小女今年中三，由細都好想做社工類嘅工作，或者一d帶動正面氣氛嘅工作。但可惜父母並冇特別支持我呢個夢想，父母嘅諗法係認為社工並唔係應該當為首選嘅工作，因為佢哋認為做社工會令自己好大壓力，前途又唔廣闊，唔覺得我應該將呢個工作太理想化。
要講嘅話我認為自己父母未到怪獸家長嘅地步，我嘗試過同佢哋溝通，佢哋有仔細聆聽但始終未有太支持我，覺得我唔清楚呢份工作嘅辛酸之類。
父母希望我可以成為物理治療師呢類工作發展（佢哋冇強迫我，覺得我可以自己考慮）我知道父母係為我好，個人都唔反感呢項工作，但係依照我嘅成績，我嘅理科成績並唔係特別突出，我擔心自己並未有能力handle呢方面嘅事業，所以對自己嘅前路感到些許迷茫。
我承認自己並未有特別了解社工呢項工作，但我唔否認自己對呢份工作存有熱情。我而家開始唔知道自己應該點做，我應唔應該繼續有希望從事社工類工作嘅諗法，定係按照父母嘅已經嘗試提醒自己理科成績比較好？
小女語言能力不強希望可以表達到我想表達嘅嘢出嚟，希望可以睇下能唔能夠響呢個page搵到些微意見。sorry for 1999同埋錯字 ，希望就算我嘅內容有唔正確嘅地方都屌我屌細力d🙇🏻♀️辛苦各位願意認真睇嘅人睇到呢度，本文好冇冒犯任何工作嘅意思，如令您不適再次抱歉！唔該晒admin同各位！感謝！🙇🏻♀️🙇🏻♀️