#NSS個人
[GUEST] 究竟係咪我做錯啲咩，點解冇人肯同我做朋友？
大家好！小妹今年F2，有一位best frd係小學識嘅，佢好外向，同好多人都傾到偈，雖然中學唔同，但都有keep住聯絡(每日都有傾偈)，亦都當彼此係best frd。
但自從F1下學期開始，我發現佢好似識咗幾個好朋友，佢仲成日喺ig post佢哋啲野，咁我當然會呷醋，但都冇太明顯咁表露出嚟。
但我睇返自己…升咗中學兩年，來來去去都係得一兩個傾到偈，仲要都唔係好熟嗰種。自問都唔算內向，有主動搵過人講嘢，但最尾都尷尬收場。每次小息嘅時候個個身邊都有好多朋友，而我就坐喺張凳到唔知做乜，個個都覺得小息好快過，但我真係覺得好慢好慢好慢。
每次有人講「中學時期嘅朋友將會係你一輩子嘅朋友」呢句話嘅時候，我都好反感。第一，我好驚我到中六嘅時候都未識到一位知心好友。第二，我都好驚best frd唔再當我係best frd，因為唔同校嘅原因相處時間少咗好多，而且中學嘅青春回憶都唔係我陪佢渡過，但我得佢一個朋友，我真係唔想失去。
可能有人會話朋友不需多，真心就夠，但試問邊個唔想多啲朋友姐？我真係好羨慕有一堆朋友嘅人，真係好羨慕…究竟點先識到朋友(´:д:`)
不過樂觀啲講，我知道而家都淨係F2，所以我相信我剩低嗰四年能夠認識到知心好友，喺中學留低一個美好回憶٩(ˊᗜˋ*)و
多謝你睇到呢到(*Ü*)同埋小妹講野可能有啲幼稚(?多謝體諒！！
Sorry for 1999