#NSS文化
[GUEST] 話說今日係耶穌受難節，咁教會就會有受苦節崇拜，但係入邊啲程序就同平時個d崇拜差唔多la。下邊講嘅嘢就係有關一d返教會嘅經歷。
咁我交代一下自己背景先la，小弟今年15，屋企d人都係信耶教，而我自己就由中一開始已經想離開，但屋企人好着迷於耶教。我呢一兩年已經開始係咁搵方法去間接同佢哋講我唔信。例如就係每逢星期日崇拜嘅時候都會同佢哋講好眼瞓之類嘅嘢。但當然係冇用，屋企人會用沒收手機理由或者會鬧人嘅方法去逼我。咁可能會有人問我點解唔直接同佢哋講，咁係因為如果同佢哋講嘅話一定鬧到我飛起，而且教會啲人會不停傳呢啲嘢。而我唔想搞到咁大單嘢。
而令我唔想再返church 嘅另一個原因就係入邊啲人。小弟由細就返開嗰間教會，以前以為入邊啲人好好，會關心人等等。但當我大個左之後，發現入邊啲人真係唔係想像中咁好，一樣會照舊俾人講閑話。記得大概上年嘅時候，我就拍拖la，但係嗰個女仔就唔係信耶教。 佢哋知道拍拖嘅原因就係睇我同女朋友出街嘅動態la。同我同年紀果一班人知道咗之後，就開始喺背後係咁講，連啲大人都知道….🥲傳傳下連我老母都知。呢樣嘢我都算，但最L過份就係有條友走過來同我講話我失見證同埋違背聖經。我心諗：wtf?講真其實我拍拖關佢哋鬼事，最離譜就係講到我女朋友好似係哀人咁。自從呢件事之後我就開始想離開呢間教會🙃
講返去我屋企人嗰邊la，我一直feel到佢哋好想我立志去信，而且將呢一樣嘢睇得好重🙃
而且我都有同佢哋講過我對耶教半信半疑，但係如果我同佢哋講我唔信一定鬧到我on。如果係信二代嘅人都應該明白我感受，通常屋企人都會係咁逼返教會等等，我真係好想講咁樣做真係好唔尊重我。原本呢個世界有宗教自由，但有耶L屋企人存在就真係冇乜可能有自由。而且佢哋真係好鍾意係咁傳教，不論人地唔想聽。唔係講笑真係連我都覺得煩同尷尬。最搞笑就係成日將唔信教就落地獄呢啲觀點恐嚇人。如果你問耶L （第一個人係冇犯法而且做咗好多善事嘅人但唔信耶蘇，第二個人就係犯法殺左人但係信耶蘇）啲耶L會同你講第二個人可以上天堂🥱
當大家睇到呢度以為已經差唔多啦，但最近又比我發現到一啲好神奇嘅事。話說就係教會有個傳道人要去外國宣教la。但係嗰個傳道人老豆老母年紀都好大，都唔係好照顧到自己，個傳道人真係話走就走，完全冇理自己阿爸阿媽，而且睇得出佢阿爸阿媽唔想佢走去外國。我真係好想問聖經十誡唔係有一條係講孝敬父母咩？ 點解可以真係為咗去傳教可以唔理自己最親嘅人？我知道呢件事嘅原因係我阿媽嘅公司距離嗰個傳教人老豆老母屋企好近，所以成日去買物資比佢哋等等。搞到成日好夜先返。我阿媽仲要好人到唁收錢。我真係完全唔理解點解要一個教會嘅人去幫手照顧，身為傳道人搞成咁樣除咗自私完全諗唔到有其他嘢可以形容。同埋講一樣嘢俾大家知，就係外國傳教人嘅生活費有一部份都係教會奉獻入面比🥱。
最後，我想帶出嘅嘢就係church 真係唔係大家想像中咁好，只不過係另一個生活上嘅第二個是非之地。入邊真係好多令人匪夷所思嘅野，連孝順依樣嘢都冇真係唔好講話自己信教。
小弟第一次投稿，所以都可能有啲亂，希望大家都唔好介意🥲，多謝大家聽我呻，亦都想大家俾啲意見我點樣可以喺唔鬧交嘅情況下可以同屋企人好好溝通唔信教嘅嘢，亦都可以大家可以討論下喺教會嘅經歷。