#NSS個人 [GUEST] 多謝admin揀咗我🙏 究竟點樣先可以處理好人際關係呢？ 講返背景先，咁我原本就有2個besties啦（小學已經好frd）咁簡稱A同B。咁今年我就唔係同佢兩個同班嘅，咁我就喺自己班識咗個新frd（簡稱C）。 首先講咗同AB嘅關係先。小學嘅時候係我同B frd先嘅，但機緣巧合之下我地三個就開始frd咗。去到中一我哋一路相處都好好。但問題嘅開端就係今年。咁因爲我唔係同佢哋同班，所以我自然就會喺新同學裏邊有一個較好朋友嘅人，而嗰個就係C。咁有一日返學嘅時候我就見到C，咁我就同佢一齊行，點知原來A同B喺我後面（我唔知嘅），之後同佢哋兩個放學嘅時候佢哋就開始講祕密。我問佢哋咩事佢哋都唔講。之後一路我都係同佢哋保持besties嘅關係，但我發現佢哋兩個好似開始疏遠我，有時佢哋會自己蹺住手走咗去，咁呢樣嘢固之然我係覺得唔舒服嘅，咁我都有嘗試去同佢哋兩個講，但係佢哋就好似左耳入右耳出咁樣，我唔知點樣可以有一個方法可以同佢哋相處得舒服。 然後就係我同C嘅關係。咁我哋係一齊坐埋所以熟咗嘅，咁一路我同佢嘅關係都係好正常，都係閨密嘅feel。我係一個好主動撩人哋吹水嘅人，一開始佢都會認真d覆我，唔知係咪因爲我真係太鍾意同人講嘢，所以佢開始hea覆我（但冇之後咁hea），但到後來發生咗一件事，我覺得係令我哋關係有d僵咗嘅事。事緣就係有日我同咗佢講我鍾意嘅人，點知原來我鍾意嗰個係佢地下情咗個幾月嘅男朋友。啱啱發生d咁嘅事關係點都會僵一兩日。但係之後我冇事搵佢吹水佢就開始好冷淡咁覆我（例如：「:/」「🌝」「hmm」）。 我覺得好無能爲力，其實我真係好想維繫每一段關係，我對待每一個朋友都係真心嘅，自認係一個好冇安全感嘅人，我好驚會突然所有朋友離開晒我。喺呢度我想請問大家有冇一啲建議係可以令每一段人際關係都令大家覺得舒服？或者有冇啲建議可以令我處理好呢啲朋輩之間嘅關係？
#NSS學業 [Guest] 是這樣的，小弟大半前同幾個同學一齊做咗學校IG secret嘅admin(followers大約有2000+人)，嗰陣以為自己一定搞得掂，應承屋企人會管理好自己先出投稿。但就喺2個月前，有同學出咗投稿講繁體字同簡體字，引嚟唔同同學嘅聲音，有D同學火上加油，一部分話要廢繁體字嘅投稿，一部分話廢簡體字，仲有一部分就覺得咩語言都可以除咗粗口全名，然後進行咗投票。結果係咩語言都可以，但之後投稿又變質，一邊鬧語言，一邊鬧政見同香港文化，不過為咗避免國安法，我哋選擇咗加警告，必要時唔出，但係好多投稿都太灰色地帶，無可能每個投稿都同其他admin傾好晒先出。最煩係唔理投稿講咩照出嘅話，我人生安全受威脅，唔出又俾人鬧，基本上而家係裏面內訌，外面打仗，但唔做又唔得，呢個時候請人根本無人會做，係人都知要執手尾，邊個會願意，進退兩難。但每日對住100+以上嘅投稿，內部admin又喺咁嘈，真心難頂。
#NSS愛情 [no] （文筆差，請見諒）我會用短文嚟講我同佢。 首先我同佢都係中學生 一開始佢喺我個friend個ig story度認識到我，我仲好記得佢dm我第一句係「hi,你都鍾意mirror？我整咗啲應援你要唔要？」我好果斷咁答我要，咁係因為我見到佢同我喺同一間學校同一個年級所以我先話要，到第二日我第一個小息就行咗出走廊搵佢，當我喺度望緊邊個係佢嘅時候。有一個冬菇頭，唔算太高嘅男仔行到我前面原來就係佢，但係唔知點解我一見到佢嘅嗰一刻我心動咗。其實我都唔知點解只係望到佢嘅第一眼我就鐘意咗佢， 然之後我就慢慢同佢越傾越多計直到我生日嗰一日我鼓起勇氣同佢表白原來佢都鍾意我而且佢有一個比較內向嘅人佢唔會主動搵我講完之後我就同咗一個識咗唔夠一個月嘅人一齊。我哋一齊之後晚晚都傾電話最少傾一個鐘頭，但係好可惜因為我哋太快一齊…我哋越嗌越多交。我好記得嗰一日係十二月二十號，我同佢同埋幾個朋友一齊出街跳舞，佢嗰一日全日冇同過我講嘢其實我都已經知咩事但係我選擇扮唔知。喺我哋休息緊嘅時候佢因為要補習所以走先，我就冇理到繼續跳舞，就喺晏晝嘅三點三十四分佢send whatsapp同我講分手，而我當時買緊嘢食所以冇睇到。直至我返到跳舞嗰度坐低一開電話就見到嗰句分手，我當場喊咗出嚟我啲friend行過嚟問我咩事我同佢我分咗手之後啲friend即刻打電話比佢係咁鬧佢係咁鬧佢，我返到屋企都係咁喊。 分咗手之後兩個月我已經放低咗件事，其實當時我已經預咗咁快一齊同佢會好快咁結束。所以我只係想講一句，我放低咗你架啦Nemo。 sorry
[guest] 小妹移民英國一年，喺香港嘅時候英文已經唔太好，嚟到呢度咁就自然難跟上進度啦，同埋我個人可能比較怕醜，唔敢係英國人面前大膽講英文，都唔敢同佢地傾計。 每日返學都冇咩機會練到英文，就係正正因為英文嘅問題，我好多科都好低分，有時候唔係唔想讀好書，係上堂嘅時候都根本聽唔明。所以感覺好挫敗。 嚟英國嘅香港人個個成績都好好，咁就大大反映到我嘅問題，我有時候放學返屋企都會溫返學過嘅嘢，好似phy同埋bio咁，全部嘢都係用英文學，我就記唔到啲生字，搞到我全部都好差 呢排成日諗，我會唔會真係唔係讀書嘅材料，點都好我自己都係覺得讀好書先有將來。我依家未出社會工作，單單係學校，成績好嘅學生特權多，受同學歡迎，受老師愛戴。我父母唔係對我唔好，佢地好想好想我讀好書，但凡我有少少成績佢地都會買好多我鍾意嘅嘢獎勵我。 唔知有冇人明白呢種心情，我都承認我依家未盡力做好我自己，但我已經俾呢種負面情緒困住咗好耐
#NSS學校 [九龍城某女子中學] 大家好，眾所周知，肥娥將我們的暑假提前到3月17，本身都覺得有啲嬲，但我的學校唔但止令我仲嬲，仲令我好無語 1.我地五星期的「暑假」功課高達52樣，仲要唔係開學先交，係每星期交啲，噉樣黎交，換言之，今個星期無做埋下星期嘅功課，你嘅星期六，日係需要係屋企乖乖地做功課架😀 2.我地嘅班主任會隨機某朝早打黎，佢話「我相信你地仍會早起身，所以我決定12點至2點之間打比你地」其實我今個「暑假」我冇諗住要早起身😊，我想通宵，朝早先訓，結果我幾點起身都要比佢管住。🙂班主任，我真係好L愛你😘 謝謝大家有耐心睇曬,thank you sor for1999
#NSS其他 [九龍一間啱啱升band2嘅女校] 今年學校嘅學生會，真係好少人支持佢哋，唔講呢啲，就講今次嗰活動，完全係描圖😅 學生會仲特登Post story 話「係原創 冇抄人嘅成份」，但之後俾人發現咗係一位日本人嘅畫作，已經係染出日本，前幾日仲有其他ig post過出嚟，染出日本仲唔夠，仲要染出香港
#NSS學校 [Guest] 小弟今年中五，中三識左4個朋友，我地成日玩傳說，但E家泥左個新人，佢本身玩電腦既，但為左同個4個人friend ，就加入左我地，然後佢玩得好過我小小😂，有一次個位滿曬，佢地就係我同佢之間選左佢，到左第二日，佢地覺得我好可憐，揾我打機，我都唔同佢地玩，我用手機壞左做藉口,因為我唔想成為一個笑話😂，E家已經過左一個月，我好懷念個段日子，但佢地揾番我，我都拒絕左。我唔想再發生二選一被拋棄😂，現在我自己一個打機😂，同佢地小左好多聯絡，雖然我好感恩遇到一個新朋友，佢肯同我傾計，討論學習，但我仲未完全忘記陪伴我兩三年既朋友。E加回想，真係有D可惜，我都唔知唔同佢地玩係咪正確既選擇，但現在我無友情既困擾😂，自娛自樂。 原諒就泥17歲，小氣又幼稚既我😂。
#NSS學業 [某愛國學校] 第一次投稿🙇🏻如有錯字請見諒 入正題先,話說我哋個數學老師好針對，呢排上緊zoom啦，咁第一堂就係數學堂啦，又有小測喎，小弟數學又差喎已經成日炒㗎啦，由於之前中肺炎又發燒請假都miss咗幾多嘢喎，有一題就唔係好明，咁就去問下人點樣做，結果比阿sir發現咗，直接落咗一個小過，佢話原本已經發現上次有人作弊，但係咩處分都冇，呢個已經唔係第一次見，之前有一次係成半班抄功課，佢只係講幾句就冇嘢，而我上次被人拿去抄反而係我記缺點，每次都係我罰最重，我就唔信會有人上zoom測驗冇睇過書同作弊囉😂你話大測同期考作弊記小過我冇嘢好講，一個小測抄咗一題記小過我頂唔順囉。 Sor for1999 唔該屌細力d🙇🏻🙇🏻🙇🏻
#NSS愛情 [GUEST] 唔知大家覺唔覺得拍咗拖同分咗手嘅人都真係會轉變呢？ 小妹05，仲記得之前約咗三個月左右冇見嘅成年朋友（有啲唔熟），嗰陣拍咗拖一個禮拜多啲（可能第一次拍拖會唔同啲？🤣），有兩個直頭話唔認得我，同我最熟嗰個話我成個人的確唔同咗，更加有氣質同埋有自信咗，但呢啲我其實一直都冇發現。 小妹有搣手指嘅習慣，但唔係肉包甲嘅情況，而係成日都搣指甲側邊啲皮，搞到啲皮好厚又損晒，指甲又唔靚，而且天生係婆婆手，皺紋好多，亦都唔滑。拍咗拖之後，因為有人拖，同埋唔想俾佢見到我啲指甲咁肉酸，會搽多咗hand cream同埋叫自己唔好搣。 ex身邊嘅女性朋友個個都會化妝，皮膚亦唔差，urmm小妹冇咁貪靚但係都未到放棄自己嘅狀態，但係都因為咁所以會開始修下眉、努力護膚、夾下眼睫毛、消下水腫咁 分手嘅時候喊得好甘，然後去咗做work out，做完之後可能真係因為安多芬嘅關係，真係會冇咁頹、冇咁sad。小妹其實都算自卑，即使分手嘅原因唔係因為佢覺得我唔靚或者太肥，自己都會成日同佢身邊嘅女性朋友比較，但之前一直都冇動力去維持。但係分手後持續做咗一段時間，分咗手一個月就輕咗5kg，咁啱疫情冇見朋友好耐，個個第一眼都一定係話cls你瘦咗好多。 不過…亦都因為分咗手，做好多嘢都變得有心冇力，例如上堂由唔聽書變得更加唔聽書，功課由唔做難嘅變到全部都唔做唔交
#NSS其他 [guest] 我近排有個煩惱，希望大家可以幫幫忙 首先介紹返家庭背景先，我讀中四嘅，細個好開朗活潑，直到小學媽媽出軌，屋企好似有啲唔同左，我開始好驚我阿爸阿媽。有一年我最好嘅朋友過左身，我心情受影響導致份成績表炒車，於事阿爸帶左我去黑社會嗰啲集合地方反思成日（詳細內容唔多講），自己就係遠處唔知去左邊。個陣嘅我仲好細個，有好幾次啲黑社會份子想埋我身，嚇到我隔左咁多年都會每幾個月就發一次關於個次經歷嘅惡夢。之後我就做咩都小心翼翼，好驚做錯少少又要返去企。呢件事除左阿爸阿媽同我冇人知道，佢地話如果我講左出去我就死得。 近幾年發現阿媽有抑鬱症，佢以前成日飲酒，搞失蹤，凌晨先返屋企，亦都嘗試過跳樓，勒死自己，不過俾老豆攔住，最後都肯接受治療. 近呢段時間阿媽情緒穩定左好多，屋企人關係都好左，我都冇咁擔心。 有陣時，我都幾恨佢地，因為係屋企好冇安全感，而且冇一個親戚係知情嘅。 呢啲嘢我全部都唔講得出去，小學時候就唔識處理情緒，自己為左唔發洩係朋友身上就自動遠離左佢地，狀態比較負面。中三我轉左校，識左班新frd，可能係叛逆期嘅關係，同左兩三個frd講屋企嘅野，不過都係講左1/3，其餘嘅人都唔知情。係學校我以活潑開朗方式示人。而我係屋企都係笑口常開咁對住阿爸阿媽。但係佢地唔知道其實我根本就係帶住面具做人，深夜會掉鉸剪，隔日匿埋喊，感覺情緒失控嘅時候就咬自己。 所有人青春期都會有脾氣㗎啦，我唸多數人就發洩係屋企人身上。但係我就因為以前嘅經歷嚇親所以成世都未試過同屋企人駁嘴，咪話青春期啦。於是，我就會不經意咁樣發洩係同學身上。我會無啦啦係大家講緊野個陣拍台走人，事後朋友問返我我就會以肚疼胃藉口。以前我都唔知自己咁、但係近排同媽媽關係變好返少少，多左時間反思，先發現自己對朋友嘅態度唔正常。我唔會當面話佢地或者做任何過界嘅嘢，佢地都覺得我好開朗好好人嘅，但係就得我知道自己好腹黑。我好似發現自己唔妥得太遲，因為感覺上啲朋友都發現我有所改變 ，開始疏遠我，但我又無敢問佢地發生乜事。我好攰，唔想再戴面具做人，有陣時會唸點解我會有一個正面嘅小朋友變到咁？請問我可以點樣適當發洩情緒，keep住呢份友誼，留住班frd？
© 2023 NSS Secrets, Seven Sisters Network Limited. All Rights Reserved.
Text is available under the CC-BY-SA 3.0 License. Additional terms may apply.