#NSS學業
[GUEST] 有冇人唔鍾意俾人讚勤力？
小弟而家喺band 1A讀緊s5 選修課chem bio econ
雖然係呢幾科都係全級頭幾（chem bio econ都有差唔多100個人讀）但係完全開心唔起黎。。
我s4嗰陣成績都係超級差 去到s5嗰陣就發憤圖強（因為我想入physio）每日放咗學之後就即刻溫書溫到夜晚12點嗰陣就瞓覺 每一科electives都會自己notes 上堂又好專心 （我諗其他老師都睇得出我幾勤力？因為我chem同econ進步咗好多名…由前25%去到全級頭5）可能就係因為咁樣啦，所以原本嗰啲學霸同學就同我開始傾偈（問我點解可以突然之間勁左咁多）
咁喺呢一個時候我就開始懷疑自己啦…我見到其他同學雖然冇我咁勤力但佢哋真係比我聰明好多（有好多數學題目佢哋望幾眼就識做 反而我要諗好耐先諗到；chem題目佢哋冇操過卷都知道點做，而我識做係因為背咗全部CE同DSE by topic嘅答案）我喺度諗緊其實自己係唔係唔應該繼續咁樣落去？我需要付出幾十分鐘先可以達到人哋付出5分鐘嘅時間就可以達到嘅成果…冇錯呀，雖然我學校考試比佢哋高分 但去到dse都唔係辦法（畢竟有啲科唔係你背咗就高分）🥲🥲我真係覺得好無力…究竟係唔係有天份讀書先好啲？雖然呢個答案真係好現實，但係望住隔離嗰個天才冇溫過書先係低我幾分我真係覺得好唔開心
咁我當然唔係每一課都一定要溫咁多書先考得好…但數理科我真係要溫好耐先可以考得好🥲（每次UT之前我都要溫一個禮拜..但其他人溫兩三日就可以）
其他同學對我嘅印象都係「佢真係好勤力」「佢好乖嘅 有專心聽書 返到屋企又會溫書」而唔係「佢真係好醒目」。可能因為咁樣，所以我考得越高分會覺得自己越差，好驚下次會因為我溫得唔夠多所以原形畢露，比全世界知道其實我係一個蠢材。