#NSS愛情 [Guest] 小妹今年F.2，係咁嘅近排，其實都唔係近排係一直都好煩惱。煩惱源頭就係大概喺兩年前嘅鍾意咗個F.1同班嘅男仔，佢樣唔係太差但係把口有啲衰，嗰陣唔知那來嘅勇氣去主動聯絡佢，同佢call電話。嗰陣已經好開心對佢，幾乎成日msg大家，傾共同興趣、一齊傾電話、打機之類，返到學校成鬼日對視，但係又好似唔識咁。因為我哋關係勁曖昧，啲friend成日都同我講話佢鍾意我，其實我都feel到少少咁嘅感覺，但係我又唔敢肯定、唔敢去諗多。之前都有一齊出街玩，當然有Common friend一齊，嗰陣係真係幾開心嘅，嗰陣佢仲會做啲稱得上Sweet嘅嘢，例如我差啲Pk佢即刻扶住我之類，搞到我好心動、個心好囉囉攣。直至2021知道佢去加拿大讀書，我就有少少唔開心，喺佢Farewell之前我有諗過好唔好同佢表白，但係我都係冇勇氣咁做，所以我都係唔Take呢個risk，只係再同我班Common friend同埋佢一齊出街玩咗5、6次。佢臨走嗰日Msg我講「有緣再見💛;)」，令到我更加難忘記佢。到而家間唔中有時都會覆下大家嘅Ig story，而我仲係忘記唔到佢+鐘意佢。我好想搵忘記佢嘅方法，尋意見🙏🏻
#NSS個人 [GUEST] 小妹而家F3 有一個朋友係由小學開始就識，而家中學都係同一班，咁之前就有啲事同佢熟咗，佢都好關心我會成日喺ig同我傾心事，基本上都好快覆，我同佢都有一齊食飯同埋行街，都算係好熟嘅朋友。唔知點解呢幾個月搵佢嘅時候佢都好遲先覆我 明明見到佢ig online 又有鋪story，但佢都係唔覆我（隔咗一日都唔覆。）唔知點解我覺得同佢關係疏遠咗，同之前好唔同嘅感覺，佢搵我嘅時候我就好快覆， 但係唔知點解我搵佢嘅時候佢就好耐都唔覆。（令到我好傷心，都會因為呢件事瞓唔着）我應唔應該繼續同佢做好朋友或者搵佢（真係會懷念之前嘅佢🥲）但係覺得唔會變返好似之前咁😭sorry for 1999
#NSS個人 [GUEST] 我覺得我就黎宅出病.. 由於我們親愛嘅嘅政府出啲政策唔比無打針嘅人周圍去，我自從1月就無點出過街.. 係，我唔打針係我衰，但我始終唔想連我自己身體嘅嘢都無得選擇。 我一直隔無耐會同朋友Call下咁，可能係打下機，可能純傾計咁啦。我同屋企人嘅關係唔差，係屋企都唔孤單，都三年。有時候問準父母之後落街行下，佢哋叫我唔好去人多地方、入唔比入嘅地方就得，我明佢地都係保護我，但係香港唔人多嘅地方到底係邊？去遠啲搭車都係好多人 但係近呢幾日，我覺得我開始頂唔順啦⋯⋯ 之前覺得無乜嘢，就算補課多啲、功課多啲，我都堅持到。 但係自從我得知我太婆過咗生，見到我媽咪喊得好慘.. 加上我無打針連佢喪禮都去唔到，我真係頂唔順啦。 我同太婆嘅感情唔係好深，對佢印像就係一個好好人嘅老人家，次次探佢，佢都請我食野。我幾肯定我唔係因為佢過咗生我依家先喊得咁慘.. 呢件事只係Trigger 我一直以黎情緒嘅解。 我依家唔知自己想點，我乜都唔想做… 唔想見人，連睇戲打機嘅動力都無乜… 我到底係咪宅得太耐？到底我可以點？ 救命再咁落去我Dse會死…
#NSS學校 [CSHK] 我係一個成人，呢度好多同學有比老師否定嘅經歷，想講吓一個發生喺90年代一啲好平凡嘅經歷。 我當時係一個家境貧窮嘅小學生，身體唔好，校服唔整齊，面上少掛笑容，感受唔到太多幸福。當時成績算好，平均都有80/90 分，同學未至於欺凌，但係有未傾過計/唔熟嘅同學行埋嚟話好憎我。 當時係小四，李老師教中文及音樂。李老師對每一位同學都好嚴格，寫字勾多咗少少，橫劃稍為長咗少少，都會被扣分，除咗同學A。同學A係典型中產學生，校服整齊，頭飾漂亮，總係笑面迎人，言行自信，平均分都有80-90 分，名副其實teachers’ pet. 總之同學A的答案就是對，不一樣就是錯。而我喺佢眼中只係一個麻煩的病人，佢當然唔會宣之於口，但係試圖影響我嘅分數。 以往小一至小三，中文科未至於特別低分。小四嘅經歷令我驚咗中文。一啲有標準答案嘅卷，我比以前退步，因為好容易就被認為係 “寫錯字”/ 文法錯。作文尤其嚴重，同學A每次都有90 分以上，我只係僅僅合格的60分，但我明明冇離題，文句沒有太唔通順都會被大幅修改/ 被改成另一個寫法。我有嘗試行出去問點樣可以作得好啲，佢就好冷淡咁叫我自己睇修改嘅部分。 另一科係音樂科，佢只接受唱歌作為考試，但係上堂明明冇教過歌唱技巧，咁考試即係靠天才啦。我呢啲窮學生點會有錢學唱歌，有學唱歌的同學A又自自然然有A，我就只係得個C，即係僅僅合格。 最難忘係一次成語測驗，嗰時仲係要拎住本成語辭典 （係教科書）背背背嘅年代。有一題我唔係太識做，就喺本教科書入面撞咗個答案。最後當然是錯，李老師就寫咗個正確答案喺旁邊。派卷當日我有行出去問佢，”呢個成語我唔識，喺成語辭典查唔到，其實係點解”。佢只係講咗一句：”咁你依家咪識咯？！” 我冇理佢行番埋位，冇出聲，但係我呢一世都唔會忘記呢一句說話。 媽後生嗰時係一個作家，報紙都有登佢啲詩同散文，媽唔係目不識丁嘅人，只係窮。面對咁嘅情況，嗰個年代，佢冇投訴學校，呢個年代啲人唔會咁做。反而係佢好小心幫我對中文功課，叫我修改；作文功課就幫我校對一次有冇離題，有冇錯別字，有冇寫錯字先至交，無奈都係比人改到花哂； 仲會幫我日夜溫習，喺其他科目努力追回分數。好好彩，小四仍然係由我拎學業獎，不是同學A，覺得努力仍然有回報。 又記得小四有一日，一塊壁報板跌咗落嚟整損咗李老師隻眼，佢即時請假，學校宣布這個消息時，全體同學立即拍手歡迎。 小五六換咗另一位班主任，中文成績回復正常，經歷亦比較好。不過，我呢個樣子，永遠唔會係模範生。話說小六要揀畢業班代表，班內遴選最後一回合揀到我和另一位。老師最後選了另一人，我心知肚明，不是因為佢表現比我好，我明嘅。 畢業後我當然冇返過小學，好奇怪嘅係，呢位李老師居然喺200X年做咗校長。直到十年前提早退休，據聞係因為家人離世令佢有抑鬱症，再唔能夠工作。 有次喺佢屋企樓下迎面見到佢，勾起我過去所有的記憶。過咗咁多年，我相信佢已經忘記咗我嘅存在，但我一直冇忘記過佢。人大咗，反而唔明白，一個大人要有幾黑心，先可以咁樣去針對一個學生，令佢差啲丟失原本佢應得嘅嘢。 不過香港勝在有nss
#NSS學校 [某女校] 呢件事都幾令我煩惱，希望可以po ig。 小妹今年f3, 嗰班上年開學時有個插班生，聽聞佢喺其他學校留過班。佢成績有啲差，人緣又唔好，所以次次分組都冇人同佢一組。我朋友唔多，但係都叫做有。 咁之前仲可以返實體課，要做計分嘅功課，嗰個插班生就問我可唔可以一組。但係我嗰陣時已經分咗組，組員嫌佢可能會拉低全組嘅分所以就拒絕咗。我冇乜所謂，但係我今年f3，就算我唔介意，組員要揀科，分數都好重要，我都冇乜辦法。亦有傳聞話插班生係free Rider，雖然我唔係太相信，但組員始終會擔心。呢件事都已經發生過三四次左右。 但係我啲同學除咗因為佢成績差之外，似乎都唔係太鍾意插班生，又會私底話佢樣衰。佢實在唔太符合主流審美觀，不過我覺得無論人哋靚唔靚，都唔應該咁話佢。但係我又衰細膽內向，次次同學講呢樣嘢嘅時候，我都唔出聲。 我唔知係唔係因為呢啲原因，所以佢係我哋班嘅人緣比較差，又冇朋友。可能你會問點解我唔同佢做朋友：原因之一，係我本來啲朋友都唔係好鍾意佢，加上我本身已經內向，好難同內向嘅人做朋友，亦都唔識要點做好，次次都係其他人主動同我講嘢。 但係我驚咁樣落去會變咗杯葛/欺凌，或者而家已經係？我以前都傷害因為咁傷害過人，唔想再重滔覆轍，覺得應該要做啲嘢幫呢一個同學，但係真係唔知點做。要同佢做朋友/對佢友善啲，定係點？我有啲怕我朋友會唔鍾意我咁做，但係除咗唔鍾意呢個同學之外，我原本班朋友都幾好人，但係我始終冇乜信心話佢哋會唔會唔鍾意我。同埋如果嗰個同學下次提出一組，我應該點算？雖然有啲貪心，但我想搵一個唔會得罪任何一邊嘅方法。 我知我喺我啲同學笑佢時，冇為個同學出聲係做錯咗，所以任diu 唔嬲，但係都希望有人可以畀啲理性嘅意見我，話畀我知復課時應該點做好。thx 🙏🏻
#NSS個人 [Guest] 我本身就係一個比較內向同少嘢講嘅人，我返到學就好似同同學隔咗一埲牆咁樣。 本身升到嚟呢一班我已經有種唔好嘅預感，老師好似玩嘢咁樣拆散曬我啲friend，呢班同我一個熟嘅人都冇。相反，其他人都有friend同佢哋一齊升上嚟。開學第一日我哋要兩個兩個一組做一個活動，我都已經係單丁咗嗰個。 本身我諗住調咗位之後可以識到friend，點知啲人喺度傾計都冇理過我，我有嘗試過同佢哋一齊傾計，但之後我好似好難插到話咁樣，結果都係一句嘢都冇講過。 之後上zoom老師都會幫我哋breakout room分組，但次次分完組我同佢哋講嘢，都係冇人理我。 之後其實我本身Instagram我都有follow開一啲嘅同學，但有幾個同學根本唔accept我 (佢哋啲account起碼200至700個followers)，就算follow到，佢哋都好似hide咗我story咁樣，我撳入去就係黑屏，但我見有人係cap咗佢哋個story出嚟。 我見我哋班其他人都好融洽，佢哋日都喺度講笑同玩，但我就好似係畀人隔咗出嚟嘅嗰個，亦都係有啲人係唔記得我個名。 之後返到實體課又要開始分組做project，但係喺呢班入面同我有傾過計嘅人，佢哋都會同自己更加friend嘅一組，我哋班咁啱人數係單數，而我知道我會係剩低嗰個。 我唔知可能係我做咗啲嘢令到人哋討厭？但正常嚟講我一返到學我應該係坐喺個位度咩都冇講，基本上係透明人咁。 呢種感覺真係好難受，我都想同人哋傾計，我每次都唔知講咩好，甚至乎都冇機會畀我同唔到佢哋傾計。 純粹係想呻吓，希望捱埋下年個form4會好啲啦 Sorry for 1999