#NSS個人 [GUEST] 先感謝admin出Po🙇🏼 長文慎入。 我覺得我自己好似壞左。 其實我由細到大，無論係身邊嘅屋企人/朋友，又或是老師/同學，大家都會覺得我係一個好外向好活潑好健談嘅人。就連我自己對此都深信不疑，所以我過往都一直好熱衷於去參加唔同嘅活動，去認識更多嘅人。 但係升左高中之後，我好似變左好多。我開始越來越靜，一開頭係慢慢咁冇咁積極咁去參加課餘活動；跟住就開始唔係咁中意識新嘅朋友；再後來就係同原本一直玩的好Frd嘅朋友疏遠；最後去到宜家，我係已經好驚同人交流，就算係Frd同我講野我都冇辦法直視對方，或者係不太肯同佢地一齊出街。 其實我真係唔明點解我會變成咁，我其實好中意同我啲Frd一齊去玩去吹水，因為佢地之前一直係我最低谷最唔開心嘅時候一直陪住我。我知道佢地好好，所以我都想好似佢地對我咁去對翻佢地好。但係我宜家唔單止係冇辦法直接同人交流，因為人地同我講野個陣我成日都因為驚而搵藉口即刻走；有陣時我企係條街度都會覺得有種莫名嘅恐慌感，而我唔知呢種感覺係從何而來………除左恐懼社交之外，我同時好似對一切事物都失去興趣/感受。以前我都會好中意好中意打機/睇小說動漫，但係宜家我對呢啲同樣都失去興趣（我就來連飯都可以放棄唔食，但係我以前固定一日六餐風雨不變，宜家一日兩餐/一餐，或者直接唔食）；又或者係我被人蝦/被屋企人無故指責個陣我都已經唔會嬲同委屈，連眼淚都冇多滴。我真係唔知自己發生左啲乜，我好似變緊做一個冇心嘅怪物……………. 係我發現自己唔多對路之後，我有搵過啲Frd去傾，傾下係因為乜野原因令到我變成咁。我啲Frd話有可能係因為家庭原因令到我對好多野冇嗮興趣，得閒同佢地多啲出去玩，咁我就會feel到呢個世界嘅美好，就會重新中意呢個世界。當然，我有跟住佢地比嘅建議去做。就係嗰次傾完之後，我同佢地去左睇海同埋去OP玩，跟住又去左幾次我之前一直好想去嘅餐廳。但係我覺得我辜負左佢嘅期望，因為我就算做左好多我之前一直想做嘅野，我都係依舊對乜都冇興趣，甚至開始厭煩呢一切。我真係覺得我自己好垃圾，折磨自己都算，仲要浪費佢地嘅一片苦心。 就係呢件事之後，我有一個Frd特登私下搵左我傾左好耐好耐。佢話，之前嘅我比佢嘅感覺係嗰種陽光活潑嘅外向派；而家嘅我就好似虛無一片，對乜都冇感覺，就來坐化成佛（雖然我的確有同佢地認真探討過我有諗過出家呢件事）。佢好擔心我就咁困住唔識行翻出來，最後一下諗唔開就咁同呢個世界say goodbye，但係我唔知點回應佢，因為我係低谷時期的確有嘗試逃離呢個世界。我只可以答佢，話我宜家冇呢個念頭。如果我有，我會講，到時候就要麻煩佢提一提我，我曾經仲有好多願望未實現。 我真係，真係唔知點解我會變成咁。我有上網搵過一啲簡單嘅情緒病自我評估問卷做，結果係我一切安好。宜家我入左U，year1，咁樣嘅狀況令到我同啲同學格格不入。人地個個已經係抱團玩緊，我仲係自己一個獨來獨往，比人笑我係怪人。我知佢地笑我怪唔係冇原因，只不過原因係出於我自身。但係我又可以點？最少我目前好慶幸嘅就係我清晰咁知道，即使我已經失去活係呢個世界上嘅興趣，但係我仲想繼續做個人。 多謝睇到呢度嘅你，同時亦都Sor for1999。
#NSS學校 [某 band 1 名校] 事緣我喺舊年識到個玩同一隻冷門 game 嘅同學，見佢同我志同道合，就做咗 friend，我深入了解後發現原來佢家境唔好，更加有啲罕見病。 一開始我哋成日一齊打機、傾偈，都幾開心，但係到咗今年 5 月，成件事唔同曬。 有一日，佢話佢要溫書預備大考，要我幫佢每日登入攞獎勵。之後仲得寸進尺，要我幫佢每日幫佢打幾多機，攞幾多積分。當時因為大家係朋友，所以冇計較咁多，我溫完書就幫佢打機，好彩我嘅成績冇因為咁差咗。之後暑假佢更加過分，佢每日叫我幫佢剪打機片上 IG（我的剪接技術不錯），仲要幫佢諗 hashtag，已經攰到七彩，佢見我粉絲多過佢，就叫我直播宣傳佢個 account，佢粉絲無多到又怪我冇盡力宣傳。 今年我哋終於轉咗班，我每見到佢就會避開，但係佢間唔中都會搵我幫佢做嘢。 其實我知道佢喺度利用我，但係我見佢咁慘，又唔捨得拒絕佢，令佢雪上加霜，希望各位會畀啲意見我🙏 Sor for 1999 第一次投稿，求 po ig
#NSS學業 [band1c~b] 今日聽完某位阿sir講d入大學嘅事情，又上年查咗d資訊，突然好迷茫~ 我form2，中精班，原大諗住揀科都係揀文科，但係今日查咗D information，有D驚係未來就算讀到大學，都要乞食。尤其依家d科技日新月異，相信好快好多文科工作都被機械取代。我當大概9年後仲有教師職業，我自己好唔鐘意對D密密麻麻嘅卷。 與此同時，我理科有唔掂喎，今年學嘅第一課由unit 8.1~8.7(教electric ) 我一句都聽唔明，好亂~但係我係form1 is唔算好差，D test exam都合格。 有冇d有經驗嘅人士可以比d意見我？thxxxx (*¯︶¯*)
#NSS個人 [冇男仔同自己表白係咪正常] 呢邊今年中五 , 班上面已經有唔少同學拍緊拖 , 但我都目前為止都好似賣淨蔗咁…… 我嘅性格好率直, 好多人都話我講嘢成日唔經大腦, 但其實對我嚟講我都唔知咩為之經大腦🙈 我笑點好低, 勁冷嘅笑話都笑得出, 仲要係哈哈大笑嗰隻😭 同埋好鐘意可愛嘅嘢 , 於是大家就笑我好奇怪, 我想改但又唔知可以點改…
#NSS社會 [沙田某間學校] 點解女仔著瑜珈褲就唔得? 點解女仔著短裙又唔得? 點解女仔咩個斜咩袋都會畀人話係有機心? 點解女性一表達關於平權嘅事,啲男人就話佢哋係女權撚? 每次見到呢啲嘢都好唔開心,點解連女性想著咩衫都要管人哋,著得暴露少少又話人哋有機心,而家連孭個斜孭袋都話人哋有機心,癲㗎!每個人都有自己嘅衣著自由,但點解偏偏女性就會因為呢啲嘢而畀人話?而且點解次次一講到女性就話人哋係死港女、雞、臭X、女權撚?其實有時都未了解清楚件事就喺度亂咁話啲女性,真係非常唔好!其實大部分香港女仔都冇乜嘢,點解係都要將某D衰嘅女仔嘅行為講到好似全香港嘅女性都係港女都係雞呢? 利申:我唔係支持女權,我係支持性別平權嘅,希望男性同女性都可以受到平等對待。