#NSS個人
[GUEST] Admin pls po ig thx
最近呢個禮拜都發一個一模一樣嘅夢。夢入邊嘅我坐咗喺一架冇目的地嘅電車，每日都有唔同嘅人喺我身邊經過，但係從來都冇人願意停落嚟陪我或者坐我隔離，最尾等我坐喺架電車瞓着咗，現實嘅我就會醒。我唔知佢係咩意思亦都唔想知，感覺都唔係好嘢。
回憶收到要留班嘅通知嗰陣，我表面上係冇咩反應同完全唔在意，但係內心世界實則已經崩塌。每次我都會安慰自己已經盡咗全力，可惜次次一諗到自己明明比起有啲人落力咁多結果都要留班就好無奈。留咗半年之後，我已經感覺自己係行屍走肉，甚至接近病態嘅感覺。每日返學都要扮到好開朗好友善咁真係好撚攰，無辦法啦要對住佢哋三年，一定唔可以得罪佢哋。返到屋企都係要扮冇事，一定唔可以令啊媽擔心，佢一個人照顧我已經好辛苦。我Form2嗰陣已經俾得太多麻煩俾任何人，所以一定要扮冇事，我一定可以頂到嘅。
直到有一次見到朋友嘅story係約咗其他人出去玩又冇約我就唔知點解sad咗，然後覺得應該要養啲寵物陪我。當晚就即刻同啊媽傾可唔可以養貓，但係傾傾下啊媽察覺到我嘅異常。就係當時因為我一直以「想有啲嘢可以陪我」
為理由。「啊女你係咪病病哋？」啊媽問我嗰陣，我嚇到呆咗。唔可以、一定唔可以俾人發現。「我冇事。」好彩咁答完之後啊媽都冇追問，件事亦都告一段落。
我覺得自己扮演住一個乖學生、好同學同埋一個懂事嘅女已經去到泯滅自我。有時我都會問自己到底邊忽係真實嘅，但係諗諗吓好似又真係冇。我好驚自己有一日照住塊鏡都唔知自己係邊個。其實我好希望有人可以救我，將我由個泥潭度拉返出嚟，但係一諗到跟本冇人會聽我講同理解我，就好似列車上面嘅人咁，所以我只可以喺扮演角色呢個泥潭度慢慢陷入去。
辛苦唒大家睇咗篇咁負嘅文