#NSS愛情 [GUEST] [希望admin可以 po ig ] 是咁的，小妹一直為一段感情內疚左好耐，到依家依然覺得好對唔住佢。 我係嗰段感情入面 完全可以話係無理取鬧，經常小小事就提分手，乜都要佢順住我，一唔順我意就提分手，但佢真係好好，先搞到我咁得寸進尺 (我知係我衰） 我不嬲都知道佢阿爸唔係佢身邊，但唔知係離左婚定點，佢又好似並唔想提起，但我覺得自己連男友嘅雙親都唔知，好似唔係幾好，所以我就追問左落去，最後依然以分手逼供（我知，我真係人渣），最後佢回咗我一句「墳場」，我當下呆左，我仲記得我當時冇道歉（我知，我真係知自己衰） 之後因為我父母反對我拍拖+學業壓力，我當時又唔識處理感情問題，所以勁賤格地選擇左冷暴力，所以先導致我內疚左三年有多。 如果當時人見到呢個post，而你肯原諒我或根本已經無所謂我，就唔好搵我相認，我真係冇面見你，like個post，我就知你睇咗篇文。如果你想鬧我一餐，就鬧啦，我抵死我真係知自己衰。 最後都係一句，對唔住。 Sor for 1999
#NSS家庭 [GUEST] 我真係好憎我老母 是咁的，小妹有一個啊妹同一個細佬。我細個個陣我老母好緊張我嘅成績，每次考試測驗默書冇9字頭佢就會打我同趕我出門口，然後我就企係門口出面等我老母開門俾我入去。我同我啊妹小學嘅時候考試要溫書，然後我老母就會帶我細佬去海洋公園玩。個陣我真係好撚憎我細佬，不過我個陣就覺得其實我細佬遲啲升小學咪又係要溫書。所以我個陣好期待我細佬升小學。但係到我細佬小一嘅時候佢間學校一年班係唔洗考試測驗同默書。到我細佬小二嘅時候，我老豆就覺得我啲係香港讀書好辛苦所以就帶左我地移民去加拿大。去到加拿大我老豆老母開始唔係好理我地。不過有一次我老豆返左香港，得返我老母同我啊妹細佬。然後我有一次洗洗吓碗唔好心打爛左隻碗戒親隻手指，我老母知到之後不停扯住我啲頭髮又打我。之後前幾日我細佬就打爛左隻玻璃杯，我老母就冇鬧佢仲幫佢執埋手尾。然後其實我老母唔俾我地關門，佢一見到我地唔開門就會9衝入黎問做咩唔開門。佢話驚我地關門然後自殺。 係度想問下你地俾唔俾關房門… sorry for 1999
#NSS家庭 [GUEST] 長文慎入 我好快就要搬屋… 小妹今年f.2，同爺爺嫲嫲父母仲有細佬一齊住，我哋間屋都唔算細嘅，一家六口都好夠住，間屋係我出世前幾年買落，我一出世就住喺度，唔經唔覺已經十幾年，一直都冇搬過屋。 我阿媽係未婚懷孕，一知道有咗之後就好快同我阿爸結咗婚，但係都可能正正係因為咁，所以我阿媽話就話入咗門，但其實同我爺爺嫲嫲都唔係話相處得好好，兩老都唔係咁鍾意佢。 其實喺我心目中我覺得我阿媽已經做得好好，佢好錫我，供書教學，我想要乜佢都會盡量滿足我，我從來都冇受過苦，喺佢照顧下我非常健康，亦豐衣足食。 但係隨住時間流逝，爺爺嫲嫲同阿媽之間嘅矛盾亦都日漸增加，佢哋好少面對面嗌交，但我爺爺嫲嫲成日係我阿媽唔係屋企嘅時候當住大家面大大聲講佢壞話，我阿媽當然唔會唔知，我成日聽到佢夜晚喺廁所喊，我自己都好心痛，因為我都成日親耳聽住爺爺嫲嫲鬧佢，雖然佢哋講嘅的確係事實，但其實阿媽已經做得好好，我知道佢盡咗力，但係爺爺嫲嫲永遠都唔滿意… 我好似講到我爺爺嫲嫲好衰，但另一方面，佢哋都好錫我，特別係爺爺，佢係鬧得阿媽最甘嗰個，但同時都係全屋最錫我嗰個… 我仲記得，細個每次我俾阿爸阿媽鬧嘅時候，係佢幫我講好說話，我俾人困喺間房入面係咁喊， 係佢幫我說服阿爸阿媽，然後拎住鎖匙嚟開門，輕輕錫我面珠燈一啖，好溫柔咁樣摸我啲頭髮，跟住用紙巾幫我抹眼淚，同我講以後要乖啲，唔好再激嬲屋企人。佢仲會買衫比我，幫我煮麵，買我鍾意食嘅餸，帶我去公園，聖誕節帶我去尖沙咀海旁，星期六日帶住我兩個人喺酒店食自助餐…我哋之間實在有太多美好嘅回憶，對我嚟講，佢就係我成世人最親嗰個。 最近佢哋鬧得好僵，一直去到今朝，爺爺終於忍唔住，佢打電話俾阿爸攤牌，話要我哋一家四口搬走，如果我哋唔走就佢走，佢嗰陣講得好大聲，原本我瞓緊覺，但都被嘈醒咗，我一路聽一路喊，我真係接受唔到，個心好似俾刀割咁。 我哋喺油麻地有一個細細地嘅單位，係太婆以前自己住嘅，幾年前佢走咗，個單位就一直空置，去到最近租咗俾人，爺爺話，租約下年一月就會完，到時我哋一家四口就搬去嗰度住。 啱啱阿爸打電話俾我，或者佢唔知我今朝已經聽到晒，於是就再同我復述多一次，我一路聽，已經一路喊到講唔到野，我暗住自己個口，我唔想俾阿爸聽到我喊，雖然佢應該都知道。佢好冷靜咁樣同我講，大家一家人，爺爺同阿媽再係咁冷戰落去真係唔係辦法，大家分開就係最好嘅解決方法，聽到嚟呢度我真係頂唔順，收咗線。 而家我哋幾層樓都係爺爺嫲嫲後生嘅時候博命做嘢先博到間屋返嚟，層樓都係寫爺爺名，而爺爺都仆心仆命咁樣睇住頭家，擔當住一個好似家庭主婦咁嘅角色，又要湊我同我細佬，仲要包辦家頭細務，我知道所有嘢都唔容易，如果佢想嘅話，我哋都好應該遷就佢搬出去。 但當然我阿爸同阿媽都係出面好辛苦咁樣搵食，一日踩勁多個鐘，為嘅就係比更加好嘅生活我哋，同埋補償番爺爺嫲嫲。我知阿爸其實可以話係最辛苦嗰個，一個係自己老婆，一個係親生阿爸，佢咁多年嚟夾喺中間，肯定好難捱，我簡直無法想像佢喺出面幾辛苦，佢同我講成件事已經冇彎轉嘅時候，嗰一刻我已經崩潰，但係佢一定比我更加難受。 我今朝聽到呢件事之後細細聲喊咗好耐，之後我扮到好冷靜咁樣出去刷牙然後煮嘢食，平時爺爺會幫我煮埋，但係今日我唔使佢煮，加上我又眼濕濕咁，我知道佢一定估到我聽到曬，佢行埋黎摸下我塊面，然後講咗句，「要怪就怪你阿媽，唔好怪你阿爸。」呢句說話真係令我撕心裂肺，我已經好想爆喊，但係喺佢面前我仲要死忍。 啱啱食晚飯嘅時候全家靜晒，我好驚呢件事真係冇彎轉，我想像唔到我冇咗佢哋是但一個會點，我去到而家打緊呢篇文嘅時候都仲喺度喊緊，可能我上面嘅內容真係寫得好累贅好感性，但係呢啲正正係我而家呢一刻嘅真實感受，我唔想搬走，我真係好愛佢哋，我唔想同佢地分開，我究竟應該點算… Sorry for 1999