#NSS家庭
[GUEST] 我真係好憎我姑丈
我自細住喺我姑姐屋企，點解唔係同老竇住嘅原因一匹布咁長所以就唔講啦。
第一，我姑丈成日都突然講粗口鬧人，佢真係好乞人憎。平時得我同佢喺屋企食飯，佢成日都喺食飯嘅時候對住我鬧我老竇，我啊嫲啊爺同啊媽，又會提下我另外兩個姑姐，一係就發脾氣鬧我。有次佢突然發脾氣話我有爺生冇乸教，我真係覺得佢個人同呢句嘢都好粗鄙同惡毒。我本身就係單親家庭，我的確冇見過親生啊媽，佢咁樣嚟督我痛處。有次佢食飯又話我啊媽好衰，但佢又冇講佢做咗乜嘢，我都唔知真定假。佢鬧我都算，但佢鬧埋我嘅親人我接受唔到（唔好意思我當佢陌生人）
第二，佢又會成日食飯撩我講嘢，問埋啲無聊嘢，例如：明明見到我食完飯但係問「食飽嗱？」（仲有好多問我根本唔知道或者同問你男定女、係咪人一樣無聊嘅問題，但係我最近避過咗同佢同枱食飯所以唔記得曬）我唔答佢，佢又同我表姐姑姐講我十問九不應，大佬呢啲有肉眼就知道答案嘅問題要我可以答啲乜？我最初有答，但佢年年都問重覆嘅問題，我咪直接唔答。我而家學精，等佢食完我先食飯，盡量減少同佢接觸。
第三，佢成日撩人，我屋企有請工人姐姐（唔有錢唔好誤會）佢成日都喺姐姐行過嘅時候無啦啦講佢痴線，然後姐姐聽得多都知道係鬧人嘅意思，有時喺佢對住姐姐講嘅時候，姐姐就會對返佢講痴線。另外，當啲推銷電話打嚟佢接咗，佢就會纏住人成日，又叫靚女又叫小姐之餘，又講下唔關事嘅廢話。當我煮嘢食或者食嘢嘅時候，又會痴埋嚟話我好多嘢食，又要搞下我碗麵，又問唔畀姑丈食啊？我都唔明究竟佢係咪太得閑，成日無端白事撩人做乜？
第四，佢成日都食煙，廁所廚房仲有房成間屋差唔多畀佢食雲曬，又臭又影響他人健康，聽我姑姐講，佢去人屋企做裝修，但係去到又唔做嘢，食到成地煙頭，搞到人向我姑姐投訴。
第五，亂拋垃圾，佢成日喺窗口扔煙頭落街，乜嘢都扔落街，明明垃圾桶就喺廚房，嗰幾步路都懶得行，如果邊日畀人投訴罰款都喺因為佢
第六，無同情心嘅紅色廢老，滿口歪理。話食煙健康，成日睇中國啲打仗劇，又話我哋去遊行畀警察打死，平時新聞見到有阿婆意外死咗，同人無仇又要話人抵死，又要鬧下美國日本，真係頂佢唔順，做人咁黑心唔驚畀天收？
第七，呢幾日突然拍我門叫我沖涼，話我唔沖，我姑姐佢哋返嚟等我一個，但我姑姐佢哋平時九、十點先返，而且我姑姐同表姐講好叫我一係喺佢哋返嚟前沖完，一係等佢哋沖完再沖，咁就唔會返到嚟冇得沖涼，所以我係可以選擇等佢哋沖曬再沖。咁我話等陣再沖，佢見我唔去沖涼又唔知嬲乜，大力拍我門跟住喺我門口鬧我死仆街，屌我老母，叫我死返去我啊爺啊嫲住嗰度。
講真，我如果死到去嗰度我就去咗啦？我唔明有冇嚴重到要講呢啲說話呢？我而家殺人放火定做咗乜？
我知我寄人籬下，但係因為咁我就要受呢啲氣？每次畀佢咁鬧我都懷疑自己生出嚟做乜？生出嚟承受呢啲辱罵有咩意義？前世係咪殺佢全家所以而家要受呢啲罪？佢成日叫我去死，搞到我以前有諗過真係死咗佢算，而家諗通左，命得一條，憑咩我要為呢啲人放棄咗佢？佢咁想我死，我偏偏唔死，激撚死佢。情緒偏激嘅時候真係好想攞刀捅死佢一了百了，但我唔想為呢啲人自毀前途，而且我都未必打得過佢。我人生一半痛苦都係佢建立，就算佢死咗我都唔會為佢傷心，但我未成年又冇錢，根本離唔開呢個所謂嘅屋企，乜都做唔到，我真係好憎佢。