#NSS學校
[山區女校] 如果要兩個字黎形容今屆f6 farewell，我會用「荒謬」呢兩個字。
F6 farewell 印象中應該係全校一齊睇各班製作嘅畢業片，然後一齊合唱一啲有代表性嘅歌曲，例如《十八》、《你是你本身的傳奇》等等⋯⋯最後中六各班可以輪流係台上影合照，但學校對我地今屆中六嘅安排實在太唔公平。
我哋今屆F6已經冇咗F5 musical, 三年sport day, 一年picnic………仲有數之不盡嘅實體上課日數同原本應該有嘅開心上堂回憶。原本仲以為我哋起碼仲有個F6 farewell，點知往年每班畢業片時長可以長達8至9分鐘，但我哋今屆畢業片時長縮短到4分鐘……我想問下4分鐘可以剪到啲乜片段？淨係老師佢哋講「加油」嘅片段已經30秒啦🥲
畢業片時長短都算，當日嘅流程安排先係災難。往年都係每班揀8個人上台喺睇完畢業片之後一齊唱歌、開手機電筒揮下揮下咁、然後又會有啲人係台上面喊呀遞紙巾嗰啲。咁我好幸運地可以上台一齊唱歌，farewell前要早會祈禱嗰啲都冇乜問題。但到我哋32個人上台坐低咗(choir用嘅嗰種三層企板)之後，荒謬嘅事情就開始發生。原本畢業片理應投影喺我哋後面同台上左右邊嘅投幕布到，然後我哋32人同全校都可以一齊睇到畢業片(F1-4透過teams直播喺班房度睇)。點知我哋上到去調頭望向後面係乜都冇……於是我地向企喺旁邊嘅mc求助，點知佢話中間部投影儀壞咗，我哋到上台先知原來我哋係冇得睇畢業片。
於是我哋就坐喺度望住台下F5、F6同老師佢哋睇畢業片，我哋自己就聽咗16分鐘左右嘅畢業片。之後仲有各班代表感言、校長分享、向校工贈送禮物環節、修女分享，我哋三十幾個人做背景板到最後一刻先可以落台。而所謂嘅唱歌環節連電話都唔比攞出黎，大家亦冇心情唱落去，變成播歌環節。
途中我地有向企係台上兩側嘅負責老師詢問過可唔可以安排IPad比我地透過teams直播睇畢業片，或者比我地攞手提電話出黎睇直播。但佢以「 直播會有delay」為由拒絕咗，但其實我哋可以將電話/iPad較靜音，就算有聲畫唔同步嘅問題都好過淨係坐然後望住台下睇畢業片呀：）
最令我覺得荒謬嘅點係我用咗兩晚以上時間剪嘅畢業片，到正式播放嗰一日我居然冇得睇返🥲而且各班嘅畢業片都被較咗倍速或再剪輯過後先播出，點解我作為剪片嗰個(八成以上都係我剪)竟然冇收過任何關於畢業片改動嘅通知？影片嘅節奏都會被打亂，聽住隔離班啲片嘅背景音樂被人改倍速，改到甩甩咳咳嘅時候真係覺得好慘。
我真係估唔到我係f6 farewell流眼淚嘅原因唔係因為感動、傷心要同大家分開定點。我真係未試過委屈到喊出黎，仲要比人以為係因為睇到畢業片感動到喊😅我連條片係點都睇唔到，喊條毛呀？
散場嘅時候嗰位唔俾我哋攞手機出嚟嘅老師仲叫我地快啲離開，而台下我嗰班啲人都已經雞咁腳走咗，到最後都冇影到大合照。