#NSS家庭
[Redstone P.S. （加拿大學校）] Hi 小妹今年中二，我同爸爸媽媽個處境好尷尬，唔知點算。
事情係咁嘅，大約係我小學二年級嘅時候我嘅爸爸媽媽就已經離咗婚(撫養權係我媽媽度)，細個嗰時唔係好知道感情呢家野，只係知道爸爸媽媽成日鬧交，去到大概三年級時，我媽媽成日要出去工作，爸爸唔係一齊住，基本上都係公公婆婆照顧我，但係其實我同爸爸媽媽公公婆婆嘅關係都好好，不過有時候爸爸媽媽都會同我講雙方嘅壞話，一直去到四到五年級就開始喺學校學壞，一返到屋企就打機睇電視食零食，功課基本上唔會做，拖得就拖，成績勁差，甚至會喺學校頂撞老師，有時老師會打電話比媽媽，返到屋企基本上會俾媽媽打，但係佢打完我都會同我講道理或者勸我唔好再咁做，之後就會和好如初，關係都一直好好，去到六年級嘅時候開始知道要乖，所以開始認真讀書，可惜醒悟得太遲考上左Band 3學校，我爸爸知道左之後就想我過去外國讀書，因為始終環境好過喺香港，再加上爺爺、嫲嫲同姑姐好耐以前就已經移咗民所以我喺外國讀書係冇問題，其實佢喺我細細個嘅時候已經想帶我去外國讀書，不過我媽媽覺得我要大個啲先去會好啲，咁之後我同媽媽都同意左小學畢業之後去外國讀書，我媽媽仲同爸爸簽咗一份類似合約嘅嘢，大概內容係一年要返一次香港，同埋爸爸一定要陪我去外國讀書去到我成年(媽媽因為手頭上嘅工作再加上如果佢都去外國，個處境會變咗好尷尬，因為我住嘅地方同埋學校係喺我爺爺嫲嫲姑姐嗰度(爸爸個方)，所以變得好尷尬)
之後畢業，然後係爸爸嘅陪伴下去外國讀書，大概過咗三個月，我爸爸突然話因為公司嗰啲嘢所以要返翻香港，佢唔想比我媽媽知道就想叫我講大話，可惜最後我都講咗比媽媽聽，然後佢哋又開始鬧交，之後佢哋就開始講互相嘅壞話，好似想我選擇其中一方咁，我覺得好煩，因為我知道兩方都好錫我(唔知係咪因為想爭我嘅撫養權所以先對我咁好)，我媽媽想要我個撫養權係因為佢覺得我跟得爸爸多會變壞，而我爸爸想要我個撫養權就係為咗激嬲我媽媽，所以其實我唔知點算好，我而家係外國冇乜朋友，同爺爺嫲嫲姑姐嘅關係又唔係幾好，所以好孤獨，呢排仲記起細個嗰陣我同爸爸媽媽一齊瞓覺、玩、讀書，所有親子活動…
我勁唔開心，因為我覺得我成為咗佢哋物品爭嚟爭去，我又冇朋友可以傾訴，唯有喺度講😢