#NSS社會
[某男校（唔重要]
小弟真係跪求大家睇晒佢，雖然好長，但求吓你哋。
大家有冇覺得好似輕視咗個疫情或者覺得中咗好平常？你話我係道德撚又好 恐懼撚都好，我覺得大家都係應該要對疫情有返咁上下重視，我唔係要叫大家打針嘅苗撚，但基本公德心同自律根本應該要有。
大家諗下點解第五波會爆得咁勁？事源係某航空公司嘅空姐空少唔遵守隔離防疫措施，因為呢個漏洞，喺一月初嘅時候，香港漸漸開始出現社區感染。依家唔係興師問罪嘅時候，疫情已經爆到返唔到轉頭，雖然話呢幾日有回落，但其實每日都有數以百計人死。
入正題，我個妹有個朋友（下稱A），A因為親戚所以成為咗密切接觸者。本來都冇乜嘢，阿妹話A要困自己喺間房入面隔離七日。本身聽完就算，好彩阿妹冇見過A。但係，今日阿妹好嬲咁樣同我呻，話A竟然未隔離完就出街，仲要大言不慚咁話如果佢中嘅話一早中咗。但係，其實每個人身體唔同，潛伏期只係一個參考，佢隔離期根本未完。我心諗，點解啲人可以咁冇公德心。大家可唔可以將心比心，唔好覺得中咗係理所當然？隔離安分守己，自律係責任。雖然A有解釋話自己係非出街不可，但我都依舊覺得A好有問題。A仲好可笑地挖苦咗我阿妹一句，「你咁驚咪唔好出街囉，恐懼L」。有冇諗過，點解出街就一定中！咪就係你呢啲自私嘅人囉，你唔知都算啦，仲懶係言之有理咁。
大家可能覺得自己年青力壯，中咗冇乜嘢。但其實根本就唔係連登班人講嘅just a flu咁簡單。可能大家覺得我係恐懼撚，係，我認。但大家有冇諗過有好多人嘅生活係比呢波疫情擾亂，例如身為應屆dse考生嘅我日日都要擔驚受怕，擔心考唔到試。又例如屋企有老人家小朋友嘅，擔心佢地會有事。我有親戚做司機嘅，佢係經濟支柱，擔心會因為中，令到全家冇飯開。
但最近，我發現大家好似對疫情覺得稀鬆平常，覺得只係小感冒，冇乜嘢。可能因為越嚟越多人中，大家覺得理所當然。我明白政府依家已經唔會好似之前咁，密切接觸者要強制入竹篙灣二十一日，要強檢etc。唔會再有資源，醫療系統已經奔潰。好多人中咗寧願自己好返唔上報，喺香港呢個無能嘅政府嘅管治下，我認為大家真係唔應該放低警惕，要繼續以謹慎態度去看待。你知道自己有機會中，就乖乖地隔離，唔好走出街害人。你永遠唔會知道，可能你咁樣出去行兩步，咳兩聲，你會傳染到個好地地嘅老人家，好地地嘅小朋友，比你搞到冇咗條命。你永遠唔會知道，你可能純粹出一下街，就搞到一個人冇得考dse。
我知道大家可能覺得我好誇張，但我真係好火滾。見到A ig仲repost咗個post話，啊三個月前聽到朋友中，好驚。依家聽到朋友中，哦。
小弟已經唔知可以講乜，只能夠喺呢度卑微地麻煩各位，將心比心，如果繼續有啲咁自私嘅人，覺得中咗冇乜嘢，隔離純粹做吓樣，小弟求吓你哋，唔好覺得理所當然，切身處地為其他人諗吓。你哋唔係唔知，第五波係因為防疫漏洞，因為啲自私嘅人唔自律，先會爆得咁犀利。再咁樣落去，個疫情永遠都完唔到。