#NSS個人
[Guest ] 自問由細到大都唔係朋友成群嗰種，小學生涯裏面最friend嘅都係得一兩個，畢咗業之後都少聯絡；中學生涯都係一個左右，間中一齊吹吓水咁樣，冇話好似人哋認晒兄弟姊妹咁樣。當然，都遇到唔少唔鍾意自己嘅人。
小學嘅時候記得有一次過年番大陸去咗一個親戚屋企，個親戚屋企冇自來水，只係用一個手動泵泵水落水桶用，因為香港好少見到咁樣嘅水泵，所以我就影咗一段泵水嘅片send落谷度（利申：冇喺谷內講過嗰個親戚任何個人資料）。
點知我個同學見到段片之後就話啲人窮係應該用水桶喺個井到兜水，而唔係用手泵，我當時應該好嬲，同嗰個同學辯論左好耐（人哋屋企冇自來水已經夠慘，仲要咁樣俾你話，唉）。我真係心諗：使唔使咁呀？我淨係想分享吓個水泵，點解會變咗喺度爭論所謂窮人應該點樣裝水？
後來我同呢個同學都入咗同一間中學，不過唔同班（後來有次聽講座坐喺附近，都冇理佢）。
後黎上到中學有個friend，中一入去就識得佢，然後斷斷續續咁樣聯絡到中四，喺間學校裏面都叫係識得比較耐嘅人。然後佢有一日突然之間block我，我到而家都覺得唔明我做咗啲乜嘢得罪佢。不過諗諗吓可能真係冇乜嘢，純粹係佢見到我呢個人篤眼篤鼻，想同我斷絕來往姐。
仲有一個同學，有一次唔開心就打電話同佢講，佢都有聽我講，不過就一路話我好煩，仲要係咁講嘢打擊我（具體講啲乜嘢我唔想提起）；之後都相處得唔差，便服日都有搵我合照，旅行日都有一齊玩。
跟住隔咗大約半年，我有一次隨口問起可唔可以同佢傾陣電話，佢就直接話我好煩。嗰下心裏面係有少少唔開心嘅，不過我冇乜嘢喎，咪當身邊少咁一個普通朋友囉。
有陣時喺網上面見到啲人話好孤獨，喺度呻吓。我慶幸自己喺10幾歲嘅年紀就明白身邊總有一啲嘅朋友、同學會隨着時間過去同你漸行漸遠，呢個係永恆不變嘅定律，所以人本身係孤獨嘅。
所以當我去到嗰啲上網呻嘅人嘅年紀嘅時候，如果我仲係冇乜朋友，我諗我都已經習慣，因為我一個人都可以做好多嘢：
有陣時坐喺海邊望住貨船行駛，聽住海浪拍打石頭，再望吓擺喺自己大髀上面嘅書；又或者坐喺山上面嘅涼亭，望住俾風吹到係咁搖擺嘅野草，聽住喺山頂放風箏嘅遊人嘅歡笑聲，然後拎部手機或相機出嚟影低咁美麗嘅一刻，先發現一切原來可以咁簡單，快樂就係咁簡單。
當然都有工作拍檔，但係私人生活大多數時候冇佢哋，可能係我太孤僻喇，但我再都唔想喺人群裏面孤獨，相反一個人嘅充實更珍貴。