#NSS學業
[[GUEST]] 希望admin可以post我，唔該曬，麻煩曬admin。
小妹f.2，最近憂慮同擔心緊揀科上嘅問題。可能你會話而家你先仲f.2咋嘛，唔使咁快諗揀科嗰啲嘢啦。我明白我而家先f.2，揀科呢樣嘢對於我嚟講係言之尚早，但係唔知點解唔諗，我就唔安樂，好冇安全感，好想計劃好一切。好擔心好擔心第時入唔到自己想揀嘅科。
我嗰間學校每一級有四班。f.4開始分精英班，C/D班係精英班，呢兩班嘅學習氣氛比較活躍，C/D偏向理科班，教呢兩班嘅老師亦教得非常之好，呢兩班嘅老師唔會有啲係懶又或者hea教嘅老師。相反A/B班 學習風氣就冇咁活躍，雖然競爭壓力冇咁大，但係教呢兩班嘅老師都比較參差，唔可以話教得好，甚至有啲教呢兩班嘅老師係好懶，甚至根本就唔係老師嘅材料，學校唔炒佢係因為師資。
我哋學校一向都有個準則，揀M1嘅就會入C班，揀M2嘅就會入d班。唔揀M1或者M2基本上就一定入唔到C/D班，最終(冇揀M1/M2嘅人)就會自動分配去A或者B班。我嗰間學校曾經有老師講過，A/B班入大學嘅機會率比較低，講緊嘅係各(A/B)5/29。相反，兩班精英班入大學嘅機率比較高，講緊係各(C/D)25/29。所以咁多年嚟M1/M2呢兩科一直都好搶手。
但係問題就嚟啦，小妹數學係差到不得了，我而家啲數學程度基本上好似淨係得中一上學期咁樣，甚至分分鐘連(Maths)f.1嘅程度都冇。小妹原本唔係話鍾意亦都唔係話憎數學呢科，但係上到中學……um…我可能比較容受易老師影響，咁啱一入嚟就畀一個全校公認教數最廢嘅阿sir去教我哋嗰班，從此我就唔鍾意數學，亦都好憎嗰個阿sir。再加上因為疫情下，變咗冇實體堂，只可以online lessons，我變得更加懶，更加hea。遇到我唔鍾意嘅堂就好似數學咁，我係完全唔聽書，教到邊度我都唔知。途中我有好努力嘗試專心去上數學堂，但係我都唔明阿sir講啲乜嘢，個阿sir出咗名問非所答，所以我都唔搵阿sir，我去搵咗一啲學霸去求救。但係我冇理由有咩唔識就咁樣成日問嗰啲學霸，咁樣成日麻煩到人，自己都唔好意思….
我亦都有嘗試過去克服數學呢一科，但係我真係克服唔到..我是一見一堆數，我就會厭倦，真係會頭都暈埋。如果第時真係要揀M1/M2 先唔好講入到去會點，入唔入到去係另一個重點。因為如果係揀M1/M2，學校係會睇返學生嗰個數學成績排名，我而家嘅數學排名可以話係全級最尾嗰十個，試問我邊度仲有機會去可以入到M1/M2..？中途我有試過跟返書嘅example去做每一條數，做返書入面嘅練習，問題係我蠢到連書嘅example我都睇唔明，唔知點解佢會變成咁，唔明白點解佢要咁樣計，好多個點解點解點解喺我個腦浮現出嚟，跟住我就好想放棄，然而就一直咁樣惡性循環。
我覺得數學真係好難，但係一諗起而家嘅成績，再諗第時f.3要揀科，一定要揀到M1/M2先可以入到精英班，亦都代表入大學嘅機率比較大嘅時候，就好大壓力，好驚，好焦慮，好擔心…我唔知可以點做…其實我都想補習，但係無可奈何屋企經濟唔允許…請問有冇人可以畀到一啲建議或者方法令我可以改進或者去克服數學？
小妹而家最鍾意嘅就係中文,Hist同埋中史。本身自己第時想揀Hist同埋文學，但係我哋學校嘅Hist同埋文學係同一組，即係如果take文學就冇得take Hist, take Hist就冇得take文學。可能你會話咁你咪揀其他科囉。其實我而家IS成績都好差，而且對科學冇興趣。我上網查過f.3要學嘅phy chem bio 嘅syllabus，睇完真係冇興趣，所以我諗我應該唔會揀理科。至於商科，亦都真係冇興趣，始終有數字呢樣野，可能你會話唔驚，嗰啲數好簡單嘅啫，但係因為我未來想做嘅職業係一位中文老師，所以我冇打算要揀econ&bafs。咁講的話我只係淨返文科，我唔鍾意Geog，然後我就得返中史,Hist同埋文學揀，所以其實我嘅選擇亦都所淨無幾，咁樣刪除的話只係淨返中史同埋文學(而且做中文老師有個文學底子會比較好)。
自問自己都鍾意中史呢一科，雖然而家成績可能只係合格多啲，但係我相信勤力係勝過一切，正所謂皇天不負有心人。雖然我f.1係好憎中史呢科，我覺得中史呢一科全部都係死背，好悶。但係升到f.2莫名其妙我愛上咗呢一科，當佢故仔咁聽，發現其實原來都幾有趣，然後就好enjoy上中史堂。
我諗其實自己應該都係一個文科人，我比較擅長背誦，鍾意欣賞唔同嘅文章，了解歷史，但係我就驚升到高form應付唔到中史同埋文學呢兩科。我揀呢兩科可以話係我嘅興趣而選擇亦都係可以話我得番呢兩科選擇。我揀文學係因為我比較有興趣欣賞唔同作者嘅文章，同埋自己喜歡寫作，咁多科之中，中文嘅成績亦都係一科比較可觀，亦都係成績最好嘅一科，所以我想揀文學。
我知道呢兩科背嘅嘢唔係少，手速都一定要好快，我都驚自己上去搞唔掂，好驚成績一落千丈或者樣樣嘢都落後於人。而家好驚第時讀唔到中史同埋文學，可能係因為我成績未夠資格，所以入唔到。因為我f.1好憎中史呢一科，所以每一次嘅測驗幾乎稱得上嚟攞考，考試亦都唔合格，完全唔知個f.1中史學過啲乜嘢。我好驚咁樣如果第時真係揀咗中史，真係可以讀到呢科嘅話，會影響我第時讀中史嘅進度，原因係我冇打好個基礎。小妹亦都想問問有冇一啲係讀中史嘅人可以畀到啲方法或者建議畀小妹，點樣可以令到中史成績進步？
又或者文學方面 我知道好多都係文言文，但係我中文最弱嘅就係文言文… 請問有冇take文學嘅人可以畀啲方法或者建議畀小妹，其實你哋係點樣背曬28篇範文同埋點樣去打好閱讀文言文嘅基礎？
最後好多謝睇度呢度嘅你，多謝你嘅耐性同埋阻你寶貴嘅時間睇曬佢。麻煩曬咁多位。sorry for 1999🙇♀️