#NSS學校 [GUEST] 我唔知可以點樣攞返個真心出嚟 今次係我第一次投稿，如果有錯字同講到1999，係呢到講聲Sorry先！🙇🏻♀️ 我係06但係讀緊中二，即係比其他人遲左啲讀。我入左一間我好鍾意嘅中學，但係冇小學啲人同我一齊入嚟，我嗰陣就覺得唔緊要嘅，都好期待可以識新同學。 但係唔知係咪我自己年齡問題（但係都係只差一年）或者咩心理問題（我小學啲best frd全部都係06，所以係心入邊應該留低左一個感覺就係我爭係可以同06嘅做到frd）我發現我好難同全班同學傾得埋，不過唔鍾意冇frd嗰個感覺（？所以開始改變自己迎接佢地，啲關係好左好多，我亦都變左受歡迎嘅人。 其中一個問題嚟啦，班入邊其他女仔分左兩三批。做project或者分組嘅時候，佢地都會嚟搵我組隊，我冇乜所謂，所以通常邊個問先我就會應承邊個。但係其他嗰幾個朋友就會好唔開心，有陣時就會鬧埋我，點解我唔揀佢地？係咪frd嚟？咁其實我好難做同埋有啲委屈，無啦啦俾人鬧，但係唔想冇左frd，所以都會用盡辦法和好，跟住下次佢地就會冇嘢咁繼續傾計。（但係我會心好攰） 咁睇到呢到，可能有人會睇得出，我好似咩都就曬人，冇咩原則咁（其實係有😂🌝）。第二個問題就係，佢地會冇意中hurt我，但佢地唔知道。即係可能我俾左啲意見，如果有一個人覺得唔同意，就會鬧我🥲其他人就都會附和話：「咪就係lor，白婆…你係咪傻㗎，你都on on地9。」佢地係唔會發現自己講嘢好難聽。又有陣時會唔尊重我，佢地好鍾意搞我啲嘢同埋冇啦啦打我屎忽…（諗返起有一個人今日成個巴掌打過嚟，痛到我CS，佢係慣性打我，但係今次轉左位，打我塊面，又冇控制好力度，之後佢有say返Sorry）但我同佢地表達左我唔想你地咁，佢地都會繼續無視…覺得係玩下，冇理由我會真係嬲。 我就係好鍾意打羽毛球嘅，每禮拜三留校打，當想約出嚟玩，但係我又撞左時間佢地又會話：「唔好打埋你嗰啲廢啊又無聊嘅羽毛球啦，走堂咪得lor。」呢個時刻，我就會覺得自己冇被尊重，冇尊重我對羽毛球嘅喜愛。 呢到想講返以上行為佢地做左好多次，佢地每次都係發現唔到有問題，覺得我冇嘢。 （我好似講到佢地好衰😂😂😂，但佢地正常嗰陣，真係好正常😂會幫下我，教我做功課，佢地有講過當我係best frd，真係想同我一齊同班，本性不壞🌚👌🏻） 之後媽咪其實我同我傾返，佢叫我唔好改變自己迎接人地，有啲人唔夾就唔夾。其實我係明個道理，但係如果做返自己（其實已經唔係好知點做返自己）可能就會失去左成班朋友，我會好驚。可能係我一開始就用錯方法，冇攞個真心出嚟😔，希望大家可以俾啲意見我🙏🏻我可以點做？係咪應該堅定咁表達我想講嘅嘢？佢地會唔會聽？ 同埋希望大家知道，有乜嘢想講就要講出來，講出來先可以解決問題，唔好收收埋埋，冇人知道你諗咩。但如果啲人冇聽，無視你，咁佢可能真係同你無緣，要走就走，唔好留，遲早有一日自己會爆。 Sorry for 1999 同埋我好似作作篇長文出嚟🤦🏻♀️ 真係好多謝大家睇到呢到
#NSS個人 [guest] 小妹今年f5，感覺自己性格越黎越差，點算好？ 係咁嘅，小妹以前脾氣超好，完全唔識嬲，所以都算受人歡迎。老師同學、親戚朋友都成日讚我，捧到我好高，我諗可能就係咁搞到我越黎越自大。 升咗高form之後，讀書壓力大咗，打機搞到脾氣都大咗。可能俾人讚慣，我咩事都要求自己做到最好。雖然做唔到班入面最top嗰批，但一定要做我班frd入面最top嗰個。直到有一次我有個frd喺我面前炫耀自己有幾叻，我先發現其實幾黑人憎，所以逼自己低調，到而家已經收斂咗好多。問題黎啦，雖然我唔會特登去炫耀啲咩，但一旦有人串我或者睇低我，我就會忍唔住嬲，其實咁樣係咪有啲公主病？我好憎咁樣嘅自己，心情好易俾人影響，EQ都低咗好多，應該點樣改善(｡ ́︿ ̀｡)
#NSS家庭 [Guest] 最近知道咗老豆偷食過勁多次，仲要有叫過雞，而家勁唔想同佢喺同一個空間。見到佢，又或者係喺我附近，我真係好想嘔。 話說就喺前幾日，我阿媽無啦啦話要同我講個秘密，我以為佢同平時一樣講下啲無聊嘢，點知佢係同我講我老豆喺大陸有女人，我嗰下聽到，我完全唔知比咩反應好，我嗰個會鬧人偷食嘅老豆自己有偷食？？？ 聽到嗰下我雖然係冇咩感覺，因為我係真係勁震驚，所以先之後越諗越嬲，點解佢有偷食，都仲可以對我阿媽完全冇歉意(佢仲要覺得自己份人唔錯)。我老豆直情當我阿媽係工人，又成日心情唔好就攞我同我阿媽出氣，我阿哥打返嚟佢又鬧阿哥，阿哥唔打返嚟佢又話阿哥好唔打返嚟(我阿哥喺外國讀緊書)，簡單啲嚟講就係成家人都係畀佢攞嚟出氣。 講返正題，我阿豆仲要原來係同我阿媽拍拖嗰陣已經有偷食，到結咗婚之後就已經換左幾個女人。其實我阿媽喺拍拖嗰陣已經知佢偷食，但係有咗我阿哥，就同我老豆結婚。因為係有咗先結婚，而導致到我阿哥咗細細個就成日比我老豆打，事後就淨係掉低阿哥比我阿媽，再叫我阿媽同我阿哥搽藥膏(我阿哥比佢打到有疤)，咁就搞到我阿哥勁憎我老豆，所以我阿媽係冇將呢件事話畀我阿哥聽(呢件事得我一個知)，驚我阿哥會打老豆(佢哋之前已經試過差啲打交)。 知道左呢件事其實我係勁心痛我阿媽，我覺得我老豆咁樣好對我阿媽唔住，其實我阿媽係可以直接掉低我同我阿哥自己走咗去都得，但係阿媽並冇咁做，佢為咗我哋可以喺完整家庭成長，一直都忍住我老豆，喺所有人面前都好似咩事都冇。 本身我都已經唔鍾意我老豆，基本上我完全喺佢身上感受唔到父愛(好彩我啲舅父都對我同阿哥好好，由其是係我個細舅父，完全當我哋係佢嘅仔女)，搞到而家我係開始好討厭我老豆，我唔想見到佢，同佢有接觸，講嘢，同埋喺同一個空間，我見到佢就好想嘔，我覺得佢好污糟。