#NSS個人
[某炮台山中學] 友誼真係好化學，唔花心機維繫嘅話真係好容易會疏遠（長文慎入）
我有個老友由小學玩到而家中學畢業（下稱A)，我地一直都好好朋友，一齊去過旅行、返學、放學，做乜都一齊，我哋都係對方嘅最好朋友。
A冇乜缺點，最多都係唔係好熱情（？）我意思係次次做主動嗰個都係我，例如約出街、傾偈、送禮物等等。其實我對呢啲又冇乜所謂嘅，始終可能性格唔同。
可惜一到假期，佢都會唔知點解失蹤咗，小至星期六日，大至暑假、公眾假期等等，唔覆機、更加唔好講約出嚟玩。
我初中嘅時候會問A點解，A就話忙學業、電話冇電、電話唔見咗，屋企人唔俾等等，我初頭都會幫佢諗辦法（eg 送個尿袋俾佢、教佢點同屋企人講…）但係我慢慢先發現其實佢根本就唔係咁抽唔到身，（例如.班會有活動，佢又可以即刻出嚟玩，唔覆我但係IG 又可以po嘢一直上線等等）。所以我慢慢都明白，佢唔係唔可以陪我，而係唔想陪。
近年因為我哋分咗班，所以A開始同佢嗰班嘅幾位同學friend ，佢竟然變到好主動，主動咁約佢哋同佢哋傾偈。
有次我哋放學食嘢，A同佢嗰班同學夾埋四個人加埋我，撞正四人限聚，之後佢哋四個完全冇諗過我，一齊坐，而我自己就自己坐喺第二張枱……之後我同A講返，我因為呢件事好唔開心，之後佢就解釋：咁你同另外嗰三個唔friend吖嘛，我諗你哋都唔會想一齊坐㗎啦。
見佢同佢班朋友咁friend，而我就好似局外人咁，好傷心。但係我知道友情≠愛情，唔可以要求佢淨係同我一個玩/一定要成日陪我玩，亦都明白友情係冇得強求，所以我都唔好意思打擾佢哋。
奇怪嘅事就係，當我以為佢唔想同我玩，所以唔覆我嘅時候，佢又會無啦啦彈出嚟同我傾計，一傾就可以傾成五個鐘。（雖然呢啲事情次數唔多）咁即係代表佢仲想同我玩（？）
但係近排畢咗業，我同A冇得藉住返學嚟見面，我WhatsApp佢，佢都唔覆/hea回。所以我冇再煩住佢，佢亦一直冇搵過我。
我成日都好想打段文俾佢， 同佢講晒我啲心底話俾佢聽，但係我唔知應唔應該咁做好，因為我唔想比壓力佢，但係我真係覺得好可惜，佢就同佢啲同學越嚟越friend，同我就相反。唉～十幾年感情啊！
如果睇到嘅你，自問冇理一個死黨好耐嘅話，快啲搵返佢啦！哪怕講得一兩句說話，對佢來講已經好心足啦！
感謝admin幫手出post，同埋睇到呢度嘅你哋(｡･ω･｡)ﾉ
最後願各位都可以搵到你嘅一生摯友！