#NSS個人
[GUEST] 以下係由一個會放負嘅人、同另一個冇放過負但係身邊有人經常放負嘅人（話說我地同po主一樣都係f.5)，睇完 #NSS210617G [如何看待利用社交媒體進行過度放負行為] 呢個post之後，我地兩個人嘅感想經整合後嘅長文；當中嘅「我」嘅語氣由於描述角度有些許不同，所以可能會感覺上有少少精神分裂嘅感覺，不過唔會影響到整體想表達嘅意思，結構可能有啲亂，敬請細心閱讀，感謝 d(`･∀･)b
正文：
第一、關於「放完負自己心情得以放鬆 但影響到其他人 咁做係十分自私嘅」
咁請問你覺得應該用乜嘢方法去發洩負面情緒呢？
根據你喺下文所提出嘅解決方案，即係「搵願意幫助你嘅朋友屋企人老師私底下傾訴」難道呢個方法唔係會更加騷擾到其他人咩？喺互聯網上面，例如就咁post個ig story，實際上未必個個人都有反應，再加上po story唔需要人哋一定要回覆你，po story 或者開負帳係一種搵到願意關心你嘅人嘅一種途徑；私底下搵人傾，人地反而必須要接住你嘅負能量，然後再進行回覆；咁請問邊一個方法比較唔會騷擾到其他人、冇咁「自私」呢？
。
。
第二、關於你收到嘅回覆「算啦」「你又唔係我」
其實好多人都唔識得形容自己心入面真實嘅諗法，或者係件事情解釋出嚟太過複雜所以佢唔想講，亦都可能係件事牽涉到一啲佢唔想畀人知道嘅嘢。
呢個時候如果真係有心想開解其他人，願意做傾聽者嘅，應該話畀對方聽「只要你有需要嘅你就可以嚟搵我」。話畀對方知你願意幫助佢、陪喺佢身邊，至少畀佢知道佢唔係一個人，咁我相信佢都唔會咁難受，而唔係怪責對方點解只係話「你唔會明」。況且單從你成個Post講過嘅野，已足以證明你確實係理解唔到點解佢地會有放負咁嘅行為，更何況係佢地嘅煩惱呢？最後你可能都係會覺得「咁小事咋嘛，有需要po出嚟大肆宣傳咩？」若然冇心幫人，就唔好勉強自己，俾假希望人。
。
。
第三，明明係你自己話可以透過同朋友傾計嚟釋放一下負能量，但當有人透過story呢個間接啲嘅方法向你傾訴自己嘅負能量嘅時候，你又走嚟話人哋散播負能量。
我唔否認有啲人係真係每一日都會發一啲負能量嘅story / post，我都有見過，甚至乎我自己都係，但想問呢個真係一個罪咩？因為冇辦法喺現實生活中同身邊既人講所以唯有喺社交網站上發洩心入面嘅一啲諗法，事實上有幾多個人次次見到呢的post都會走去問候當事人？發一次可能有，發第二次可能仲有，但連續發一個禮拜，一個月，或者更長嘅時間，又係咪真係每一個人都在會咁細心去睇你所寫嘅文字呢？
其實我相信好多人發呢啲story都未必真係期望每一次都有好多人嚟安慰自己，純粹係想有個平台去講呢的說話出嚟。就算啲人睇到、睇唔到，有回覆、冇回覆，都唔係重點所在。一個story你撳多下就冇喇，唔好連人哋一個發洩嘅渠道都剝削埋。事實上撇除呢一啲發放負能量嘅story，呢個互聯網上仲可以睇到好多其他開心快樂嘅嘢。如果你真係唔鍾意呢啲負能量，咁你咪去睇下的正能量嘅內容囉，冇必要咁focus喺人哋發下牢騷嘅story或者post度啫。
你可能會諗「咁我見到佢放負就梗係會擔心啦，但係佢又唔俾我幫，我又驚佢出事，即係想我點啫」呢個時候上文提及嘅一句「只要你有需要嘅你就可以嚟搵我」就十分重要，要令佢願意向你傾訴係需要耐性、等待，呢一句話可以令佢知道有人肯幫佢，未至於選擇自暴自棄。你可以做自己野嘅同時，間中同佢傾下偈，內容未必同佢嘅煩惱有關，但係適當地為佢分散少少注意力亦並非壞事。
。
。
最後我想講嘅係，其實我大概明白點解po主會覺得啲人過度放負，因為確實有越來越多人選擇喺ig放負嘅趨勢 , 而佢地可能會不自覺被情緒纏繞，逐漸沉浸於負面情緒中脫離唔到，所以造成惡性循環。我都曾經覺得人地一直放負好冇意義，好似逐漸演變成一種習慣，無論咩大小事都擺上嚟，逃避現實。但係你又有冇諗過點解會變成習慣？人壓力大時會容易被負面情緒籠罩，佢地需要有人去拔佢地出嚟，但係唔可以監粗嚟。又係時候講嗰句：「有需要嘅時侯可以搵我」。雖然呢句未必係萬能，但係我諗相比其他嘢，呢句可能會更有意義。佢可能會覺得有人願意stand by, 就會自己搵一個適當嘅時機去講；而唔係一直屈住屈住，想講，但係又搵唔到一個可以願意一直聽佢講嘅人，最後又淨係可以返去ig、snapchat 放負。
我唔排除有d人所謂嘅放負係為咗其他目的，但係更加唔可以排除有啲人係真係有嗰個需要。社交媒體放負其實對其他人嘅自由度係相對大，接收與不接收係自己嘅選擇，你理解到佢、覺得幫到佢就去幫，理解唔到就索性唔好多嘴。
我想講po主最後嗰句「尤其係依家既環境，都發生咗咁多唔好既事，仲去散發負能量，去搞差人地心情。」嘅因果關係好明顯有問題。乜唔係正因為發生咗好多唔好嘅事先會放負能量咩？會唔會因為見到人地放負而被搞差心情其實都係見仁見智，即使你唔一定理解到佢放負嘅原因，畢竟每個人保持嘅觀念同經歷都唔同，但係你可以嘗試去諗「原來有人會因為呢件事有咁樣嘅心情」。
放負冇錯，所謂過度放負亦只係因為面對煩惱不知所措引致嘅現象。我認為而家多咗人放負，亦都係因為現今我地對比以前更加逐漸認同人係有負面情緒而選擇去正視佢。因此，放負並非不可取，只係反映人有負面情緒嘅事實，並且值得我地去反思應如何為自己或幫助別人達到正負能量嘅平衡。
。
。
感謝睇到呢一度嘅人，希望你可以搵到一啲你認同嘅點，又或即使你唔認同都可以見到人地嘅真實諗法，大家喺留言區亦可再進行理性討論。
唔該曬Admin(｡･ω･｡)ﾉ♡
(希望啲排位冇走位 )
圖Link: https://ibb.co/5hMk5kQ