#NSS個人
[GUEST] 最近真係好迷惘 有冇人可以幫下我？
話説我有兩個好friend嘅同學 由中一識到而家中三 大家都追exo 永遠都有講唔完嘅話題 時不時一齊出街 上大家嘅屋企玩 係學校我哋三個成日一齊 就算唔同班 小息放學都會等埋一齊傾偈。咁我就稱佢哋為A同B。
直至最近，我發現到A同B好似不和，A B佢地同班，平時小息or lunch我會去佢哋課室，等A B一齊出嚟係門口傾偈，但係最近呢幾次， 我行到佢哋課室嗰陣，只見A行出嚟，我問佢B點解唔出嚟，佢就話：唔使理啦 我哋落去先啦(去小食部食嘢)，嗰陣A係咁拉住我，叫我唔好問咁多，咁其實我都唔在意啲咩。
大概前幾日，我地學校lunch之後個堂有個講座要落禮堂聽，行緊落去嗰陣，我見到A B佢地個班係前面，但係嗰陣我好清楚咁樣見到A 同B分開行 而且A B各自同另外一個同學傾偈。可能咁樣未必證明到佢哋不和，但係之前AB佢哋成日走埋一齊行(因為我同佢哋唔同班，落樓梯佢哋自己一班行，咁我就喺後面見到)有時仲搭晒膊頭咁，點會突然分開？而且呢個情況已經見到幾次。
喺嗰陣我都覺得已經怪怪地，就係前日，我去咗問佢哋班其中一個同學，佢話佢都覺得好奇怪，明明一開始佢地好friend 但最近就好似突然變到好似唔熟咁，跟住我就慢慢咁樣查下A B，發現佢哋IG unfollow咗對方，嗰陣時我就知道佢哋一定反咗面。
但係企喺我呢個角度嚟講，真係好尷尬，我同A B佢哋兩個咁熟，冇諗過佢哋兩個之間反咗面，琴日A搵我出街 我又要扮唔知佢哋之間嘅事 做吓樣問點解唔叫埋B，小息嗰陣A拉我落去樓下小食部，我望住B ，一時間唔知可以做咩好，唔叫佢又好似唔太好咁，總之就係嗰種無能為力嘅感覺 話晒我哋都有三年嘅友情 經歷過咁多嘢 稱得上同甘共苦 我哋三個之間有個WhatsApp group 已經荒廢咗一個星期 呢幾日通常都係A私聊搵我 我都覺得怪㗎喇 btw 有冇人可以幫到我 唔知你地明唔明呢種感受🥲🥲🥲