#NSS家庭
[GUEST] 我就嚟頂唔順
–
我由細到大見屋企人嘅次數少之又少，佢哋一係就係公司，一係就唔喺香港，就算返屋企都淨係識不斷做嘢，我想同佢地講下嘢又話我煩住佢地趕我走。有時心情唔好又話我黑口黑面好煩。呢2年都冇返過嚟慶祝過任何節日，「生日快樂」呢句野我等左15年。
我發現喺學校受歡迎嘅人全部都超outgoing，我慢慢學識隱瞞自己嘅情緒，希望藉友情感受下親情。但係上年升中一先發現原來中學係另一個世界。就算真係扮到好outgoing都有好多人講你壞話，雖然小學都有，但係嚴重程度高幾倍。我又嘗試日日請人食好嘢飲好嘢買禮物比人希望識到朋友，點知的人會變左奉承。係我背後話我有屋企人生，得工人養、曬命日日請人食嘢等等，我先發現我呢種人真係唔配有朋友。
我想打比屋企人講下心事，但係每次既結果都係「呢度係XXX’s office，有咩可以幫到你？」我以為自己已經麻木咗，唔需要任何人陪我都冇問題，但原來我根本承受唔到壓力，又要考樂器，又要顧住學業同pe類嘅嘢，有時無端端又要學下傾生意，完全唔知我父母想我點，我已經好盡力做好每一件事，我只係想佢哋好好地陪我一日，真係一日就夠晒。
最近我開始越嚟越唔開心，我唔知我應該點做先好。我根本冇能力達成父母對我嘅期望，我只係想過平凡嘅日子，有朋友，有屋企人陪嘅日子。
sor 4 1999