#NSS家庭
[Guest] 呢樣嘢我連爹地媽咪都無講,但係又覺得唔可以唔理。我覺得我好似有自閉症譜系障礙（Autism Spectrum Disorder）。先講講背景, 女,18歲。點解我講出嚟,係因為我發現有自閉症嘅女仔好少(因為女仔識得一樣嘢叫masking,即係見到周遭嘅人係點,自己跟住做）,而且被診斷出有自閉症嘅女仔大多數都係比較後期先發現到有自閉症。至於點解我唔想同爹地媽咪講,因為我唔想佢地擔心或者 be ashamed of me,同埋唔想佢地特登洗錢俾我見心理學家或者精神科醫生。最近翻大專,我先發現自己好難識人同埋個人好容易因為D detail嘢崩潰,諗翻轉頭其實自己一直以來都係咁。
由細到大,社交一直都係一個我做極都做唔到嘅課題。每一次去識人之前,個腦都唔知點解要做simulation。即係同唔識嘅人講嘢之前都要諗應該講D咩,例如係開場白我應該講‘Hi!’ ‘Hello！’定係 ‘你好！’,但係就好難一嚟就講到嘢,同埋識咗人之後嗰個幾月唔知點解講嚟講去嘅topic都係一樣。同埋我唔知點解覺得社交好煩,感覺好似社交無一條特定嘅formula或者pattern比我去跟。變相好多時,我都係要靠人地做開場白,我先可以識到人。
除咗呢樣野之外,我發現我好似無乜同理心,同埋唔係好識read between the lines。即係以前身邊嘅同學同我呻或者揾我做樹窿嘅時候,我都唔知點比反應同講D乜嘢。有時重越講越衰。又或者以前當D中學同學係度講笑話嘅時候,所有人都係度笑嘅時候,我唔明個笑話有咩咁好笑,要之後揾人解俾我聽。甚至乎我有時sense唔到一D肢體語言,語氣或者面部表情,即係例如有人俾signal我,問我可唔可以同佢一齊去廁所,我都sense唔到。讀咗六年女校,我到而家都唔明點解要人陪去廁所呢個行為。又或者我有時會睇唔出一個人嬲緊嘅時候,我會唔覺意火上加油。
同埋我感覺上自己好似有D面盲。即係正常人可能用一個禮拜就認得一個人或者一堆人,但係我要用一個月甚至更長嘅時間先得（中一嘅時候用咗一個月嘅時間先勉強記得D人嘅名同邊個打邊個,結果用咗足足一個學期先適應到中學生活,重記得中一個家長日俾班主任問我係學校有冇朋友)
講開適應能力,我唔知點解去到每一個新環境,我都可以好緊張,係緊張到會心跳加速,手心出汗嗰種,有時甚至覺得身邊嘅環境好嘈好多人。最近翻大專,每次上完堂,翻到屋企都好攰,唔係因為學嘅嘢難咗,諗嘅嘢多咗,而係每次翻學嘅時候要扮到自己好social,好善談咁,但係實質上我唔係咁,感覺對人用神好多,好攰。因為由細到大,爹地媽咪都教我人類係團體動物,一群人咁生活點都好過一個人生活,所以我都好努力咁去socialize,但係都係做唔到。
同埋我唔知點解會好容易對一啲detail嘢崩潰。即係例如如果我有一舊嘢放咗係一個特定位置,而有人攪過佢或者旭佢,我就會知道（即使佢只係旭咗一度）,而且會好嬲,感覺好似擺極都擺唔好,跟住好快就會崩潰到喊。因為咁,我好容易發我阿媽脾氣,因為我阿媽成日都攪我D嘢。又或者,我習慣每朝早餐一定要飲蘋果汁,同埋晏晝同晚餐之後,我一定要食生果。如果有一日,我無做到呢D嘢,我會極度周身唔聚財。
除此之外,我同人講嘢嘅topic都好limited。我係Marvel fans嚟嘅。如果你問我任何MCU嘅嘢,我係可以講一日都講唔完。但係如果你問我其他我興趣以外嘅嘢,我係可以完全一句嘢都講唔出。而且我只係對電影有興趣,重要得兩三個fandom我係有興趣。而且我發現我係完全唔可以multitask,即係我以前如果同一日有多過兩個小測,我只可以温嗰日早D測嗰科,而另一科温咗都無用,因為個腦淨係記到早D測嗰科,遲D測嗰科會完全記唔到或者轉唔到個思維方式。跟住就會變咗一科好高分,一科好低分。
最近,我覺得好痛苦（係,可以用痛苦嚟形容）,因為我做唔到阿爸阿媽心目中或者社會眼中嗰種大專生,即係校園入面識好多人,有好多friend, 上唔同嘅莊,容光煥發嘅大專生,同時我覺得我好似越嚟越無咗自己,係屋企最真實嘅自己同出面嘅自己差距越嚟越大,令到我覺得我好似唔屬於呢個社會。我唔係想借呢樣嘢話俾阿爸阿媽知我係大專識唔到人,無朋友,我係想話俾佢地聽可唔可以唔好再逼我去做一個根本唔係我既人,我對於自己一個,我覺得開心,我覺得快樂,我覺得自然。我唔係想攞呢樣嘢作為我嘅disability,只係想誠實咁面對,而且自己係唔會be ashamed of
最後,好多謝你睇哂呢篇文。同時,我想係到話俾你聽, you are the best you,唔好因為世界嘅諗法而改變你自己。
P.S 請admin po IG 我愛admins😘😘