#NSS學校
[GUEST] 哩篇嘢係想送比宜家啲讀書壓力大嘅學生。作為一個啱啱考完公開試嘅人應該都有資格講嘢掛😂 事先聲明我係香港讀但唔係考DSE嘅，不過直至中四為止都係讀DSE課程。
作為過來人其實都知過程真係好辛苦，好多時候都唔知為啲咩而讀書，因為我並無一個好明確嘅目標，亦都無特別特別想讀嘅科(來緊大學都係打算探索下先)。好多時候都會好怨恨香港嘅教育制度同埋風氣，即使我考嘅制度其實已經無DSE咁變態。
近排見到好多人都投稿話自己讀書好大壓力，而好多都只不過係初中生。我想講嘅係，其實你哋已經好叻，你哋已經好生性。唔洗急，你哋真係仲有時間追架。我知過程中成日都會覺得好迷惘，唔單只無動力讀，仲要有時讀完都根本無回報。我都試過架，做得最多past paper同埋一直以來成績最穩陣嘅一科，係公開試嗰陣衰咗😂 我梗係會唔甘心啦，不過我都努力緊嘗試去放低，所以我哋大家都要加油!
我阿媽就好開明嘅，會話「盡咗力就得架喇」，但我始終過唔到自己嗰關，搞到自己心理健康好差。就算身邊嘅人都鼓勵我話我好努力但我都係覺得自己未盡力，會諗「明明可以更加善用時間， 篤少陣手機架嘛」。但宜家嘅我諗返轉頭，其實又有邊個可以做到咁理想？我哋都係人，都有我哋嘅限制。當然，一定會存在住比我哋chur自己chur得更加犀利嘅人，但每個人嘅強項同承受力都唔同，而且我並唔覺得chur到連食飯沖涼瞓覺嘅時間都無係健康嘅行為。對自己寬容少少啦，你嘅健康好重要架，咁先可以享受公開試之後嘅人生。 :))
雖然我係過來人，但我都無辦法完完全全咁明白每一個學生嘅感受同情況，所以可能哩篇嘢都俾唔到啲咩力量你。同埋如果有人同一兩年嘅我講返同一番說話我都未必會接受😂
最後俾啲廢到痴線嘅讀書tips大家啦。有啲嘢真係永遠都讀唔入腦嘅我會直接做past paper，不過我唔知DSE咁做work唔work。亦都可以試下行來行去咁讀同埋真係出聲咁讀出來，當教書咁？雖然老土，但我覺得心態同精神都真係真係好重要，好多科學研究都有講過瞓覺嘅重要性，佢係幫你儲存新知識架，你狂溫唔瞓覺到頭來可能反而咩都記唔到入腦，壓力又更加大。(唔好意思真係好廢)
各位香港學生加油！但都要俾返啲時間自己抖下啊知無？
第一次投稿所以講嘢可能九唔搭八、語無倫次，講咗好多廢話添😂請見諒🙈
(Post ig thank you)