#NSS愛情 [Guest] 我只係想分享一下自己既故事 :0 從小學開始，我同 朋友A(女）同 朋友B (男）一直都係彼此最好既朋友，生活中嘅大事小事都會一齊分享。 小學畢業之後，我哋都好有緣咁入咗同一間名校，由於我哋嘅成績都唔錯，所以一直都係同一個精英班，見面嘅機會好多，有時放假都會約埋一齊出去玩。 朋友A 為人好nice好溫暖 亦都幾靚 ，同佢相處耐咗慢慢地就對佢有好感，但可惜嘅係佢同我同 朋友B 話佢同屋企人打算之後移民到外國生活，所以我一直都冇同佢講我嘅心意 （因為我覺得我哋之間冇可能） 朋友B 知道 朋友A 要移民之後唔耐，他就起夜晚WhatsApp 我話佢鍾意咗 朋友A 唔知向唔向佢表白好。我當時完全不知所措，諗咗好耐，只好鼓勵佢去。（果晚我失眠咗好耐） 第二日放學，我自己行咗另一條路返屋企，冇同佢地一齊行。果然，朋友B 同佢表白成功，但佢哋都知道一年半之後大家就會起唔同嘅國家生活，所以佢哋都冇起埋一起。對於呢件事，我完全唔知要用咩心情去面對。
#NSS學業 [Guest] 就係咁嘅，小妹今年中三，咁而家就放緊呢個嘅「暑假」，學校係放完暑假之後安排咗三日嘅小測，咁我係一個成績極差嘅人，中三要揀科，對於呢件事好煩惱，好驚自己行錯每一步都會影響到之後嘅人生或者學習？睇到依度可能大家都會叫我溫書，有嘅，呢個假期都勤力咗溫書，但係始終都係要睇吓到時嘅發揮，雖然呢個嘅小測應該唔會佔太大嘅分數，但係都係想盡力去測好。佔得比較多嘅應該係學期尾嘅考試，上學期好似已經佔咗40%，咁唯有喺下學期嘅平均分或者考試拉返。問題嚟啦，小妹目前對揀科呢樣嘢毫無概念😭，上網都係睇得多話跟住自己嘅興趣揀,或者第時想做啲乜嘢。興趣呢講真每一科我都冇乜，想學關於心理嘅嘢，但係中學當然冇呢一課學啦，跟住就轉咗目標準econ(主要係因為好似econ對工作有幫助)，咁我學校就未介紹過econ要讀啲乜嘢🥲，上網睇又好似唔定，所以希望大家比下意見🙏🏻econ但佢要學啲乜嘢同埋搭咩科最好（冇咁難讀嗰啲因為始終成績比較差，就算想揀都未必揀到👋🏻）或者大家有冇讀緊啲咩科推介下大概讀啲咩或者點樣搭配，萬分感謝！ Sor for 1999 Thanks admins po ig 🙇🏻♀️
#NSS個人 [九龍城某中學] 話說最近我有個朋友要移民，真係勁唔開心勁唔捨得。佢係我中學嘅第一個朋友，我哋做咗friend都有成四年。最近佢突然之間同我講佢要移民，離開香港，又話已經退咗學。當下我嘅心情真係勁驚訝，我從來都冇諗過呢啲事會發生係我身上。諗吓諗吓我突喊咗出嚟，喊左有半個鐘，真係勁唔捨得佢。但係好奇怪嘅係，我問過佢身邊嘅朋友，佢哋都冇喊，而且嗰個人唔係我最親嘅朋友。我喺學校唔係一個好入群嘅人，而佢就係一個好外向嘅人。所以我啱啱入嚟讀呢間學校嘅時候，佢都幫咗我好多。我依家成日都會喺度諗返學嗰陣時冇咗佢之後會變成點，成日都越諗越唔開心，搞到我冇心機做其他嘢。我都有嘗試去接受，但係一時三刻真係適應唔到。再加埋呢個疫情，可能連係佢離開香港之前同佢見個面都唔得，搞到我呢排成日都好唔開心，日日都諗住呢件事。我應該點做⋯⋯
#NSS其他 [guest] 長文慎入 係咁的，我今日搭地鐵去旺角，因為疫情冇咩人，個車廂只有幾丁友。有個哥仔上左車，當時我右手邊一個人都冇，全部吉位，個哥仔環顧四周之後坐咗係我隔離個位。當下我嘅第六感同我講要小心。果不其然，1分鐘都冇就開始搞小動作，開始扮打電話一邊摸我大俾。一次兩次我就算，一而再再而三試探性嘅摸我真係忍無可忍，於是我就一嘢搭上咗呢位哥仔嘅膊頭問：好唔好摸啊？然後呢位哥仔就彈起身。笑死仲要話我無中生有，離嗮大譜。我就開始鬧人，扯住佢件衫鬧。我話你真係以為我唔知？呢度有人證有人睇到巴拉巴拉。我估計嗰陣時我鬧佢嘅聲音應該兩節車廂都聽到，佢以為自己好高其實我覺得佢連170都冇，仲要係度用身高由高到低想要壓我（指氣場），笑死我直接兇翻去，真係我唔發威你就當我係Hello Kitty係唔係？摸人大俾唔認仲要咁大聲反駁話冇做過，真係笑死我。哥仔以為自己大聲就係啱。 好好彩坐係我對面個大哥好好人，自己打緊電話都幫我，就叫個哥仔落車去搵客服報警處理。落咗車之後個哥仔越行越快，個大哥就叫住佢。停係停咗，但個位非禮我嘅哥仔就好似腦殘咁大我話報警啊，我唔驚之類，然後將自己身份證攞出黎，我就攞手機去影啦，佢隻手又縮得幾快下，真係笑死我。因為太嬲所以有啲片段唔記得咗，不過最後調解，呢位哥仔90度鞠躬道歉。我之後同幫我個個大哥道謝都帶好深的怨氣(主要係一時間調節唔到情緒）嬲到手都震埋，真心好嘔心。（語無倫次） 我想講而家啲人睇落去五官端正，白白淨淨，青靚白淨，斯斯文文都會做埋呢啲嘢，真的很嘔心。如果唔係我腳痛我早就起身換位了。順帶一提我著衫著得好頹，就波鞋加短褲（學校運動褲短啲嘅普通短牛仔褲）加上一件長袖連帽外套，拉鏈拉上去到心口位。就真的認真嗎？精蟲上腦？我甚至係熬夜成個星期加素顏？？？個look頹到咁都可以遇到咁嘅人真的無語到極地。可能有人就話，你露得你隻腳出黎你就預咗俾人睇或者俾人摸啦巴拉巴拉之類。唔該用下個腦，而家係唔係古代？而家21世紀啦唔該，邊個再講埋呢啲咁嘅冇腦說話我就真係覺得你好好笑，係咩封建思想？？我只會替你覺得可悲：） 我喺度提醒大家，無論係男仔或者女仔，一定要小心周圍的人。尤其是係有人開始有意無意咁接近你身邊並且企圖或意圖做齷齪事嘅人。雖然我知道冇可能有預知能力，但係只可以盡可能避免。有時候自己的第六感都係一個好好的工具。另外大吉利是講一句，如果當真係咁唔好彩有人非禮的話保持冷靜，拍片影低罪證，然後捉住隻手大聲叫非禮或者大聲質問你做緊咩之類。氣勢要夠，唔好驚，宜家好多人都唔夠膽出聲。男仔就可能擔心面子所以就默默啞忍，女仔的話就怕，唔敢出聲。我同你哋講，唔好怕，香港地好心人很多，講出黎一定有人會幫手，只怕你唔講。 最後再次多謝出手相助嘅個位大哥，如果可以的話真的想講多次多謝。大家都要小心宜家啲變態，光天化日都可以做埋呢啲事真心離譜。願大家唔會遇到呢啲人。
#NSS個人 [Guest] 「其實咁樣真係令到人好煩惱」 Hi小妹今年form4,有件事想問下大家意見，咁前排見到個post話俾異性朋友鐘意好煩惱，我自己身同感受，所以有感而發。 之前同佢一直處於同學狀態，唔係好熟。但之後我同佢陰差陽錯咁喺同一間補習社補習，就慢慢變咗朋友。真係完全係朋友嗰種。到後來佢會成日搵我傾無聊嘢，又逼我同佢打機（我本身係唔打機 佢係咁叫我陪佢打機 我懶得再同佢對抗就同佢打咗一排 之後就搵籍口拒絕）成日問我一唔一齊跑步，話自己邊緣人冇人同佢玩叫我陪佢，又趁機喺班同學面前話想同我一齊，我就知瀨嘢喇。 咁我就即刻遠離佢，完全唔俾假希望佢，但佢成日無啦啦走嚟暗串我係渣女，但我乜都冇做過。可能係因為我不嬲唔係嗰隻日日攞住部手機等人搵我嗰隻，佢經常訊息轟炸我，我一冇覆佢message佢就問我係咪真係好憎佢，佢係唔係好煩，我有同佢講過「係，唔係人人都得閑到攞住部手機等人搵，我都有嘢要做，有嘢想做，但我要做同想做嘅一定唔包括全天候等你嚟搵我」當然都有更mean咁鬧過佢，但佢send個😂俾我之後就扮冇事發生，繼續煩我。 之後佢同我住同一個屋苑，日日朝頭早就喺我屋企樓下等我。喺學校佢周圍同人講佢鐘意我，之後佢個frd日日帶頭起哄，搞到全班一有機會就起哄，老師一叫佢個名就起哄「表白表白」一叫我叫名就起哄「應承佢應承佢」搞到我好尷尬，啲老師完全唔理，由得佢哋起哄。 最後，我同佢因為係steam team 經常要一齊參加比賽，佢係leader，即係佢係最capable嗰個，個老師叫我哋班teammate盡量做到自己team解決問題，所以我有時都會問佢嘢。我驚如果我依加Block佢佢會唱我過橋抽板，利用完佢就飛起佢。所以我應該點做？
#NSS個人 [PRE-抑鬱症患者] 距離上次行街，已經係年初一嘅事🙃 如題，我已經差唔多兩個月冇行街。而年初一嗰次甚至係我喺屋企一直黑面一直話「年初一要出去行大運」，屋企人先俾我出。點知幾個月前同而家相比，簡直係小巫見大巫😵💫 可能有人會問：「你點樣可以足不出門兩個月😨」以我為例，呢排「暑假」我日日都上Duolingo(P.S.唔係ads)學法文，一次個幾鐘左右。剩低嘅時間大概係趕晒啲功課先，或者睇書；再唔係就玩健身環。總之就係渾渾噩噩咁過日子😑 今日問咗阿媽，問佢幾時再俾我出街。點知佢話：「百幾宗或者清零先。」我即刻嚇到喺張床度彈起，擘大對眼望住佢🙂識嘅人類其實已經可以出街，有啲甚至係一直都冇停過；而我就淨係可以困係間屋入面。如果係咁嘅生活，咁我寧願入jail幾個月，起碼可以出戶外放下風先😇 往好嘅方面諗，呢個「暑假」可以趁機improve下自己。但如果咁樣落去，我諗我應該會有精神病，入青山(or小欖)🙄