#NSS家庭
[[Guest]] [Guest] 想問下有冇人阿媽都係咁？
如果有少少亂嘅話真係唔好意思因為我都係喊住嚟寫😢😓， 篇文好長， 希望各位可以體諒一下，sorry for 1999, admin pls po ig thx
先講一講個背景，小妹今年F.1，我來自一個單親家庭， 好細個嘅時候阿爸阿媽已經離咗婚，因為阿爸本身係大陸人所以我好自然就跟阿媽，之後我同阿爸亦都冇再見過面， 就算有得揀我都唔想跟佢。 好，廢話講完入返正題先。
本身我細個嘅時候喺婆婆度住，到咗五年班我就跟番阿媽，但唔知點解阿媽唔鍾意我大姨二姨， 佢哋都係住喺婆婆屋企所以之後我都好少機會可以返去， 從嗰一刻開始我再冇點樣食過住家飯。 我屋企冇工人，阿媽放工返到嚟已經好夜所以我哋日日都係出街食飯，但有啲時候 阿媽唔畀我食嘢，佢會自己一個出去食嘢唔帶我，而當我話想食嘅時候就會鬧我話:「 食乜嘢啫？你唔係唔使食嘅咩？」， 跟住就會開始發曬癲鬧我，咩都攞出嚟講。 佢仲好似有妄想症同情緒病？成日無端端嬲我，明明我都冇做到嗰樣嘢佢都要屈我， 話我特登整爛嗰樣嘢特登，考到啲成績咁垃圾係要報復佢等，如果佢啲朋友咁啱打嚟嘅話，佢就會同佢啲朋友講話係我問題話我唔乖，諸如此類嘅嘢。但估唔到佢啲朋友又真係信佢，話埋我一份🙄。 唔單止係咁， 佢好似好憎我，成日一唔啱佢心意或者做錯咗，佢就會用好寸同貶低人嘅眼神同語氣嚟鬧我，例如，垃圾、廢柴、無腦、弱智、死女包等等， 只要係侮辱性極大同埋你哋諗到嘅，佢都會講出嚟。
雖然依家冇再扯我頭髮同打我塊臉， 但係佢都會大力咁推我，踢門，打我隻手臂同埋篤我太陽穴， 有時如果我反抗或者問佢點解要咁做，反駁返佢就會越嚟越恐怖，恐怖到我即刻想死嗰隻，我驚我再咁落去我第日大個咗對人嘅態度都會好似佢咁， 我真係好驚自己會好變到好似佢咁恐怖😢， 我日日都要小心翼翼咁生活，我好想返婆婆屋企住😭😭 我幾時先見到你？我真係好掛住你，你喺度我就唔使驚俾人打死😢， 依家每日見到阿媽都要小心咁樣唔好激嬲佢我真係驚有朝一日會畀阿媽打死……😭
雖然我好憎佢，憎到想佢永遠消失，但係有時諗返佢對我嘅好，我心情真係好矛盾因為我咁樣真係好似不孝女😔， 佢成日同我講要畀心機讀好啲書，唔好好似佢咁樣做啲咁辛苦嘅工； 佢可以為咗我死慳死抵，唔買衫，唔買佢鍾意嘅嘢都會一直供我到大學畢業，只要我唔介意嘅話屋企嘅大門隨時都會歡迎我。。。
只要我一諗到呢啲嘢都會感動到爆喊😢💔。 諗到佢犧牲咁大咁愛我，我就會開始後悔之前做咩憎佢……
有冇人可以話畀我聽我應該點做， 我點樣先 可以好似其他同學咁正正常常地生活……
ps 如果叫佢睇醫生絕對冇可能，因為佢肯定又會打我鬧我。
最後好多謝你哋願意用咁多時間睇我呢篇嘢，可能我講嘢真係好亂，但希望你哋睇得明。
婆婆，我真係好掛住你。