#NSS個人 [Guest ] 我今年14歲，自覺好多嘢都會明白，都比同齡嘅成熟 咁因為由細到大媽咪爹哋都會同我講最真實嘅嘢，咁就令到我好明白人情世故，亦都因為咁，覺得自己比同齡嘅都比較成熟 因為其實有時，同啲friend傾偈，有啲嘢佢哋真係唔明，例如佢哋係會覺得爹哋媽咪佢哋好差，但事實上其實唔係，佢覺得爹哋媽咪對佢哋差嘅原因只不過係因為想佢考好啲，同埋佢哋平時一家人都好融洽，同埋有陣時佢哋都有自殺傾向，但係誘因只不過係好少嘅一件事，佢哋雖然話就話想自殺，但係其實只不過係講下 又或者有陣時，我知道我咁樣講嘢會激嬲人，但係都會講，亦都知道人哋下一步會點做，可能你會講我只不過係比較直率，但係因為自己平時鍾意同大人傾偈多啲，所以都明白一啲經濟上或者感情上嘅嘢，亦都因為佢知同朋友講嘢太過沉悶，講嚟講去都係嗰啲，所以真心鍾意同大人傾偈，但係另一個問題又來啦，我一開始同啲大人傾偈，佢哋都會當係小朋友咁對待，去到某一個程度之後，佢哋先會好打開心窗同我講，但係嗰段過渡期真係好難頂，佢哋真係當小朋友咁 想知道邊度可以搵到一啲比較成熟嘅人🙌
#NSS家庭 [GUEST] 呢排阿媽成日都話我沉迷睇手機，其實我平時用手機主要都係用whatsapp, 有時睇吓ig咁，每日用兩個鐘以內，以現代人嚟講應該算少，咁而家放暑假呀嘛，阿媽又唔俾我成日喺房，我咪出客廳囉，我喺客廳睇whatsapp唔夠15分鐘，佢又話我睇手機睇咗好耐，大佬呀，而家暑假，你又唔俾我出街同同學打波，唔係連whatsapp傾吓計都唔得呀，我平時睇電視同用notebook睇youtube你都唔理，而家睇嗰10分鐘手機你又話，其實我之前無意中睇過阿媽手機嘅螢幕使用時間，佢每日用手機至少五個鐘，我用得少你咁多你都話，我真係唔知點算，暑假咁耐，冇理由唔用whatsapp㗎，想問吓大家有啲咩方法可以俾我阿媽接受我睇whatsapp？
#NSS個人 [GUEST] 雖然唔關事，但希望大家支持香港人梁卓瀅 佢係一個土生土長嘅香港人，佢為咗追夢連工都辭咗去咗韓國做練習生，佢依家參加緊一個survival show Girls planets 999，希望大家可以支持投票畀佢，佢嘅唱功同跳舞都非常好，導師亦讚佢好穩定，絕對有資格出道，但mnet實在比太少鏡頭佢，所以希望大家可以支持佢令到佢夢想成真。 點樣投票或支持佢： 1.download universe係cell voting同individual voting投票畀佢 每日可以投一次 2.去youtube睇梁卓瀅嘅famcam 只要打leung cheukying就會搵到 *完整觀看MV，不能暫停也不能快轉*咁先可以刷到片 唔該晒大家同admin🙏🏻
#NSS家庭 [GUEST] 我投稿係因為已經忍咗好耐，再唔講真係會癲，所以篇文純發洩(長文慎入) 希望admin po ig 小妹今年升f2，f1嘅成績自問一直都叫ok，淨係試過1-2科fail，我覺得fail 1-2科對中學生嚟講好正常，但係我阿媽唔係咁諗 之前同佢講fail咗嗰陣佢即刻好嬲，又鬧我冇認真讀書，又話我廢柴，跟住又拉埋一堆唔關事嘅嘢嚟講，例如會拎我小學同學嚟同我比較，話「睇下人哋成績幾好，全科合格仲有級第一名，點解人哋做到你做唔到？就係因為你懶散，日日放假唔做嘢淨係識打機瞓覺，終於肯做嘢嗰陣又帶住個耳機喺度聽歌，搞到分哂心咁咪做唔到嘢囉咪冇好成績囉」blablabla，之後仲有啲仲難聽嘅嘢就唔打出嚟 唔只中學，小學嗰陣已經係咁，星期六日唔俾我出街逼我喺屋企溫習，考試前夕一樣唔比出街，好啦考完試諗住同同學出去玩下放鬆下，又搵一大堆理由唔比我出去，有次我試過無視佢，同佢講低咗聲就出咗去，結果佢夜晚鎖咗門，唔俾我入屋(佢唔比鎖匙我，話比咗我就會成日出街到好夜先返)，結果嗰晚我去咗同學到瞓 細個嗰陣又不停灌輸一個概念比我就係考試一定要攞全級頭三，咁細個未識咁多嘢就跟住佢要求去做，一二年級嗰陣的確有做到次次全級頭三，到三年級開始識多咗嘢，明白到原來佢一直以嚟講嘅嘢都係錯嘅，只會令我變成一個淨係識讀書嘅書蟲，所以我開始反抗。當然，小學啲嘢勁簡單咁我都照次次考到全級頭三，但佢又話我懶咗，開始唔溫書淨係識玩。的確我係冇之前溫得咁癲，但我考到頭三咪得囉，咁多要求做咩啫。 到而家我做緊暑假功課，咁我個人不嬲係要聽住歌先專心到，唔聽反而會分心，可能有啲奇怪但的確係咁 咁佢話我聽歌分心嗰陣我有同佢講返個原因，但佢死都唔聽，一直認為自己嘅諗法先係咁嘅，於是就次次做親功課都鬧我一餐 同埋講起做功課，因為佢唔比我鎖門就係為咗隨時入嚟突擊檢查(其實我間房有裝cam佢唔使入嚟都check到)，有時有啲功課係要上網check資料或者係grp project，咁一定要用手機，但係佢一見到我用手機就鬧我打機唔做嘢，我有show個mon同啲分頁比佢睇，佢又係唔信，話我掃走咗個game嘅分頁先比佢睇，跟住又鬧一餐，所以之後我直接鎖門，佢點敲門我都唔理，當然佢搵鎖匙開就另計，開完同上面結果一樣。 咁耐以嚟一直咁樣比佢控制住，完全係冇哂自由，仲要成日比佢屈(我最接受唔到就係比人屈)，其實我知我開始有病，亦有諗過介手，不過係同frd傾完之後好咗啲先冇介到 frd都有建議過我搵社工，但係就算講咗唔好同家長講，但因為之前有frd試過被社工同家長爆料結果比人打咗一身，我知我阿媽有少少暴力傾向，不過佢冇試過喺我面前表現出嚟咁解，所以我都唔係好敢搵社工，到而家都係有時同frd傾或者自己收埋喊。 好啦終於發洩完，如果有睇哂嘅多謝你，另外麻煩哂admin
#NSS個人 [GUEST] （呢篇之前向過 貴專頁投稿，但係無論喺ig定係NSS網頁都無刊登，所以重新投過一次） 小弟之前向過 貴專頁投稿，表達自己大學想讀動畫嘅意願。屋企人睇到篇帖文之後就搵咗小弟傾小弟嘅學業。呢度先講下自己預備作品集嘅進度。小弟因爲好遲先至決定自己呢個志向（中五下學期），之前除咗學校視藝堂之外平時完全無畫過畫，而小弟亦自認平時一啲都唔自覺勤力，學校功課都係「臨急抱佛腳」，唔到交之前嗰日都唔會開始做。小弟知道自己已經遲過其他想讀藝術嘅人好多開始學畫畫，希望可以喺剩低嘅一年裏面儘快練好基本畫功，練得幾多得幾多，至少足夠自己完成作品集。而小弟自認自己喺練畫畫方面都唔會自覺，如果無人哋督促鞭策嘅話，可能到咗文憑試放榜仍然未開始練畫畫。所以小弟喺今年五月成功說服屋企人，畀小弟喺今個暑假喺一間畫室上電繪班，同喺另一間畫室上素描班，希望有人推動小弟之後，自己可以有系統地學習畫畫。 但係宜家，屋企人要求小弟專注學業，力求喺來屆文憑試中考過大學收生要求，唔畀小弟開學之後繼續上畫班。小弟好擔心「斷纜」之後，會無咗動力抽時間自己練畫畫。雖然屋企人應承咗小弟考完文憑試之後就會畀小弟重新上返畫班，想幾密集就幾密集，但係小弟都唔係心甘情願，原因如下： 小弟問咗屋企人下年嘅文憑試幾多號開考，渠答小弟四月二十號。（而小弟後來上網查返都真係呢日開考）小弟霎時間即刻大發雷霆，對屋企人發脾氣。小弟緊係知道呢個唔關屋企人事，但係小弟當刻好嬲考評局，但係完全無能力反制，所以選擇咗遷怒屋企人。小弟當時心諗：考評局，你真係完全無理會過考生（包括小弟）嘅感受。你又是將考試日期延後咗一個月。咁你遲咗開考，我哋咪遲咗考完？（廢話sorry）你知唔知道，我哋考完試之後，有啲會同朋友去外國旅行放鬆下（如果到時疫情完全消失咗嘅話），有啲會報名上外文班，希望到時喺大學修minor時，個GPA唔會俾人拉低，有啲會上網查資料，準備定大學面試題目。而對於小弟來講，呢個就係最後畀小弟趕製完份作品集嘅機會，簡直係一分一秒都要好好把握。但係宜家考評局你要小弟遲考完，係唔係即係少咗一個月畀小弟做作品集呢？小弟查過浸大電影學院嘅官方網頁，但係渠無講幾多月面試，所以小弟唯有當係放榜之前就會面試。如果最壞情況，間浸大係文憑試一完咗就面試，小弟係唔係就會完全再無時間衝刺呢？ 而嶺大嘅就重衰。渠十二月七號就會截止報名，而且份作品集要喺報名時就一併交上去。（如果今年度同上年度一樣嘅話）喺停咗畫班嘅情況下，小弟覺得自己喺截止日期之前可以完成到份作品集嘅機會好渺茫。咁嘅話，小弟就會少咗一個選擇。 小弟意願係想開學之後繼續上畫班，因爲小弟知道自己仍然未培養到自己練畫畫嘅習慣嘅，而小弟覺得繼續上堂會幫助到我養成習慣嘅。但係小弟始終做唔到以行動證明畀屋企人睇，自己上畫班嘅同時，係唔會影響自己喺學校嘅進度嘅。所以都無奈地聽屋企人話停咗畫班。 （呢段純分享，只係抒發自己感受，希望大家唔好鬧我）當然，小弟知道好多中學生都係自學畫畫，無喺出面上過堂。但係小弟有嚴重沈迷上網，每日一放學返到屋企都會即刻渣住部電話上Facebook、ig呢啲社交平臺，上到流連忘返，樂不思蜀，就算做功課都係邊拿住電話邊做，更加唔會記得要練畫畫。最近小弟都開始嘗試每日落自修室，喺無網絡嘅環境下做功課。（我每次落自修室都唔會帶手提電話或者其他上網裝置落去嘅）希望我可以堅持落去，畀自己有方法專心做晒所有學校功課啦！唉！總括來講，小弟就係畀得太多藉口自己唔行動，然後到咗最後一事無成時就會後悔。 希望小弟嘅學校社工會睇到呢篇投稿，然後同返屋企人傾點樣小弟先可以同時兼顧學業同準備作品集。 Sorry for 1999 & 自相矛盾