#NSS個人
[ktgss ] 小弟第一次投稿，如果寫到一嚿嚿希望大家可以多多包容🙏🏽
小弟唔多朋友，身邊有個好朋友A，我當A係最好嘅朋友，而A比我感覺係好飄忽，有時令我覺得我只不過係佢其中一個朋友，有時令我覺得我係佢最好嘅朋友。成日都覺得我對佢係一個好朋友，佢對我就唔係。
成日見到其他同學同佢哋嘅好朋友都會經常約出街打波/打機/傾偈，但A放假嘅時候好少會搵我，一開始我以為A係因為放假唔想出街，淨係想喺屋企瞓覺打機，所以好少主動搵我。後尾，我發現A會同其他朋友出街、主動搵其他朋友打機同傾幾個鐘計，我就開始嬲、唔開心。因為每次都係我搵佢，但佢只會主動搵其他朋友而唔係我。
平時返學嘅時候，喺學校佢好少同其他朋友玩，通常大部份時間都會同我玩，我唔知大家明唔明嗰一種感覺。好似俾人當左係備胎咁但又唔係咁。
有時，我見身邊嘅朋友佢哋都會同佢哋最好嘅朋友講自己近況/全部發生嘅野。我都會同A講晒我發生嘅嘢而A只會同我講少少，好多佢唔會主動同我講，我亦都唔想主動問，因為如果每一次要我主動問佢佢先會同我講，我驚自己會經常疑惑究竟我同A係咪好朋友。
我覺得除咗係情侶，好朋友都應該要比安全感對方。如果我嘅諗法係唔啱，大家可以俾意見我同教我點樣同A講我嘅諗法。最後我知道A應該會睇到呢篇投稿，期望你會明白我嘅感受同睇完呢篇投稿覺得自己同A好似嘅人希望你哋明白我同同我好似嘅人嘅感受。