#NSS學校 [CPU] 最近考慮緊退唔退學校嘅管弦樂團，所以就想喺到聽下大家嘅意見。如果我有咩地方係做得唔啱，唔該屌少力啲。同埋唔該呢間學校嘅護航狗唔好沖出來吠俾人笑，你哋有個好好嘅校園生活唔代表個個同學都有。 講講背景先：我係F1嗰陣加入管弦樂團，做第三小提琴。可能係管弦樂團以前一直拎唔到獎為學校爭光，所以唔係好受人重視，音樂主任都唔理我哋，最多學校有典禮嗰陣叫我哋上台拉下歌。因為咁，我哋樂團成日好少人返。但即使係咁，我都好鍾意樂團同指揮日日返去練習，因為練習嗰陣好輕鬆自由，會試下拉唔同嘅歌玩，講下笑，有時會參加比賽攞下豬肉獎。 而我嗰陣時嘅夢想係做樂團裡面嘅第一小提琴，所以我都好努力咁拉歌。用咗兩年時間，我終於俾指揮賞識，F2做咗第一小提琴。 但好景不常，好快就爆出疫情，實體樂團練習變咗zoom，仲要做埋啲project（拍自己拉緊樂器嘅片，然後俾指揮攞去合成一首歌）即使我好憎上zoom同做呢啲project，我都繼續日日上zoom練習（嗰陣時好多人乘機唔返）同拍片（雖然條片我唔小心用錯咗方式來拍，我都即刻問指揮使唔使再拍，但指揮話唔使）幾經辛苦，條片終於合成咗出來（但條片裡面無我，但我無hard feeling，只係覺得係我拍錯條片所以指揮無擺我條片上去），咁呢個時候指揮就話做呢啲project嘅原因係音樂主任嘅意思（而就係呢個時候，音樂主任就開始管我哋管弦樂團），佢會係任何一個週會播呢條片，但而家都已經過咗2年，條片都係未播過。 一講起嗰音樂主任，我F1參加choir嗰陣都幾鍾意佢，但係F2我做咗S2聲部長之後就唔鍾意，因為嗰陣時有咩嘢，佢都只會搵團長同S2嘅副聲部長來做，完全無搵過我，雖然我有時都會俾下意見，但都俾佢否決晒，所以我呢嗰S2聲部長只不過係名存實亡。我自己都有反省過係咪自己有啲位做得唔啱，但係即使自己不斷努力咁去改，佢都好似唔鍾意，咁我就覺得係咪佢其實一直都唔鍾意我，我做到聲部長只不過係俾同學投票出來，其實佢一啲都唔想我做，而係想嗰副聲部長做。所以我F3就退出咗choir，不過可能係因為呢個原因，之後音樂主任就一直針對我。 我哋學校有music festival，咁我就做我班嘅司琴（本身我只係嗰副司琴，但因為嗰正司琴話想做指揮，我心軟先話做正司琴）咁惡夢來啦，佢成日做啲嘢同講啲嘢刁難我：話我彈得唔好、話我做咩唔send鋼琴demo（呢個唔係必要，只係隔離班做好啲有send，佢就奉旨）、話我改譜改唔好、作唔好。。。呢啲我都算，我真係廢。但同學唱得唔好、唔啱音同拍子咁都入我數？！大佬！其實疫情就唔好搞mf啦，我哋真係無時間練，啲同學已經唔想理，打算求求其其就算，你只鬧我做得唔好要改都無用咖窩，問題係同學到。。。總之我哋都係辛辛苦苦完成咗mf，我哋表演得好差，咁佢就要我哋全班檢討下啦，咁啲同學就係到甩鍋話係作詞編歌嘅人唔好，老師之後都有多謝作詞編歌嘅同學，亦護住嗰指揮叫大家唔好鬧指揮，但唯獨係我，咩都無。而之後嘅音樂堂，我都會因為呢次mf而俾佢串。嗰陣時我F3，唔鍾意到佢極點。 F3，佢開始對我哋管弦樂團咩都理，要我哋參加多啲比賽，要我哋參加音樂營，要我哋幫其他樂團伴奏。。。佢對我哋好都算，但係問題就係有事就要求我哋一個月內練好首歌要拉俾人，拉唔到就鬧，拉到就覺得係自己功勞，但我哋練習嗰陣佢一次都未來睇過，最多我哋練完嗰陣先過來扮下嘢；幫完佢啦，佢多謝都無聲就走去理其他樂團，有事啦先再來搵我哋。 但我想退嘅原因都唔係呢啲，而係佢會係背後到搞小動作：第二小提琴有個F3同學走咗，咁無人帶班F1、F2點算啊？啊，咁多拉琴拉得比我好嘅人唔要，係要指名道姓要我退落第二小提琴到拉，話要帶住班細。我嗰陣時咩都唔知，真係以為自己拉得唔好先被人燉冬菇，又見指揮好有禮貌咁，我都無得say no（雖真係好唔想唔開心）但自從嗰走咗嘅同學同我講返呢個事實，我已經對樂團、指揮失去希望。 我真係好難受，zoom都無去上，結果指揮唔記得咗我，當我透明，但我都覺得係自己唔啱先，所以無點怨。但係指揮越來越聽音樂主任講（指揮本身係唔聽，因為指揮怕會無咗自由）俾音樂主任蝦都唔反抗，我好絕望。同埋啱啱先入樂團，坐係我隔離嘅F1仔竟然唔使一年，就坐到第一小提琴嗰位，我真係。。。唔識講好，好心痛。 所以希望大家可以幫下我，我真係就頂唔順。
#NSS愛情 [GUEST] 大家好，小妹今年19歲，有一個拍咗兩年拖嘅女朋友，你冇睇錯，係女朋友，我好愛佢，我諗齋四隻字好難表達到，所以我都略略講下。 我同我gf喺我f4嘅時候識嘅，佢細我兩年，我地喺一次義工活動相識，活動期間我地傾得好埋，我從來未遇過一個咁傾得埋嘅fd，令我更相信我同佢有某種緣份。 每次我同佢講我見到一啲好想食嘅嘢，佢都會下一日foodpanda俾我，而且次次都咁啱好我翻到屋企就黎到（我嚴重懷疑佢係咪專登計好時間），我同佢講唔洗咁破費，但係佢話請我食嘢佢都好開心，令我覺得好感動，所以我有時都會送翻禮物俾佢，我地都習慣咗呢種生活模式，佢下年dse，我都有盡力幫佢，呢段日子開心到令我以為生活喺小說入面。 但係現實邊會放過你，前幾日我聽到阿爸阿媽係度講緊我結婚嘅事，佢哋話應該俾邊間屋我（我地有兩個單位），可以方便我生仔…其實呢幾年我阿媽都一直同我講結婚生仔嘅事，佢話無論我搵咩男朋友佢都支持我，然後我開玩笑咁問如果係女朋友嘅話呢？我笑笑下咁講話‘唔會呀嘛？你應該唔會嘅。’ 我阿媽其實係啲思想超封建嘅人，前排咪播大叔的愛嘅，我有嘗試俾佢睇，希望可以感化（？）到佢，但係佢睇到kiss位就話，呢啲劇係度宣揚同性戀，係害咗年輕人，唔應該播出街，佢應該可以同何已完做到好朋友。佢有一種‘女人就應該生仔做家務，男人就應該打工養家’嘅思想，尤其係我上咗大學之後，佢成日問我幾時帶男朋友翻屋企。 我之前都見過好多有關嘅post，黎黎去去都係嗰啲解決方法。呢幾日我諗左唔同方法嘅結果。第一，直接同屋企人講。我真係去咗問我阿媽，我話如果我對男仔冇興趣佢會點，佢就即刻好大反應咁問我係唔係les，仲話同性戀係不孝，如果真係搵女朋友就同我斷絕母女關係，所以我唔夠膽問落去。第二，一直隱瞞直到佢離開人世。佢得我呢個女，所以佢退休後一定係我養翻佢，佢一日未離開人世，佢一日都會催我結婚生仔，我唔想過呢種咁煩嘅日子，都好驚佢鬧我做咩唔生仔。第三，真係唔理佢唔養佢。咁就更加冇可能，我都唔忍心做呢樣嘢，咁樣我都對唔住我嘅良心。 我好想自己解決呢個問題，啲人成日講到好簡單咁，其實邊會咁易，你以為拍電視劇咩。我好愛好愛我gf，我唔想失去佢，但我亦都唔想令我同屋企人嘅關係變差。其實我係咪有啲冇用呢？咁大個女連呢啲嘢都解決唔到…我有諗過同我gf傾，但係佢下年dse，我唔想令佢多一個煩惱。 好多謝睇到呢度嘅各位 如有1999敬請原諒