先講下識到一個巴膠/交通迷嘅男朋友/普通朋友有咩好處。(以下落嚟講嘅好處都唔一定代表曬所有嘅交通迷)

第一，以後都冇迷路嘅煩惱
作為交通迷，佢地對於香港嘅交通非常熟悉。小妹係一個路癡，基本上淨係識番學放學嘅路。當我認識咗宜家嘅男朋友之後，小妹會陪佢一齊遊車河，佢又會介紹下香港嘅地方。就係因為咁，小妹對於香港嘅認識多咗，自然就少咗迷路嘅事件發生。

第二，擁有強烈嘅安全感
一段戀愛關係入面，承諾係好重要嘅一環。唔少人都可能經歷過另一半出軌嘅情況，但係我覺得識咗個巴迷男朋友就唔會有呢種情況發生。首先，一個巴膠可以咁堅持自己嘅愛車愛線幾十年，就證明咗佢地專一嘅一面。其次，巴迷會利用空閒時間追巴士，外出認識其人，繼而出軌嘅情況都唔會出現。

第三，令我性格改變咗好多
睇到呢度，你可能會覺得我同巴迷/交通迷相處耐咗，會好似佢地咁“傻仔”。但係小妹我係強烈反對呢個睇法！小妹本身係一個直升機家長照顧出嚟嘅港孩，真係好少會同陌生人講“唔該”，“多謝”。但係識咗巴膠男朋友之後，見到佢每次搭巴士都會講句“唔該師傅”。的確，小妹一開頭都聽唔慣，但係時間耐咗之後，就開始覺得巴膠都係一班幾有禮貌同埋有風度嘅人。試問一句，宜家會有幾多人對於服務行業表達寫意呢？小妹宜家買外賣嘅時候都會嘗試同店員講聲唔該，(雖然好細聲….我好細膽)識咗巴膠男朋友之後，我感覺自己比一齊嘅我禮貌咗。

最後，「樹大有枯枝」，小妹相信前幾篇嘅投稿人都係咁啱遇到巴敗，不過，我希望你哋可以好好尊重一下佢地嘅興趣。例如， 你係一個追星/鍾意某卡通人物嘅人，你都唔會想自己鍾意嘅明星/卡通人物畀身邊嘅人說三道四。同時，小妹都希望嗰位投稿者唔好將自己對於巴迷嘅偏見，推理到所有巴迷都係咁，亦唔好隨便將過錯嫁禍畀任何交通迷。

🙇‍♀️好感激各位睇完小妹呢篇文，好希望各位唔好再討論，以免有不斷投稿banding嘅情況再出現。
小妹都非常感激各位admins，辛苦曬你哋啦，希望你哋可以post去ig。(我今次冇寫到敏感字眼，希望你哋唔會被ban)