—類投稿

#NSS家庭 [GUEST] 大家好，小妹今年F4，想講下小妹嘅私隱度同家庭問題，希望大家可以比啲意見。 講下屋企背景先，小妹同父母、細佬一齊住，屋企家境唔好，住係300呎、冇房嘅公屋單位。小妹屋企有一張雙人床，一張碌架床，我同細佬瞓碌架床，而我父母張床就係我張床嘅斜上方，即係話，我係床上面做嘅任何嘢，佢地都會睇得一清二楚。而我屋企連張書檯都冇，只有我老豆嘅電腦檯，所以我同我細佬基本上係冇地方做功課同溫習。小妹屋企嘅飯檯係一張小朋友用嗰啲細摺檯，上面經常舖滿雜物，所以我都係冇辦法係上面做嘢。另外，我老豆好鍾意控制同催人，佢逼我地6.30前要沖完涼、11.30前訓覺，但係我有時真係有嘢忙，冇辦法係嗰個時間做到，佢就會不斷催我，搞到我好躁底。同埋小妹好討厭俾人控制，所以每次佢叫我做嘢，我都唔想黎佢，但我一唔理佢，佢就會發脾氣、鬧我，令我冇得唔服從。 細個嗰陣，唔覺得屋企冇房有咩問題，甚至覺得每個人屋企都係冇房。直至我六年級，第一次去朋友屋企玩，先發現原來正常屋企係會有房，見到我嘅朋友可以有自己嘅房、書檯，我真係好羨慕。由呢日開始，所有朋友話想黎我屋企，我都會搵藉口拒絕，因為我好驚比佢地見到我屋企。 輪到做功課嘅問題，我之前係淘寶(勿屌🙏🏻因為屋企冇錢去傢俬舖買)買左一張放係床上面嘅檯+好細嘅櫃，即係類似正常書檯嘅縮細版，其實長期係床上面做嘢真係好唔舒服，亦都會令到個人好懶散。而我細佬，會坐係床側邊，係張床上面做功課，所以令到佢坐姿唔好，對背同腰都唔好。我都有諗過同媽咪提議買張書檯，但係我發現屋企根本冇位擺，所以就放棄呢個念頭。 去到最嚴重嘅問題，就係私隱。前面都有講過，我張床離我父母張床好近，行一步就到，而我做任何嘢都要係床上面(因為冇書檯)，雖然我父母張床隔離有個窗簾遮住，但日頭時間，我媽咪通常都會拉開，令到我做任何嘢都好似比佢監視住咁，好唔舒服。同埋，我換衫嘅時候，只係可以係窗簾入面換，好多時個窗簾都會唔小心吹走，令我好冇安全感。另外，我買嘅任何嘢，幾乎都會比佢知道晒，我媽咪好鍾意乜都過問，例如我啲信，小妹有追開星，但父母都唔知，因為我唔敢講，我驚佢地話我晒錢，小妹有收小卡嘅習慣，有時會有小卡寄黎我屋企，而我老豆通常每日都會落去攞信，雖然我老豆唔會過問，但係當啲信比我老母見到就大穫。佢一見到，就會問我係乜，然後逼我係佢面前拆，係呢個時候，我就逼於無奈講大話呃佢，話幫朋友收信，但係都係冇用，佢都會照屌，叫我唔好比地址人，好危險☺️我真係唔鍾意做任何嘢都比人監視、過問，我都想有私隱同自由。 講起追星，小妹鍾意咕卡，有一次我係床上面咕，而我老母坐係下面教我細佬做功課，我唔小心跌左張卡落去，即刻落去執返，可惜佢都係見到，但第一個反應唔係幫我執，而係話：「咩黎架，咁核突嘅。」我聽到之後，唔敢講係我嘅，就話送比朋友。矛盾嘅係，我老母有鍾意大陸嘅明星，我見到嗰陣問佢咩黎，佢就話關你咩事。佢憑咩可以踩我鍾意嘅嘢，而我就問一句都唔比？我都respect你鍾意嘅嘢，點解你唔可以respect返我鍾意嘅嘢，同埋我？ 由3月中左右開始，唔知係咪因為太耐冇出街，令到我成個人都好壓抑，每晚都諗緊，點解我會出生係呢個家庭，點解我老母可以咁煩，點解所有嘢都咁煩咁黑人憎，諗諗下就喊左，幾乎每晚都係咁，我控制唔到自己，我老豆會逼我同我細佬11.30前上床瞓覺，但係我每晚都會喊到1點幾2點先瞓到。小妹仲有2年就dse，真係唔知係屋企點先溫到書，我好想快啲搬出黎住，擺脫佢地嘅監視同控制。小妹好想同老母建議間房，但係屋企冇咁多錢裝修，亦都唔知點樣開口。 多謝睇到呢度嘅大家，希望你地可以比啲意見我，唔該晒admins Sorry for 1999🙏🏻

#NSS學校 [GUEST] 我同學笑我阿媽做茶餐廳。 今年中三，小弟係一間band2學校讀書。由中一開始覺得班上的同學好低B，又瘦成日係到扮大隻，扮到自己好打得，又扮到自己好型，又幫人改花名，見到女仔靚就搶人筆袋和水樽，唔俾番人。 佢地中意哈d善良的同學，以為覺得咁樣做好型。 佢仲整蠱同學，有時候攞紙扔攞人個頭。平時佢地成日話自己去過咩地方旅行，又話咁都未去過真係垃圾。又話：你們未食過放題，牛排，未撘過飛機啊？ 其實我覺得有幾個係吹水，因為每次問佢去韓國邊度佢地都口啞啞，得個二世祖去過。 二世祖問我有冇去過，我話：冇，我屋企窮，冇錢。二世祖又問我屋企人做咩，我話：我爸爸唔係到了，我屋企得我同我阿媽，我媽做飲食，茶餐廳。（我唔介意我阿媽做茶餐廳，因為窮咪窮咯，有咩問題？） 二世祖聽完鄙視我，問我係唔係住公屋，我話係。佢又問我係唔係攞消費卷，我話係。我話：我唔介意自己阿媽做咩，窮咪窮咯，住公屋幾好呀。佢又問我阿媽做邊間，我話關你叉事。 因為二世祖身高比我矮，我米8，佢唔夠我打，而且佢鍾意班上學習好的女神。但女神唔so佢，佢就故意扮到自己好型，搵存在感。（小弟對女神冇興趣，但小弟數學班上第一，女神有時候會問下我數學，令到二世祖在意。女神都係屋企窮，住我隔離樓。） 有次二世祖跟蹤我返屋企，見到我去我媽茶餐廳，我啊媽做侍應和收銀。 另一日，條友當著我同我同學面話：（我食過xx茶餐廳d野食，勁難食咯，仲難食過我工人煮，俾狗食差唔多。又話裡面污糟，台唔乾淨，清潔工人係到做咩？）佢擺明講我阿媽壞話，女神幫我講說話：（你唔鍾意食咪唔好食咯，大把人鍾意食，我地一齊買外賣翻去食姐。） 我同個二世祖講：（你鍾意黎食野歡迎，唔鍾意你去其他地方食。） 佢突然想打我，未打到我俾我踢飛。之後miss罰我同同學打架，但冇罰二世祖，同學幫我講說話miss都係罰我。miss要我寫檢討書，仲通知我阿媽，阿媽罵我做咩同人打架，打左我。但我冇同阿媽講咩原因，因為怕阿媽知道同學笑佢做茶餐廳，怕佢傷心💔😢。 有次女神屋企電腦壞左玩唔到lol，我幫佢整返好。 另一日，女神係班房同我講電腦又壞左，因為我上次去幫佢整電腦，發現根本冇壞，只係冇down LOL，今次我覺得都係冇壞，所以拒絕佢，叫佢翻去開discord傾。 女神話唔去佢屋企睇過點知有冇壞，心唸佢真係唔識用電腦。我話：你係唔係質疑我電腦技術？ 之後個二世祖聽到，話我係茶餐廳撿電腦翻黎用，之後又話我成日係茶餐廳幫人整電腦，茶餐廳電腦好垃圾，所以電腦咁勁。我覺得佢份人好白癡，所以冇理佢。 你地身邊有冇尼d同學？我覺得佢好黑人憎。

#NSS其他 [Guest] 有無濕疹嘅同路人可以講啲舒緩痕癢嘅方法俾我聽 濕疹真係好攞命 我真係就快癲啦 我由出世開始就一直有濕疹 細個嗰陣嚴重到全身都有 連塊面都唔放過 手臂同大脾啲濕疹都勁嚴重 嚴重到出水嗰隻 因為咁樣我大熱天時 就算出哂汗都着住件褸 我仲好記得我中一嗰陣有次陸運會俾個老師見到我坐下看台着住件褸 佢即刻勁唔俾面 係所有人面前大聲鬧我 叫我除咗件褸 啲人望哂過嚟 我勁唔好意思 無奈之下死死地咁除咗佢 好彩上到高中之後 啲濕疹好咗好多 塊面基本上番哂 但係作為代價 我對手成為咗重災區 手背手掌手指全部都係濕疹

#NSS學業 [GUEST ] 今年中2 ，自從開始放「暑假」就比之前Hea 左好多，每日嘅生活就係13:00左右起身 ，之後就不斷煲劇，當假期大約剩返10日左右，我已經唔想返學，因為我唔想面對ut ，唔知自己考成點，想趁呢幾日上堂前開始溫書，想知中二而家先發力溫書會唔會好遲，同埋有冇啲溫書同上zoom專心大法可以分享下😭。

#NSS家庭 [guest] sorry 我係第一次投稿 會1999😓 – 話說小妹我係12歲，但係阿媽仲管得好嚴。喺我呢個歲數，我好多同學都開始獨立，會自己行街買嘢。但係我每日都只可以留喺屋企做功課。明明我已經完成咗學校嘅功課，阿媽仲會比額外嘅練習我做。 我向佢有提出過話想自己出街買衫，因為阿媽成日買啲好老土嘅衫褲俾我（例如間條紋）。但係佢又唔知驚乜，唔畀我自己出街，話怕我會俾人拐走…日光日白會俾人拐走？又唔見我啲同學俾人拐？ 有時我喺屋企會覺得好悶，想行街，但係阿媽又只帶我去跟去買餸，又離唔開自己住嗰區。我有時覺得我真係好似坐緊監，完全冇自由，想做乜同買乜都被限制…

#NSS學校 [ABCD] 雖然我已經中六，仲有12日就DSE，但我真係唔明中一咁快驚做乜嘢😂

#NSS愛情 [Guest] 我好似同時鐘意左兩個人，點算好。 文長抱歉，是咁的，我係幾年前遇到個女仔，暫且叫佢A，雖然佢嘅樣貌上唔算突出，但係我居然對佢一見鐘情，佢亦都好自來熟咁我哋好快就熟絡左。相處左一排就越來越鐘意佢，有時候傻下傻下咁又好開朗，成日都覺得佢笑嘅時候好靚。但係我情竇初開唔敢追，只係偷偷地暗戀佢。 鐘意左A一年半後，佢同我個best frd一齊左，而且個frd係知道我鍾意A，佢就將呢件事講左比A聽，A就為免我個frd呷醋，就block左我ig fb，淨係得返WhatsApp搵到佢。我就諗住算啦，佢都拍拖咁我都係時候放手。A又準備移民去英國，我諗住呢一世都唔會同佢有聯絡㗎喇。 A移民走左之後，我又遇到個女仔，叫佢B，因為啱啱失戀冇耐，啱啱見到佢都覺得佢係普通女仔冇乜特別，第一次同佢傾計係因為學校D group project，然後就唔知點解越傾越多，對佢有D好感。 佢同A完全唔一樣，佢係有啲負能量嘅女仔，咁我就成日扮傻氹佢開心啦，佢又跟住我一齊傻，同佢相處真係幾開心下。 真正覺得自己鍾意佢係有一次約佢食飯，之前因為疫情一直都冇見過佢除口罩個樣，佢又成日話自己除口罩好樣衰，但係個次食飯見到佢除口罩其實佢好靚，雖然未去到驚為天人，但係完全係我個種type。而且之前我哋一直就有種曖昧嘅feel，所以我就覺得自己鐘意左佢，但係我都係咁敢追。 過左幾個月，我知道A分左手，我就冇乜嘢覺得已經放低左。過排A居然冇啦啦WhatsApp我，嗰陣時咁啱聖誕節佢就同我講聖誕快樂，真係嚇親，然後又問我最近點，我又真係同佢傾喎，佢就同我講佢係英國點點點，我又分享下咁。 咁又傾左幾個星期，佢有一晚香港時間凌晨四點就突然間話想voice call，我就同佢call啦。佢就講好多自己分左手好傷心，又舊事重提話係香港同我哋一齊返學開心好多，聽到佢把聲咁唔開心，我個陣時真係為佢心痛，但係我又做唔到好似氹B咁氹返A開心，我唯有聽佢抱怨聽到天光…… 最近A同我講佢放假會返黎香港，我真係超開心，晚晚都諗住佢返黎我要帶佢去邊度玩，但係其實我唔想再鐘意返A，之前佢真係超hurt我，而且我已經有B日日同我傾計，我真係好鐘意B，但係我就係放唔低A，我覺得自己咁樣好渣，我應該點算好。

#NSS愛情 [guest] 小妹今年F1，幾個月前聽同學講班上有個男仔鍾意我。個陣時覺得好噁心，因為個男仔又矮又醜，讀書又差，上堂仲成日講埋啲咸濕嘢。我返學嘅時候都開始避忌佢，專登暗示俾佢知我唔鍾意佢。但係佢上堂成日都望住我，我覺得好煩。我有時會專登啤返佢轉頭，但係感覺都冇用。 之後我越來越憎佢，因為佢真係好煩，講咸濕嘢嘅次數多咗，仲成日跟住我。搞到我越來越唔鍾意返學，唔想見到佢。佢message我嘅時候仲喺到扮乖扮無辜，話係佢啲朋友教壞佢，仲話佢真係好鍾意我。之後我話我好唔鍾意佢，但係佢依然死心不息，最後我就block咗佢。 到依家停課，我唯一開心就係唔使見到佢。但係我又想返學，又唔想見到佢。下個月就復課，我應該點做？請大家比啲意見，sorry for 1999

#NSS個人 [Guest] Sor for 1999 小妹有打某種運動 最近我嘅教練叫我去幫tvb拍某啲嘢 但係我因為某啲唔講得嘅原因唔係好想去 仲喊過幾次 因為我驚俾人問呢個係咪你（只要不是tvb都冇問題😅） 但我都唔係幾識拒絕人 再加上父母的支持（佢哋冇諗咁多） 最終我都冇拒絕 聽日就要去了 你哋覺得某啲嘢可唔可以同生活混為一談？我該如何選擇？ Thx🙏🏻

#NSS愛情 [GUEST] Hello , 小弟05 最近有一樣野好困擾我 2月，我同班嘅朋友同我wts表白，咁我個陣都中意佢，就接受左。而大家都知，2月到而家一直都停緊課（冇見面），雖然唔知關唔關事，但我發現我對佢嘅感情越來越冷淡，而且真係連wts都唔想覆，但怕佢唔開心，就覆下。 到而家，我直情感覺已經唔再愛佢，我一直都想講分手，但發現真係好難講出口。 一嚟，我哋本身係frd，怕分手之後冇得做frd，而且連佢嘅朋友都係我朋友，仲怕失去埋佢地。 二嚟，我真係好驚hurt到佢，佢仲要對我幾好，但感情真係冇得勉🥲🥲 大家幫幫手🥲