#NSS家庭 [KMYLS] 小妹今年六年班，想同大家分享啲嘢。 我係離異家庭，一出世個時就比我奶奶嫌棄，因為我係女仔，女仔無用，要男仔，就叫我老豆再生多個。 因為我細個嗰時屋企收入低，月租淨係交得起房租同每日四個杯面錢（差唔多），無錢買奶粉，我就淨係飲洗米水大。 因為老母返工原因，細個就係老豆身邊，不過我老豆淨係識換屎片同幫我沖涼，所以我兩歲之前學唔到任何嘢，佢唔會帶我出街，唔會教我識字，唔會教我常識，我喊嘅話淨係塞個奶嘴就算。 兩歲嗰時，老豆話出去翻工，話要去內地返兩年，老母話得，佢胎住我啊妹返工，跟著我就每日係屋企訓，肚餓口渴見都咩食得嘅就食，飲水龍頭水。 兩年後，老豆返黎，話比人炒左，淨係有七萬，所以話係屋企湊我，老母去返工。 然之後四歲，我去返學，一開始係老母湊我去搭校車跟著去賣衫，跟著老豆湊我返黎。但唔係囉，佢係放養我囉，唔理我，叫我自己搭校車自己行返屋企。每日帶佢個條女返黎，啊妹都出左世，就有奶粉飲。我都係放學肚餓見到咩就食咩，幼稚園個時我淨係食過幾次正餐，功課都唔知要做，都係老師教我先知。仲要當住我個面食煙，勁臭。 有時老母返黎，因為壓力就會攞我出氣，打到我全部紫色。 後尾暑假，我係屋企訓到自然醒，老豆就唔教我英文數學個啲，由於老豆老母都打機，老豆就教我打電腦game，教我點樣開機，點樣操作角色，點樣放技能，雖然隻game啲字大部分都唔識，不過都係有學到少少嘢。個陣玩開劍靈，龍之谷，黑色沙漠同天堂2。 不過啲game都有啲有限制級，所以學到啲唔應該學嘅嘢。（（ 同埋個時acg同vocaloid都幾紅，我老豆會睇，我就會跟著睇，嗰時覺得羅密歐同公主殿下個個mmd好好睇，都有去睇黑岩射手。 令我覺得虛擬世界比現實更好，所以就沈迷左。 之後五歲，老母發現老豆有外遇，就提離婚，老豆話幫老母返工，之後再離。 老母係屋企教左我好多嘢，好似補習咁樣，不過因為我老母唔識英文，所以我嘅英文都好差。 小一，佢地就分居，我老母又去返工，我係學校唔適應環境，同同學無話題，佢地係天線低低B同米奇老鼠，我係acg，所以我係學校基本係無乜講野。 之後有個男仔，睇我唔講野，就蝦我。例如我跌筆，我彎身去執，佢就撳住我後背，唔比我起身，又或者係我手冊畫畫，之後再撕爛，將我啲文具dum係垃圾桶，叫我自己執，再冤枉我鬧粗口。 我唔知點做，個老師就以為我不乖，所以罰我企。之後比老師發現，先只教番我唔可以唔出聲，都額外關心我，之後搵左社工。 其實個老師好好人，不過個社工好L煩，煩我成個小學。 有次，老母發現我成日咳，就帶我去睇醫生，先至發現我患上肺部慢性疾病，要食藥，搞到我地屋企無錢。 二年班，老母教我煮飯，我淨係識煎下雞蛋個啲，之後會去網上睇食譜煮飯。跟著就搬屋去左屯門。 三年班，我參加左校隊啦啦隊，體操我一年班就有學，但隨住越黎越多唔同嘅人參加，因為我跳舞唔好，係因為我做到好多比較難嘅動作，例如側手翻個啲，個老師先邀請我。 我係啦啦隊成日比前輩用唔同嘅眼神望著我，嫌棄我唔識跳舞，嫌棄我做嘢慢人一拍。 所以我都係比人蝦，例如係表演個時搶我啦啦球，特登整跌我，同我講啲好難聽嘅說話。
#NSS家庭 [Guest ] 唔知大家屋企有冇老人家呢？可能你同佢關係唔錯，但係我只可以話：我有個與眾不同，特別討厭嘅爺爺。（長文慎入） 講返少少背景先~話說係我好細嘅時候，爺爺就從嫲嫲屋企搬咗嚟我哋屋企，同我父母&我一齊住。咁其實本來就好地地嘅，基本上都相處到啦，但係我地係一兩年前搬咗屋之後，惡夢就開始咗…… 首先，我爺爺非常無衛生意識，但係佢係係搬咗之後先咁。佢係疫情無咁嚴重嘅時候都仲會出下街，所以都會整理下儀容，但係自從之前我哋唔俾佢成日出街之後，佢進化到由朝到晚淨係着住見睡衣，一個星期唔沖涼，啲衫可以幾個禮拜都唔洗。而且佢係用尿壺嘅，夜晚去完之後，朝早倒完尿又唔洗手唔刷牙，直接就行去客廳搵麵包，仲要左揀右揀，攞完呢個又果個，搞到我哋成家都唔夠膽攞麵包食，因為全部都係佢啲尿。 你話老一輩習慣咗咁樣，OK。咁好啦，第二，我爺爺已經80+，咁多多少少都有啲病痛，咁佢就有冠心病同糖尿病。正常老人家知道自己有咁嘅病點樣都會注意下自己日常飲食，唔好食得太濃味，但係佢唔係囉。佢會自己買半隻雞+可樂然後坐係街到食（疫情無咁嚴重嘅時候），然後毀屍滅跡唔同我地講。佢仲試過自己買半打蛋撻自己一個人係條街食晒，然後唔同任何人講。到佢血糖高嘅時候/覺得唔舒服，佢就會賴落其他嘢度，或者扮無辜，話自己乜都無做過，我哋成家就鬼咁擔心。好啦，之後佢好返啦，又一個人偷偷地買成盒月餅（大約有10-15個）然後一個禮拜食晒，最後入醫院。佢之後再無事，出返嚟，都繼續係咁，講極都唔聽。 第三，亦都係我最憎嘅嘢，就係佢嘅態度 。我哋成家人咁落心落力照片顧佢，但係佢竟然完全唔領情，亦都完全唔覺得自己有問題，而且仲要講啲說話搞到我哋好似虐老咁。有一次我哋返嫲嫲屋企，佢當住所有人面當眾話：「我呀，係果邊連茶都無得飲呀，又淨係得果幾味餸食，仲不如死咗好過。」果陣我阿媽係負責屋企起居飲食嘅，聽到佢咁講，即刻覺得好內疚。後來返到屋企，佢又扮嘢話我阿媽辛苦啦，點點點麻煩晒。之後我阿媽特登買咗茶葉學沖茶，又學整啲其他餸（因為醫生推薦食果幾樣食材，所以無幾多選擇）。但係辛辛苦苦整完出嚟啦，佢又話無胃口又話點，跟住同我阿爸講話以後唔晒咁樣整啦，俾豉油佢攪白粥就得架啦，果下我見到阿媽個樣超無奈，不過念在佢下長輩都無出聲（但係當然無俾佢咁做啦）。過幾日食飯，佢又係咁，然後仲要食兩啖就「唉…」又拎晒頭咁樣，仲要攞滾水撈飯，然後好似我哋迫佢食咁樣食飯，搞到我哋成家都冇胃口，我阿媽仲超委屈。 之前疫情嚴重，唔俾佢自己出街，驚佢染到，佢有講話我地囚禁佢，信唔過佢。跟住話咩反正我都咁老啦，最多咪死，但係佢又點都唔明，佢中咗會惹埋我地，可能佢真係一死了之呀，但係如果死唔去，又病咗，咁邊個照顧佢呀？咪有係我哋囉。最好笑係佢真係有啲唔舒服啦，又怕死喎，係咁話痛呀又話攰呀，但係問佢咩事又唔講，做過啲咩又話唔知，跟住過一陣無事呢又笑嘻嘻咁，搞到我哋好無語。又試過係朝早我哋全部人都未醒嘅時候自己偷偷地走出去買煨番薯，仲要係疫情咁嚴重嘅情況下係街度食完先返嚟，跟住就同我哋講佢又無胃口乜都唔想食。我哋以為佢又唔舒服，於是咪周圍搵醫生睇囉，後來先知佢出咗去，好彩無中，如果唔係就大鑊啦…… 其實我個人並唔嫌棄老人家需要照顧，咁人始終會老，就算你係殘疾都唔緊要，但係我呢位真係超級煩。當我望返我阿媽咁落力咁照顧佢，又處處為佢着想，我每次都覺得好憎佢。之前佢試過住醫院果幾日，我哋成家都好開心咗唔小，於是我就越嚟越想佢快啲死。雖然係，我咁諗好衰，我自己都知唔應該咒自己爺爺，但係當我見到我地成家都咁盡心盡力，但係換嚟嘅係唔理解同埋呢種態度，我總係會好想佢快啲消失。 唔該admin擺上IG，都多謝大家睇咗我廢噏咁耐，我淨係純粹渲泄下，大家屌細力啲啦…sorry for 1999🙏🏻
#NSS愛情 [guest] hi小妹f3，第一次投稿，有咩講得唔清楚請諒解 內容有部分修改，為咗唔比人認到，但重點都係真實嘅 麻煩晒admin幫我po上去 故事發生喺一年前，我識咗個f4嘅男仔，下稱A，嗰陣我同佢因為同一個學會咁就fd咗，之後仲互相曖昧，最後一齊咗。 一齊嘅期間因為疫情所以都冇約出街，只係通過whatsapp傾計，唯一幾次真正見面可能係學會開會先遇到 開會嘅時候佢都會主動撩我傾計，我都會答，一開頭都真係幾有愛情feel。 我以為自己遇到初戀，但估唔到原來一切都係假象。 有一次開會嘅時候，我哋女仔偷懶嗰陣傾八卦，有個同佢同班嘅女仔爆料話A原來追咗某個女仔好耐，下稱B。 當時我都幾訝異，但諗住我同A係地下情冇人知，就覺得A應該一早放低，就冇為意。 過咗幾個星期，A明顯對我嘅態度冷淡咗好多，成日都係我搵佢，佢正係答幾句咁。 我以為佢可能係學業好忙，咁畢竟我哋唔係同級，我都幫唔到啲咩，就只係有時關心下佢咁。 過咗月幾，佢竟然同我講話都係做返朋友。 我當下係好shock，因為我完全唔知係咩事會導致分手，但我都正係覆話ok，咁都冇得勉強之類。 後尾我就去B嘅ig度睇，之後發現幾耐之前佢哋嘅合照，原來佢哋識嘅時間長過我好多，咁我當然唔配同佢喺埋一齊。 我嗰段時期喺學校見到佢都會尷尬，但都係保持住良好嘅朋友關係。 我幾個月都未放低佢，但點知幾個月之後，佢無端端同我講話佢同B一齊咗，我嗰下係真係好心酸，完全唔知點反應。我唔知各位絲打巴打有冇試過一種感覺，就係好似真係有把劍插入你個心入面，總之真係好難受。期間我都有同佢傾計，但都只係保持朋友關係冇踩過界。 佢同B一齊嘅期間，我有諗過自殺，後尾搵社工先好返少少，但因為我驚佢話比我屋企人聽，就冇再搵過。 過咗月幾，A竟然主動同我講佢同B分左手。嗰之前我哋除咗學會都冇聯絡過，連whatsapp嘅pm都冇，只係喺group到講野。 聽到呢個消息我都唔知佢係想點，我覺得佢冇可能想同我復合，但又諗唔到其他佢想話我知嘅原因。 我成日見到佢出post就會第一時間撳like，同埋研究佢張相同caption，我知咁樣會搞到我越陷越深，但我真係控制唔到自己。 期間我都有搵朋友傾過，但我驚影響到佢哋所以係同唔同人講，每人講少少。而我都冇同屋企人講過呢件事。 到而家都過咗好耐，期間佢朋友都有講過我聽佢係渣男/成日無縫接軌/一腳踏幾船，但我都冇在乎過呢啲。 我知到呢度實有人話我係綠茶/死纏爛打/變態，我唔反對，因為我真係到而家都好鍾意佢…甚至我自己都唔知點解
#NSS愛情 [Guest] 究竟拍拖係咪一定要兩情相悅先可以發展？ 是咁的，話說前兩日有個都頗frd嘅男仔同我表白，我拒絕左。（可能你哋覺得有啲衰）係留有餘地咁拒絕，例如「再算啦」、「未係時候諗哩啲」etc 事後，我都冇好狠咁同哩個男仔斷絕來往，更加諷刺嘅係，仲日日傾計。咁做其實唔係想玩人，只係我唔討厭佢，甚至乎有少少好感。咁做係因為我都想睇下有冇機會（唔排除最後冇）。我估個男仔都隱約估到我做緊乜，佢都有暗示一兩句係話「最後唔得都冇辦法，試過了盡力了就夠」。 另外，我咁猶豫都係因為我遲早移民，我都有同佢講過，佢話唔介意long-D。但係講真，唔理係邊一方都好，喺長期long-D嘅情況下，邊個偷食都冇人知，隨時爆發感情危機，尤其係我同佢都唔係啲咁長情專一嘅人，係容易好感、喜歡，都容易放下嘅人。 咁問題嚟啦，究竟我應唔應該試下？我係咪要賭？賭佢其實唔會咁長情？賭我其實都唔會陷入去？賭我哋即使散都可以係輕易放下？ 定係賭我哋真係可以長長久久？ 我知我好矛盾，都講到有啲1999，只係我已經盡力組織好哩段語言嚟問。 PS. 我想試，但係如上面所說，我同佢都唔係長情嘅人，所以我唔信佢，都唔信自己⋯⋯睇到炆嘅人任鬧啦，樓主內心強大
#NSS學業 [Guest] -就考DSE但冇動力温書- 我係今年嘅DSE考生,亦即係兩個禮拜都冇嘅之後就要開考,但係依然冇動力温書。 學校係band2,成績算中間。大概係有幾科坐3望4,但係差嘅可能連2都冇。屋企人對我一直有好大期望,因為低form嗰陣我成績係全級頭五嗰啲,升到高中玩得多咗好多就跌咗落30-40名左右。而之前學校一有考試測驗我都會温書,但而家DSE反而就好冇動力。 每日都同自己講聽日先聽日先,搞到而家先温得嗰少少。期望亦逐漸降低,由當初想入大學,到而家已經冇所謂有asso讀已經夠。心態唔知幾時變到咁,總之我就係做唔到每日温咁多。再咁落去,可能連5條2都冇。 想知有冇人都係咁,又或者有相關經驗,可以分享下自己做咗啲先有返動力温書。 Sorry for 1999