#NSS愛情
[Guest] 拍拖冇感覺真係唔緊要?
小妹第一次投稿，有少少長，希望大家唔好介意。
最近啱啱拍咗拖，一齊咗五日我已經想分手..
同我一齊嘅嗰個男仔(簡稱B)係我同班同學，本身我哋兩個都唔算熟，有少少似陌生人咁。喺上個月，我同朋友(簡稱A)一齊傾電話，嗰陣我口快快話想pool，冇諗住真係出。A知道咗之後冇幾耐就同佢男朋友一齊ship我同B一齊，本來我哋兩個對大家都冇感覺，點知前幾日B突然之間同A講話鍾意我，B仲要講到全級都知。我自己本身就唔太介意，因為已經有鍾意嘅人(A同B都知)。喺嗰個禮拜有好多人知道咗B鍾意我之後都叫我同佢一齊，就算係試吓都好，不過我都係同佢哋講愛情冇得勉強，諗住拒絕B。
每次B想表白嘅時候，我都會特登行開。我知道自己根本都唔鍾意佢，同佢一齊都會係分手收場。喺佢表白嗰日，我放小息俾朋友拉咗過去，咩都唔知嘅我行到過去見到有好多人，然後B就喺中間望住我等我過去。過到去之後，我先發現佢原來係想表白。喺比咁多人圍住嘅情況底下，佢同我表白我就接受咗。我諗住自己可能一齊咗之後都有機會心動嘅，話唔定會鍾意佢呢。我知道B其實對我好好，我同佢一齊之後佢有陣時都會同我講嘢。雖然返到學校我哋好少互動，佢唔鍾意主動、亦都唔會講啲咩花言巧語氹我開心，但係佢會喺行動方面保護我。一齊之後我都冇過嫌棄佢，即使佢唔係我嘅理想型。有一個愛我嘅人喺我身邊我都好開心，但係好可惜佢始終都取代唔到我鍾意嘅人嘅地位，我同B講100句嘢都唔夠我同我鍾意嘅人講一句嘢開心。我根本都唔值得配擁有B對我嘅愛，我覺得我自己好似利用佢咁，每一次佢同我講我愛你，我都會覺得自己好似呃緊佢咁，根本同比綠帽佢大冇分別。
我應該點做好？繼續同佢一齊定係離開佢同我真正鍾意嘅人一齊？Sorry for 1999，希望大家可以俾啲意見我。