#NSS學業
[ccpass] 我今年Form2，喺一間旺角band2尾嘅學校讀書，我最近有轉校嘅想法。
因為小學係傳統名校，所以中一嘅時候成績好好😃但係form2下學期開始越嚟越冇心機讀，其中一個原因可能係長期喺屋企返學，而另外一個原因係我好唔鍾意我學校。學校有八成都係新移民，喺走廊行過基本上唔會聽到有廣東話，同學之間講嘢都係用普通話，我會同佢哋講不如講下廣東話，但係佢哋會話好難唔想講，令到我好冇歸屬感！
同埋學校老師冇心機教書亦都唔識教，真係識得叫你寫一式一樣嘅筆記，分量勁多，我本來有寫筆記嘅習慣，但學校安排咗佢哋自己安排好嘅筆記之後，我連寫自己筆記嘅時間都冇咗。
我有情緒問題，所以要見學校社工，我同佢講呢一個問題令到我好大壓力，我問佢可唔可以唔抄，會影印啲筆記嚟溫習，抄寫對於我嚟講冇用，我同社工講咗班主任冇心機教書，又要我哋喺短時間內寫大量筆記(一晚抄5至7頁，最嚴重11頁)可能班主任知道後不滿，針對咗我幾日，好多同學都睇得出。大概係呢啲原因令到我直情唔想返學，亦覺得呢間學校唔適合我。我嘅壓力來源唔係學校係咁逼我讀書，而係學校用一個錯而有冇用嘅方法夾硬逼我哋。
我雖然喺學校讀書好，但興趣喺藝術方面。中一加入咗英文話劇學會,同其他師姐一齊參加劇本寫作比賽，第一年就拎咗冠軍。今年老師安排咗兩個話劇比賽畀我做leader，我係演話劇同埋寫劇本方面真係好開心，令我萌生咗想喺香港做電影幕後或演員嘅夢想。同埋我跳舞方面都唔差，成日有得去紅館做dancer😅
我哥哥演藝學院讀作曲系，最近佢同我講有一間中學叫香港兆基創意書院，係藝術高中嚟嘅，了解完之後覺得好有興趣，連阿媽都話會支持。但始終冇朋友仔讀呢間 ，都有啲嘢唔太清楚。
如果有人讀創意書院希望可以為我解答下🙏
1)書院中英數通主科嘅內容會唔會好容易?同其他普通中學嘅內容會唔會有分別？
2)讀創意書院有乜嘢好處,壞處?
3)大家覺得我應唔應該轉校去讀一間藝術高中？🥺
希望大家畀啲意見我！多謝阿哥阿姐！🐸🐸