[ GUEST ]
#NSS社會 [[ GUEST ]] 每當有人用英文投稿, 就會有好多人留言:「 用返中文啦唔該、 」、「 睇英文真係好攰。」 今日我想同大家講下我對呢啲留言嘅睇法。 老實講,雖然我自己都稱唔上係英文超級好嘅人,但我覺得英文唔好都唔緊要,英文唔夠好,咪努力去學囉。 之前嘅年代,例如我哋爸爸媽媽,甚至公公婆婆嘅年代, 佢哋可能因為家境貧困而失去教育嘅機會, 所以佢地唔會識英文,甚至連中文字都未必識得曬。但而家呢個世代,香港基本上個個細路都有書讀,而且科技發達, 要學好英文根本唔難, 係睇你有冇心㗎姐。宜家唔係叫你一定要識日文、識韓文、識泰文,但英文係國際性語言, 世界各地都通用( 除咗某國 ), 所以香港人要識英文係咪真係一件咁離譜嘅事??? 另外,香港係一個國際大都會, 有唔少外國留學生、母語唔係廣東話嘅人。 所以希望大家唔可以咁自私,唔好assume每位投稿者都識中文。 何況佢地好多時都並非用緊一啲好深奧嘅詞語, 好多時候,佢哋只不過係用緊一啲好基本嘅詞語、句子結構。