#NSS家庭
[GUEST] 首先多謝小編揀小妹編文，事先聲明小妹今次第一次投稿，會好長氣，加上平時係個英文人，所以請見諒 <333
我好攰，覺得自己唔單止想放棄相信人同放棄夢想，仲覺得自己本身就唔應該生存喺呢個世界上。。。
我呀爸呀媽係因為有咗我先結婚，本身諗住分手，點知就發現咗我，小時候我當然唔知情。我一直以為我好幸福，有佢哋錫，以為連續幾日都唔見呀爸好正常，話就話返工，但依家嘅我先知係出軌、佢哋之間嘅爭執同矛盾，但係呢個唔係最黐綫。
小二嘅時候係我第一次正式發現爸爸出軌，更加係我先發現。可能我細個太傻瓜，唔知道有幾大件事，所以直正媽媽發現先講，亦都唔知點反應好。依家啲我都終於明白，原來嗰陣時我已經心知呀爸根本唔愛呀媽。我同媽咪離家出走一個月就返屋企，當冇事發生，我到而家都扮咩都唔知。
中二嘅時候再發現多一次，我叫做明白事理，開解到呀媽，我先知事情嘅來龍去脈。好彩中一鐘意咗Kpop，識得愛自己同做自己，可以話佢阻止我自暴自棄，令我有希望，所以我都堅持到，但係我自己原來一啲都唔OK。原來我失去左對人嘅信任，原來所有人都隱瞞真相，令我好驚，本身好想得到一個愛我嘅人，依家都怕左，見到中學生拍拖表面笑佢哋，但其實有小小羨慕佢哋嘅單純。媽媽再次扮冇事發生，我再扮唔知情，但係我d心底話都唔敢講，因為唔想呀媽擔心。
突然間，我再得到一個痛症，要戴支架，外形同行動上，我失去左好多自信。我同時間覺得，如果我冇出世，呀爸呀媽都唔需要一齊，可以分開，就唔會有咁多問題。
我以為，由嗰刻開始，就係我同媽咪互相扶持，但係，呀媽係個敏感，唔識考慮人哋感受，唔會接受人哋批評嘅人。我好想同媽媽一齊成長，一齊堅強。我成世人淨係介意媽媽對我嘅意見，但係偏偏係佢令我失去自信。佢嘅自私同無知，令我唞唔到氣。佢係我唯一信任嘅人，但係佢反對救咗我心靈嘅音樂同演藝，要我參加佢想我參加嘅活動同比賽，全部都係我最抗拒嘅嘢。我覺得佢好唔了解我。我已經多咗表達自己同講我嘅心聲，但係佢聽完之後冇咗回事，我覺得好心痛。所有同學都係呢段時間覺得爸爸媽媽麻煩，我想同媽媽親近啲，偏偏令我開始憎恨佢。我好唔想，但係我已經放棄同佢溝通。我好鐘意音樂、設計、演藝，但係呀媽成日話賺唔到錢。
我覺得好孤單，唯一覺得 "I belong" 嘅時候就係寫歌同聽歌嘅時候。我內心好徬徨，好無助，好似無人無物，連自己有冇心理病都唔知。。。我信唔過人，點算好？我係咪大驚小怪，我係咪望落好似好傻？但係我有夢想，唔甘心放棄，加上自殺會落地獄。。。🥲
本身諗住寫 "希望有人幫到手"，但係自己都唔肯定有冇人幫到，好希望有人俾到意見我，睇吓我會唔會有機會重新開始，變成一個更好嘅人。
大家要好好珍惜身邊嘅人同事物，因為幸福唔係必然㗎。
一個希望人人都安好同幸福嘅人上（無知是一種幸福 =] ）